بۇگىندە كۇرتى–بۋرىلبايتال ارالىعىنداعى 143 شاقىرىم جولدىڭ قۇرىلىس جۇمىستارى اياقتالۋعا جاقىن قالعان. تولىق اياقتالۋى جىل سوڭىنا دەيىن جالعاسقانىمەن, قازىردىڭ وزىندە كولىك قوزعالىسىن ىسكە قوسۋعا مۇمكىندىك تۋىپ وتىر. ال بۇدان بولەك, كۇرتى اۋىلى مەن قوناەۆ قالاسىنىڭ اراسىن جالعايتىن 67 شاقىرىم جولعا دا كۇردەلى جوندەۋ جاسالۋدا. جاقىندا بۇل باعىتتاعى كۇرە جولدىڭ ءبىر باعىتتاعى قوزعالىسى ىسكە قوسىلماق. سونداي-اق قازىر ۇزىندىعى 6 شاقىرىمعا سوزىلىپ جاتقان شامالعان ستانساسىنىڭ اينالما جولىنداعى قۇرىلىس-مونتاجداۋ جۇمىسى تياناقتالۋدا. الماتى قالاسىنىڭ ماڭىنداعى اينالما جولدىڭ قىزمەتىن اتقاراتىن توراپ مەگاپوليستەگى كولىك اعىنىن ازايتىپ, وبلىس حالقىنىڭ قالاعا قاتىناۋىن دا جەڭىلدەتەدى دەگەن ءۇمىت بار.
جالپى, بيىل وڭىردەگى جول جوندەۋ جۇمىستارىن تياناقتى جۇرگىزگەندەر قاتارىندا جامبىل اۋدانىن اتاۋعا بولادى. سونىڭ ناتيجەسىندە, اۋماقتاعى اۆتوموبيل جولدارىنىڭ جاقسى جانە قاناعاتتانارلىق جاعدايداعى ۇلەسى 58,3 پايىزعا جەتىپ وتىر. نەگىزىنەن اۋدان اۋماعىندا 24 اۋىلدىق وكرۋگ, 61 ەلدى مەكەن بار. ءوڭىر بويىنشا اۆتوموبيل جولدارىنىڭ جالپى ۇزىندىعى 1919,2 شاقىرىمدى قۇرايدى. ونىڭ ىشىندە رەسپۋبليكالىق ماڭىزى بار اۆتوموبيل جولدارىنىڭ ۇزىندىعى – 331 كم, وبلىستىق ماڭىزى بار – 594,3 كم, اۋداندىق ماڭىزى بار – 79,0 كم جانە اۋىلىشىلىك اۆتوموبيل جولدارىنىڭ ۇزىندىعى 914,9 شاقىرىمدى قامتيدى. بيىل اۋدانداعى ەلدى مەكەندەردىڭ جولدارىن جوندەۋگە جانە كۇتىپ ۇستاۋعا 1 023 ملن تەڭگە قارجى بولىنگەن. وسى قاراجاتقا 15 ەلدى مەكەننىڭ ۇزىندىعى 56,3 شاقىرىم قۇرايتىن 47 كوشەنىڭ اۆتوموبيل جولدارىنا جوندەۋ جۇمىستارىن جۇرگىزۋ جوسپارلانعان. قۇتتى قارجى دىتتەگەن جەرىنە جەتىپ, جۇيەلى تۇردە يگەرىلۋدە. ونىڭ ءبىر دالەلى, بيىل ۇزىناعاش اۋىلىنداعى 5 كوشە مەن سارىباي بي اۋىلىنىڭ 2 كوشەسى, قاراقىستاق اۋىلىنىڭ 1 كوشەسى, قازىبەك بي اۋىلىنىڭ ۇزىندىعى
5250 م قۇرايتىن 4 كوشەسى, قاسىمبەك اۋىلىنىڭ ۇزىندىعى 4950 م قۇرايتىن 5 كوشەسى, كوكدالا اۋىلىنىڭ 3 كوشەسى تولىعىمەن جوندەۋدەن ءوتتى.
– بيىل اۋدانداعى اكتەرەك اۋىلىنىڭ ۇزىندىعى 4 420 م قۇرايتىن ەسداۋلەت, قاراش باتىر, رىسكەلدى, بايمەن سىندى 4 كوشەسىنە, سونداي-اق شيەن اۋىلىنىڭ 3 كوشەسىنە ورتاشا جوندەۋ جۇمىستارىن جۇرگىزۋ جوسپارلانعان بولسا, قازىردىڭ وزىندە ول ۇدەدەن شىقتىق. الداعى تاڭدا قاجەتتى قاراجات بولىنگەن جاعدايدا ماتىبۇلاق اۋىلىنىڭ 2 كوشەسى, دەگەرەس اۋىلىنىڭ 3 كوشەسى, ۇمبەتالى اۋىلىنىڭ 2 كوشەسى, قارعالى اۋىلىنىڭ 4 كوشەسى, بوزوي اۋىلىنىڭ 3 كوشەسى, جامبىل اۋىلىنىڭ 4 كوشەسى, قاراارشا اۋىلىنىڭ 1 كوشەسى, بەسمويناق اۋىلىنىڭ 1 كوشەسى, ۇزىناعاش اۋىلىنىڭ 6 كوشەسى جوندەۋمەن قامتىلادى. دەگەنمەن بولىنگەن قاراجات جوندەۋ جۇمىستارىن اياقتاۋ ءۇشىن جەتكىلىكسىز. وسىعان بايلانىستى اتالعان نىساندار بويىنشا جۇمىستارىن اياقتاۋ ماقساتىندا الماتى وبلىسىنىڭ جولاۋشى كولىگى جانە اۆتوموبيل جولدارى باسقارماسىنا 1 167,6 ملن تەڭگەگە بيۋدجەتكە ءوتىنىم بەرىلگەن. جالپى, جىلدىڭ سوڭىنا دەيىن اۋدان بويىنشا جاقسى جانە قاناعاتتانارلىق جول ۇلەسى قاجەتتى قارجى بولىنگەن جاعدايدا 64,4 پايىز بولادى دەپ كۇتىلۋدە, – دەيدى جامبىل اۋدانىنىڭ اكىمى نۇرلان ەرتاس.
الماتى وبلىسى
