سۋرەتتى تۇسىرگەن يۋري بەككەر
ورتالىق ستاديونعا جينالعان 35 مىڭ ادام, الاڭ سىرتىندا تۇرىپ تىڭداعان مىڭداعان ادام, 68 ەلدەن كەلگەن تابىنۋشىنىڭ تامسانىپ, ۇلكەن دايىندىقپەن ۇيىمداستىرىلعان Stranger كونتسەرتىن تالقىلاپ, تارازىلاپ جىرلاۋدان ءوزارا جارىسقا تۇسكەندەي جالىعار ءتۇرى جوق. 35 مىڭ بيلەتتىڭ ساناۋلى كۇندەردە ساتىلىپ كەتكەنىن ەسكەرسەك, بۇل كونتسەرتتى كوپشىلىكتىڭ اڭساپ كۇتكەنى راس. قىركۇيەكتىڭ سوڭىندا سيرەكتەۋ بولاتىن تامىلجىعان شۋاقتى كۇنى ەكىنتى مەزگىلى ەڭكەيە بەرە, ەكى ساعات بۇرىن كەلىپ ورنىنا جايعاسقان ەل سامال جەلگە بەتىن توسەپ وتىرىپ ءبىر عاجايىپ بولارىن تاعاتسىزدانا كۇتتى. كەرەمەت كوڭىل كۇي بۋىرقانىسى, مۋزىكانىڭ ءدۇمپۋى, جارىقتىڭ شاعىلىسۋى, قاراڭعى ءتۇندى تىلگەن ديماشتىڭ تەگەۋرىندى داۋىسى, مىنە, وسىنىڭ ءبارىن ءار كورەرمەن وزىنە كەرەك رۋحاني كەسەك سۇرانىسىنىڭ ءبىر-ءبىر تاعانىن ءبىر كونتسەرتتەن تاباتىنىنا سەنىپ كەلدى.
ءتورت ساعات بويى تاپجىلماي تۇرىپ ءان تىڭداۋ تەك ديماشتىڭ كونتسەرتىنە عانا ءتان بولسا كەرەك. ءتورت ساعات بويى كونتسەرتىن قازاق جانە اعىلشىن تىلدەرىندە ءوزى جۇرگىزىپ, ءتىرى داۋىستا ءان ايتىپ, بي بيلەپ, تەر توگۋ ءبىر ارتىستەن قانشاما قاجىرلىقتى قاجەت ەتەدى. بىراق مىڭداعان تىڭدارمان جينالاتىن اۋديتوريامەن بايلانىس جاساۋدى ديماش ابدەن مەڭگەرگەن ەكەن. قولىنداعى ميكروفونىن تىڭدارمانىنا باعىتتاپ, ساۋساعىن سىلتەپ قالسا, سول ساتتە-اق تۇتاس اۋديتوريا تەڭىزدەي تولقىپ تۇرىپ قازاقشا, ورىسشا, اعىلشىنشا اندەتىپ قويا بەرەدى. سۇيىكتى ءانشىسى قاي ەلدىڭ ساحناسىندا ءان سالسا, سوڭىنان قالماي, سۇيىسپەنشىلىگى مەن ماحابباتىن ارناپ جۇرەتىن الەمنىڭ تۇكپىر-تۇكپىرىنەن كەلگەن تىڭدارماندارى, و توبا, قازاقشا ءان سالىپ تۇر. ءتىلى توسەلگەن, ءسوزى انىق, ءوزى جاتتىققان. ديماشتىڭ ءتىلى – قازاق ءتىلى بولعانى ءۇشىن باقىتتى, قۋانىشتى كەيىپتە بار بولمىسىمەن بەرىلە انگە قوسىلادى. ال ديماشتىڭ جۇرەگىنەن شاشىراعان شۋاق ولاردى بىرىكتىرە تۇسكەن, ءوزىنىڭ زور, قۋاتتى داۋىسىن, حاريزماسىن, تارتىمدىلىعىن ءوزىن باعالاعان جاقىندارىنا انمەن جولداعاندا قۋاتتانا تۇسەتىندەي.
ديماش قازاق, ورىس, اعىلشىن, قىتاي, فرانتسۋز تىلدەرىندە ءان شىرقادى, دومبىرادا, ەلەكترگيتارادا, باراباندا, باسقا دا اسپاپتاردىڭ قۇلاعىندا وينادى. اشىق اسپان استىندا وت ويناتىپ, شوق شاشىراتقان شوۋ-كونتسەرتتە ءانشى 31 ءانىن تارتۋ ەتتى, «دايديداۋ», «شارشاعان اققۋلار ماحابباتى», Stranger, Fly Away سەكىلدى ەسكى اندەرىن ەسكە الىپ, تىڭدارمانىن جاڭا شىعارمالارىمەن تانىستىردى. قۇرمەتتەپ كەلگەن كورەرمەنى ءۇشىن ديماش تۇزگەن باعدارلاما باي ءارى كوپقىرلى, حالىق اندەرىنەن باستاپ زاماناۋي كومپوزيتورلاردىڭ ليريكالىق نازىك اۋەنى مەن ىرعاقتى شىعارمالارىنا دەيىنگى رەپەرتۋار جوعارى تالعاممەن قامتىلعان. اۋاداي جەڭىل, ءيىرىمى مول نازىك ۇنمەن باستالىپ, باس الدە باريتون سەكىلدى داۋىستىڭ كەڭ دياپازونىنا ەركىن اۋىسا سالاتىن ديماشتىڭ دارا قاسيەتى مۇندا دا ەرىكسىز ءتانتى ەتتى. قۇرمانعازى اتىنداعى مەملەكەتتىك اكادەميالىق ۇلت اسپاپتارى وركەسترى مەن مەملەكەتتىك «سالتانات» بي ءانسامبلىنىڭ قاتىسىپ, ديماشتىڭ ونەرىن سۇيەمەلدەۋى, ارنايى تۇسىرىلگەن بەينەينستاللياتسيانىڭ ءجيى كورىنىس تابۋى كونتسەرتتىڭ سالماعىن ارتتىرا ءتۇستى.
Spase Machine ADEM بي توبى قۇرامىنداعى ەرلان ءابدىراحمانوۆ, ەردەن قوقىمباەۆ, ەرلان جانىشبەك ۇلى, نيكيتا گەربەر ساحناعا ديماشپەن شىعىپ, ء«دۇرداراز» ءانىن ورىندادى. امەريكالىق جوبالارمەن جۇمىس ىستەيتىن بىشكەكتىك تالانتتى بيشىلەر ديماشتىڭ وتىزمىڭدىق شوۋىندا ونەر كورسەتكەنىنە باقىتتى. ديماش وزىنەن كەيىنگى ءىنىسى ءابىلمانسۇر قۇدايبەرگەن جازعان ءاندى دە ورىندادى. لاتىنامەريكالىق تىڭدارماندارىنىڭ ءوتىنىشى بويىنشا جازىلعان يسپان تىلىندەگى ءانى دە ىلتيپاتپەن قابىلداندى. كوپتەن كۇتكەن كونتسەرت ۋلترا زاماناۋي سيپاتىمەن تاڭداي قاقتىردى.
ديماش – جاس پەن كارى, ەسكى-جاڭا دەمەي, بارلىق تالعامداعى ۇرپاق وكىلىن ءبىر زالدا جيناي الاتىن جالعىز ءانشى. ديماشتىڭ بولمىسىندا ونىڭ ەشكىمگە ۇقسامايتىن دارا داۋىسىنان بولەك, ديدارىنداعى بەكزاتتىق, تۇرپاتىنداعى تەكتىلىك پەن تازالىق, كىرپياز كوركەم تالعامى, كاسىبي ۇستانىمى كوزگە ۇرىپ تۇرادى. ديماشتىڭ ءار كونتسەرتى – جان جۇرەگىن جايىپ سالىپ اشىلۋ, تىڭداۋشىسىمەن رۋحاني سىرلاسۋ كەشى. ءان ايتقاندا, دۇنيەنى ۇمىتىپ, ەكى كوزىن تارس جۇمىپ, اندەرىنىڭ تەرەڭىنە سۇڭگىپ, ءوز الەمىندە قالىقتاپ ءومىر سۇرەتىن ديماش – سۇلۋلىقتىڭ, يماندىلىقتىڭ, قاراپايىمدىلىقتىڭ, ءپاتريوتيزمنىڭ سيمۆولى ەكەنىن كەزەكتى رەت دالەلدەدى. ءار تىڭدارمانى اننەن قۋات الدى. باستىسى, ديماشتىڭ «ەلىم, جەرىم» دەپ ءلۇپىل قاققان جۇرەگىنىڭ ءۇنىن ەستىدى.
قازاق ونەرىنىڭ حانزاداسى الەم حالقىنىڭ كوز الدىندا ميللياردتاعان قاراجاتقا تاۋەلدى ەتپەي-اق, ءوز ەلىنىڭ ابىروي-بەدەلىن ءوسىردى. الماتى قوناقۇيلەرى ءبىر ساتتە شەتەل تۋريستەرىنە تولىپ كەتتى. الەۋمەتتىك جەلىنىڭ بەتى ءبىر ديماشتىڭ وتاندىق ءتۋريزمدى دامىتۋعا قوسقان ۇلەسىن ەسەپتەگەن قىزىقتى ستاتيستيكانى جاريالاپ جاتتى. كونتسەرتتى ۇيىمداستىرۋعا 200-دەن اسا مامان, ءۇش ءتىلدى ەركىن مەڭگەرگەن 400 ەرىكتى جۇمىلدىرىلدى. الەمدى قارۋمەن, راكەتامەن ەمەس, انمەن قۋاندىرۋدىڭ عاجاپ ۇلگىسىن كورسەتكەن ديماشتىڭ ورىنداۋىنداعى ءار ءان تىڭداۋشىسى ءۇشىن ۇمىتىلماس كۇن. جۇمىر جەرگە تانىمال ساق زامانىنىڭ ساربازى كيگەن التىن ادام تاريحي جادىگەرىن قايتا ءتىرىلتىپ, ساحنادا ساربازدىڭ كوستيۋمىندە كورىنگەن ديماشتىڭ ۇلتىنىڭ بايلىعىن بۇكىل الەمگە ماقتانىشپەن ۇلىقتاعىسى كەلگەن جۇرەگىنىڭ ءلۇپىلىن ءۇنسىز عانا تۇسىندىك. «مىڭ العىس ساعان, الاشتىڭ التىن بالاسى» دەگەن اق-ەدىل تىلەك, قوسىلا ءان شىرقاۋعا, قول شاپالاقتاۋ مەن قوشەمەت, قولداۋمەن ۇيلەسىم تاۋىپ جاتتى.
بۇل كەشتە ديماش ء«بىر اسپاننىڭ تاريحى» اتتى جاڭا تۋىندىسىنىڭ تۇساۋىن كەستى. «جەر بەتىنىڭ حالقى ۇلتقا, دىنگە, ناسىلگە بولىنەدى, بىراق ءبىز ءبارىمىز – ءبىر پلانەتانىڭ بالالارىمىز جانە ءبىر اسپاننىڭ استىندا ءومىر سۇرەمىز. ءومىر – ەڭ باعالى قۇندىلىق. بىردە-ءبىر قاسيەتتى كىتاپ ادامداردى قىرىپ-جويۋعا شاقىرمايدى. ءبىز دوستاسۋدى ۇيرەنۋىمىز كەرەك, ءبىردى-ەكىلى ادام ءۇشىن ميلليونداعان بالالار جاپا شەگىپ جاتىر. بىرلىك بولسىن الەمدە, جەر شارىنىڭ بولاشاعى ءبىزدىڭ قولىمىزدا» دەپ ورتاق عالامشارداعى بارلىق تىڭدارمانىن بىرلىككە شاقىردى. ديماشتىڭ جان دۇنيەسىنىڭ جىلۋى مەن جارىعى – ونىڭ جانارىندا. بۇگىنگىدەي بۋىرقانىسقا تولى الماعايىپ ۋاقىتتا ديماش قۇدايبەرگەن شىعارماشىلىعى شىڭدالعان كاسىبي ءارتىس عانا ەمەس, ءوز ۇستانىمىنا ادال, تۋعان ەلىن شەكسىز سۇيەتىن ازامات رەتىندە ۇرەي اتاۋلىنى ۇرلەپ تاستاپ, ميلليونداعان جۇرەككە سەنىم ۇيالاتتى.
الماتى
