ايماقتار • 23 قىركۇيەك، 2022

بال ءتۇسىمىن توننالاپ ولشەر ەدى...

62 رەت كورسەتىلدى

شىعىستا بالدىڭ وتانى – كا­تون­قا­راعاي. اسىرەسە كوروبيحا، بارلىق سەكىلدى تاۋ ىشىندەگى اۋىل­دا­­رىنىڭ ءار اۋلاسى ارا باعىپ، بال شايقايدى. كاتوننىڭ وزىندە دە بال ساپىرىپ وتىر­عاندار از ەمەس. كەشە عانا ارالارىن قىس ماۋسىمىنا دايىنداپ جۇر­گەن ومارتاشى عاراپ ءسا­فيندى كورىپ، شارۋاشىلىقتىڭ اۋجايىن سۇراسقانمىن.

– جازداي بۇيىرعان بالدى شايقاپ الدىق. ەندى قىمتاپ، وراپ، قىستىڭ قامىن جاساي بەرۋ كەرەك. ءوزىڭ بىلەسىڭ، بيىل جاۋىن-شاشىن از ءتۇستى. ءشوپ كۇيىپ كەتتى. كۇيگەن شوپتە ءنىل بولسىن با؟! ال بالدىڭ ءتۇسۋ مولشەرى ءشوپتىڭ نىلىنە بايلانىستى، – دەيدى ومارتاشى ۇيانىڭ قاقپاعىن جاۋىپ جاتىپ.

عاراپ سافين سوناۋ كەڭەس وكىمەتى تۇ­سىن­دا كوروبيحا اۋىلىندا ومارتا­شى­نىڭ ارنايى وقۋىن وقىپ، كاسىبي تۇرعىدا ىسكە كىرىسكەن. كەيىن باسقا جۇمىسقا اۋىس­قا­نىمەن، ارا باعۋدان قول ۇزگەن جوق. ايتۋىنشا، سوناۋ جىلدارى ارا تۇقىمىن اسىل­داندىرىپ، عىلىمي تۇرعىدان قاراپ باعا­تىن. قازىر قولعا تۇسكەن ارانى وسىرە بەرەتىن كورىنەدى. ياعني اسىلداندىرۋ جۇمىستارى ۇمىت بولعان. سونىڭ وزىندە كوپشىلىك كاتونقاراعايدىڭ بالىن ىزدەپ ءجۇرىپ الادى. سۇرانىس وتە جوعارى. البەتتە، مىڭ ءتۇرلى شوپتەن سۇزىلگەن بال ءدامدى بولماي ما؟! ءدامى ءوز الدىنا، ادام اعزاسىنا دەگەن پايداسى زور. وڭىردە تۋريزم دوڭگەلەي باستاعالى بال عانا ەمەس، ارانىڭ سۇتىنە دەيىن ساتىلاتىن بولدى. ارا ءسۇتى دەپ وتىرعانىم، جۇمىسشى بال اراسىنىڭ بەزىنەن شىعاتىن بيوگەندىك قا­سيەتى بار زات. ەگەر دە، ادام گيپوتونيا، بەت تەرىسىنىڭ اۋرۋ­لا­رىنا شالدىقسا، جۇيكە جۇيەسى قىزمەتى بۇزىلسا، ارا ءسۇتى تاپتىرماس ەم. الا جازداي تىنىمسىز ەڭبەكتەنەتىن جۇمىسشى ارا ءسۇتتى قويىپ، بالدىڭ ءوزىن تىرنەكتەپ جينايدى. تىرنەكتەپ جيناپ، توننالاپ ولشەتەر ەدى. ءشوپ سۇيىق جىلدارى 6-7 شاقىرىمعا دەيىن ۇشىپ، تا­رى­نىڭ قاۋىزىنداي عانا بال اكەلەدى ەكەن.

– جاۋىن-شاشىن مول ءتۇسىپ، ءشوپ جايقالسا، ارا دا دامىلسىز ەڭبەكتەنەدى. سەنى شاقپايدى دا. ال بال بولماسا، ارا ىزاقور بولادى. ءبىر جىلدارى وسى كاتوننىڭ ماڭىندا ەكسپارتسەت، بەدە سەكىلدى ءشوپ جاقسى ءوستى. القاپ قىزىلدى-جاسىلدى بولىپ جايقالىپ جاتقان. سول جىلدارى بالدى ءبىر شايقاعاندا جيىرما فلياگقا دەيىن الىپ جۇردىك، – دەيدى عاراپ سافين.

ءيا، بيىل بالدىڭ ءتۇسىمى از بولعانىن اۋداندىق اۋىل شارۋاشىلىعى ماماندارى دا راستاپ وتىر. ەسەپ-قيساپتارىنا قاراساق، 350-گە جۋىق ومارتادان 250-280 توننا عانا بال ءتۇسىپتى. ايتپەسە، كەيبىر جىلدارى ءتۇسىم 400 تونناعا دەيىن جەتكەن ەكەن.

 

شىعىس قازاقستان وبلىسى،

كاتونقاراعاي اۋدانى

سوڭعى جاڭالىقتار

«تازا كوكجايلاۋ» اكتسياسى ءوتتى

ەكولوگيا • بۇگىن، 19:11

ءرۋبلدى ساتىپ الۋ 31%-عا ءوستى

ەكونوميكا • بۇگىن، 15:23

ۇقساس جاڭالىقتار