فينليانديا ۇلتتىق ءارحيۆىنىڭ نەگىزى 1892 جىلى قالانعان. ونىڭ مىندەتى – ۇلتتىق مۇرانىڭ ءبىر بولىگى بولىپ تابىلاتىن رەسمي قۇجاتتاردىڭ ساقتالۋىن قامتاماسىز ەتۋ. بۇل – فينليانديادا ارحيۆ سالاسىنداعى ەڭ ماڭىزدى ورگان بولىپ ەسەپتەلەدى. شەتەلدەن كەلگەن عالىمدارعا وزدەرىندە ساقتالعان قۇجاتتاردى ۇسىنىپ, عىلىمي-زەرتتەۋ جۇمىستارىنا بەلسەنە قاتىسادى.
ء«ىسساپار كەزىندە ارحيۆ ماماندارىنىڭ جۇمىس بارىسىمەن تانىستىم, ولار ءوز تاجىريبەلەرىمەن ءبولىستى. مەكەمەنىڭ گەرالديكالىق مادەنيەتتى دامىتۋدا مۇمكىندىگى زور. وسىنى ەسكەرە وتىرىپ, ارحيۆ سالاسىنداعى بىرقاتار جاڭالىقتان قۇلاعدار بولدىم. زاماناۋي تەحنولوگيا, قورلاردى ساقتاۋ ءتارتىبى تۋراسىندا كەڭىنەن اڭگىمەلەستىك», دەيدى قالالىق ءارحيۆتىڭ ديرەكتورى مەيرام بەكتەمباەۆ.
ونىڭ ايتۋىنشا, اتالعان ارحيۆتە 240 ادام جۇمىس ىستەيدى. ۇلتتىق ءارحيۆتىڭ حەلسينكي, ۆااسا, يناري (سامي ءارحيۆى), يوەنسۋ, ميككەلي, وۋلۋ, تۋركۋ, حامەنليننا جانە دجيۆەسكيللا قالالارىندا فيليالدارى بار. ولاردىڭ ءبارى ەل ىشىندە بەلسەندى جۇمىس ىستەيدى ءارى وقىرمانى دا كوپ.
جالپى, فينليانديا ۇلتتىق ءارحيۆىنىڭ كىتاپحاناسى وتە باي. ول – قۇجات اينالىمى جانە سفراگيستيكاعا ارنالعان جالپىۇلتتىق مامانداندىرىلعان عىلىمي كىتاپحانا سانالادى. كىتاپحانا قورىندا 334 مىڭنان استام وتاندىق جانە شەتەلدىك عىلىمي كىتاپ, 200-گە جۋىق مەرزىمدى باسىلىم بار.
مۇندا فينليانديانىڭ جانە كورشىلەس ەلدەردىڭ تاريحى, زاڭ عىلىمى, مەملەكەتتىك باسقارۋ جانە الەۋمەتتىك زەرتتەۋلەر, ولكەتانۋ بويىنشا كىتاپتار جەتەرلىك. ول از دەسەڭىز ۇلى تۇلعالاردىڭ ءومىربايانىن قامتيتىن سەريالىق جيناقتار دا كەزدەسەدى. ەڭ قىزىعى, كىتاپحانا گەرالديكا جانە سفراگيستيكا بويىنشا عىلىمي ءھام ادەبي جۋرنالداردىڭ قويماسى ىسپەتتى. سوندىقتان ارحيۆكە كەلۋشىلەر وتە كوپ.
