قازاقستاندىق عالىمدى ماسكەۋلىك ارىپتەستەرى نوبەل سىيلىعىنا ۇسىندى

استانا. 15 مامىر. تەحنيكا عىلىمدارىنىڭ دوكتورى, پروفەسسور, شىمكەنتتەگى وڭتۇستىك قازاقستان مەملەكەتتىك پەداگوگيكالىق ينستيتۋتى عىلىمي-زەرتتەۋ زەرتحاناسىنىڭ مەڭگەرۋشىسى, كوپتەگەن جاڭالىقتىڭ اۆتورى ابدىمالىك ءاشىروۆتىڭ سوڭعى جوباسى دۇنيەجۇزىن تاڭ قالدىرۋدا. بۇل تۋرالى «24kz» حابارلادى. عالىمنىڭ بۇل جاڭالىعى بويىنشا, اۋىل شارۋاشىلىعى داقىلدارىنىڭ ونىمدىلىگىن 50 پايىزعا كوتەرۋگە بولادى.  ناقتىلاي ايتقاندا, داندەر قويمالاردا بيورەزونانستى جولمەن اكتيۆتەندىرىلەدى. ودان كەيىن كەم دەگەندە 15 كۇننىڭ ىشىندە ەگىلۋى ءتيىس. حيميالىق قوسپالارسىز ءداندى داقىلداردىڭ ونىمدىلىگىن 50 پايىزعا دەيىن ارتتىرۋعا باعىتتالعان جوبا ەلىمىزدىڭ 6 وبلىسى مەن گەرمانيا, يتاليا, تۇركيا, رەسەي, ۋكراينا, وزبەكستان سىندى مەملەكەتتەردى ءساتتى سىنالعان. بارلىق تاجىريبەلىك ەگىستىكتەردە 11 داقىل ءتۇرى بويىنشا وڭ ناتيجە كورسەتكەن. ولاردىڭ ىشىندە بيداي, ارپا, كۇرىش, كارتوپ جانە جۇگەرى داقىلدارى بار. قازىر عالىمنىڭ jcs جوباسىنا ءۇندىستان جانە ۆەتنام مەملەكەتتەرى قىزىعۋشىلىق تانىتۋدا. ال ماسكەۋلىك عالىمدار ونى نوبەل سىيلىعىنا ۇسىنىپ وتىر. تەحنيكا عىلىمدارىنىڭ دوكتورى, ابدىمالىك ءاشىروۆ: «مەنىڭ قۇرال-جابدىعىم – 8 كيللوگرامدىق كەيس. ونىڭ ىشىندە مينيكومپيۋتەر بار. ءبىز انتەننانى شىعارىپ, تۇقىمدارعا تومەنگى جيىلىكتى تولقىنداردا اقپارات بەرەمىز. وعان 11-اق مينۋت كەتەدى. مەنىڭ ءادىسىمنىڭ باستى ەرەكشەلىگى – ەكولوگياعا زيان كەلمەيدى, ءونىم مۋتاتسيالىق وزگەرىستەرگە ۇشىرامايدى. قازاقستاندا 12 ملن. گەكتار ءار ءتۇرلى داقىلدارعا ارنالعان جەر بار. ەگەر سول القاپتارعا مەنىڭ ءتاسىلىمدى قولداناتىن بولسا, ءبىز 5-6 ملن. توننا ءوسىم الۋىمىز مۇمكىن. بۇل 12 مەملەكەتتى استىقپەن تەگىن قامتاماسىز ەتە الامىز دەگەن ءسوز», – دەدى. 1991 جىلدان بەرى كۇن نۇرىنىڭ قۇبىلىستارىنا عىلىمي زەرتتەۋلەر جۇرگىزىپ, سونىڭ ناتيجەسىندە عالىم 2004 جىلى ادىلەت مينيسترلىگىنەن پاتەنت الىپتى. بىرنەشە اۆتورلىق كۋالىكتەر دە بار. ماسكەۋلىك عالىمدار بۇل جاڭالىقتى نوبەل سىيلىعىنا ۇسىنۋ كەرەكتىگىن ايتىپتى. وسىعان وراي ءا.ءاشىروۆ: «قازاقستاندا نوبەل سىيلىعىنا عالىمداردىڭ سەگىز توبى ۇمىتكەر بولا الادى. نوبەل سىيلىعىنىڭ شارتى بويىنشا ۇمىتكەر بولۋ ءۇشىن قولدا جاڭالىق تۋرالى حالىقارالىق ۇلگىدەگى ديپلوم بولۋى كەرەك. ودان باسقا, نوبەل سىيلىعىنىڭ ەكى لاۋرەاتىنىڭ قولداۋ پىكىرلەرى قاجەت. ءبىر لاۋرەات بىزگە ءوزىنىڭ جىلى لەبىزىن ءبىلدىرىپ تە قويدى. ول فيزيك, سوندىقتان عارىش-گەوفيزيكالىق شامالاردىڭ نە ەكەندىگىن جاقسى بىلەدى. ەكىنشى لاۋرەات – ءۇندىستاننىڭ وكىلى. ول ءبىزدى دەلي قالاسىنا كەلىپ, ونەرتابىستى كورسەتۋىمىزدى ءوتىنىپ جاتىر», – دەدى. ەندى جاڭا تەحنولوگيانى جاساۋشىلار ءوز ادىستەرىن بۇكىل الەم بويىنشا شارۋا قوجالىقتارىنا ەندىرۋدى جوسپارلاۋدا. بۇل جاڭالىعىنىڭ قىزىعىن كۇللى قازاق حالقى كورسە دەپ ارمانداپ, قولىنداعى پاتەنتىن وزگەگە ساتپاي وتىرعان پاتريوت عالىم حالىقارالىق دارەجەدەگى گروسسمەيستەر, الەمنىڭ 4 دۇركىن چەمپيونى جانسايا ابدىمالىكتىڭ اتاسى ەكەنىن ايتا كەتەيىك. جولدىباي بازار. دەرەككوز: «24kz». فوتو: «24kz».