كەدەن وداعى ەلدەرىندە كەيبىر باعىتتاردا ۇشاق بيلەتتەرى پويىز جول كىرەسىنەن ارزان

استانا. 16 مامىر. باسەكەلەستىك جانە مونوپولياعا قارسى رەتتەۋ جونىندەگى ەۋرازيالىق ەكونوميكالىق كوميسسيانىڭ ءمينيسترى نۇرلان الدابەرگەنوۆ ترانسشەكارالىق نارىقتاعى اۋە جانە تەمىرجول تاسىمالدارىنداعى بيلەت باعالارى تۇرعىسىنداعى جاعدايدى ەكونوميكالىق قيسىنسىزدىق ەكەنىن مالىمدەدى. بۇل تۋرالى gazeta.kz حابارلادى. تارازدا وتكەن ەۋرازيالىق ەكونوميكالىق كوميسسيا وتىرىسىندا تەمىرجول جانە اۋە تاسىمالدارىنداعى نارىقتاردىڭ تەڭ باسەكەلەستىك جاعدايلارى ءسوز بولدى. باسقوسۋعا كەدەن وداعى مەن بىرىڭعاي ەكونوميكالىق كەڭىستىككە مۇشە مەملەكەتتەردىڭ دەپۋتاتتارى, مەملەكەتتىك ورگانداردىڭ, بيزنەس-قوعامداستىقتىڭ وكىلدەرى قاتىستى. اتالعان جيىندا ن.الدابەرگەنوۆ تەمىرجول جانە اۋە كولىگىمەن جولاۋشىلار تاسىمالىنىڭ جول اقىلارىن سالىستىردى. ونىڭ ايتۋىنشا, «ترانساەرو» اۋەكومپانياسىندا ماسكەۋ-استانا (2290 كم.) ج»نە ماسكەۋ-قاراعاندى (2478 كم.) رەيستەرىندە باعا ايىرماشىلىعى ەكى ەسەدەن كوپ – 61,7 مىڭ تەڭگە جانە 23,07 مىڭ تەڭگە. ال «اەروفلوت» كومپانياسى ماسكەۋ-قاراعاندى رەيسىنە 31,9 مىڭ تەڭگە تاريف بەلگىلەگەن. سونداي-اق, مينيستر قازاقستان مەن رەسەيدىڭ ىشكى جەلىلەرىندەگى اۆيابيلەتتەرى تاريفتەرىنە دە نازار اۋداردى. ول: «قازاقستاندىق اۋەبيلەتتەر ەداۋىر جوعارى ەكەنى كورىنەدى. مىسالعا, سكات كومپانياسىنىڭ الماتى-تاراز (470 كم.) اۋەرەيسىنىڭ باعاسى 17,49 مىڭ تەڭگە. ماسكەۋ مەن نيجني نوۆگورود اراسىنداعى شامامەن وسىنداي قاشىقتىققا رەسەيلىك جولاۋشىلار 11,6-دان 16,7 مىڭ تەڭگەگە دەيىن تولەيدى. ايىرماشىلىعى 33 پايىزعا دەيىن جەتەدى», – دەدى. ن.الدابەرگەنوۆتىڭ سوزىنە قاراعاندا, كەيبىر اۋە جولدارىنداعى ۇشاق بيلەتتەرى سول باعىتتاعى پويىزدىڭ كۋپە ۆاگونىنىڭ باعاسىنان ارزانىراق بولىپ شىققان. ول بۇل جاعدايدى ەكونوميكالىق قيسىنسىزدىق دەپ ەسەپتەيتىنىن جەتكىزە كەلە, بولاشاقتا اۋە جانە تەمىرجول تاسىمالدارىنا بىرىڭعاي كوڭىلگە قونىمدى تاريف بەلگىلەنەتىنىنە سەنىمىن ءبىلدىردى. جولدىباي بازار. دەرەككوز: gazeta.kz. فوتو: «قازاقپارات».