«سول كۇنى بالانى وپەراتسياعا دايىندادىق. وعان ءبىزدىڭ ورتالىققا تيەسىلى جاڭا تەحنولوگيا بويىنشا توراكوسكوپيالىق ادىسپەن وڭەشتىڭ تىكەلەي اناستوموزى جاسالدى. 10 كۇن ىشىندە كىشكەنتاي پاتسيەنت ستاتسيونارىمىزدا ەمدەلىپ, ۇيگە شىعارىلدى. ول ءبىزدىڭ كلينيكامىزدا 1 جاسقا تولعانشا باقىلاۋدا بولدى. قازىر بالا ءبىر جاس ەكى ايعا تولدى. بۇگىن ونىڭ اتا-اجەسى مەن اكە-شەشەسى ۇلتتىق ءداستۇرىمىز – تۇساۋكەسەر ءراسىمىن ماعان تاپسىردى. ولار بالاسىنىڭ بولاشاقتا دارىگەر اتانىپ, باسقالاردىڭ ومىرىنە اراشا تۇسەتىن ماماندىق يەسى بولعانىن قالايدى. بۇل ءداستۇردى تەك تاڭداۋلى ادامعا عانا سەنىپ تاپسىرادى. بالانىڭ بولاشاق تاعدىرىنا قاتىستى بولعانىما, وسىنداي قاستەرلى مىندەت بىزگە بۇيىرعانىنا قۋانىشتىمىز. جىل سايىن وسىنداي 5-6 بالانىڭ تۇساۋىن كەسەمىز», دەيدى بالالار حيرۋرگى, قابىلداۋ ءبولىمىنىڭ مەڭگەرۋشىسى مەيىرجان قۇرماناليەۆ.
ايتقانداي, مۇنداي وپەراتسيالار بالالار جەدەل مەديتسينالىق جاردەم كورسەتۋ ورتالىعىندا 2013 جىلدان بەرى جاسالادى. توعىز جىل ىشىندە 60-قا جۋىق جاڭا تۋعان نارەستەگە وپەراتسيا جاسالدى. بىلتىردىڭ وزىندە نەوناتالدى حيرۋرگتەر 10 سابيگە وپەراتسيا جاسادى. دارىگەرلەردىڭ تاجىريبەسى مەن بىلىكتىلىگى 100% جاعدايدا وڭ ناتيجەگە قول جەتكىزۋگە مۇمكىندىك بەرەدى. بۇگىندە اۋرۋحانا الماتى قالاسىنىڭ تۇرعىندارىنا عانا ەمەس, ۇلكەن قالاعا ەلىمىزدىڭ وزگە وڭىرلەرىنەن ەم ىزدەپ كەلگەن بالالارعا دا كومەك كورسەتە الادى.
الماتى
