ەڭبەك اۋلەتتەرىنە قۇرمەت

استانادا «سامۇرىق قازىنا» اق كومپانيالار توبىنىڭ ۇيىمداستىرۋشىسى ەڭبەك اۋلەتتەرى كۇنىن مەرەكەلەۋ شاراسى ءوتتى. اتالعان باسقوسۋعا «سامۇرىق قازىنا» ۇاق» اق باسقارما توراعاسى ومىرزاق شوكەەۆ قاتىسىپ, ەڭبەك اۋلەتتەرىن مەرەكەلەرىمەن قۇتتىقتادى. ۇرپاقتار ساباقتاستىعى مەن الەۋمەتتىك تۇراقتىلىقتى قوعامدىق ىنتالاندىرۋ رەتىندە ەڭبەك اۋلەتتەرى ينستيتۋتىن ­جاريا ەتۋ مەن قولداۋدى ماقسات ەتكەن يگى شاراعا ەلىمىزدىڭ بىرقاتار وڭىرلەرىنەن سالاداعى ەڭبەك وتىلدەرى عاسىرلاردى قۇراي­تىن اتادان بالاعا ميراس بولىپ كەتكەن اۋلەت مۇشەلەرى قاتىستى. ولاردىڭ قاتارىندا تەمىرجول سالاسىندا ۇزاق جىل­دىق ءوتىلى بار سەمەيلىك مۇساباەۆ­تار اۋلەتى دە بار. اكە مەن بالا, سونداي-اق, نەمەرەلەرى مەن شوبەرەلەرىن قوسقاندا جالپى سانى 23 ادام بۇگىندەرى وسى تەمىرجول سالاسىندا قىزمەت ەتۋدە. ال, پەتروپاۆلدىق پوشتاشى ديۋسەلەكوۆتەر اۋلەتىنىڭ ءۇش بۋىنىنداعى 6 ادام دا وسى سالاعا ەڭبەك سىڭىرۋدە. «بۇگىنگى شارا «قازاقستاننىڭ الەۋمەتتىك جاڭعىرتىلۋى: جالپىعا ورتاق ەڭبەك قوعامىنا قاراي 20 قادام» اتتى باعدارلامالىق ماقالالاردا قويىلعان مىندەتتەردى ىسكە اسىرۋعا باعىتتالعان. وسىلاي ەڭبەك اۋلەتتەرىن قولداۋ مەن كەلەر ۇرپاقتىڭ ەڭبەككە ۇمتىلىسى مەن قۇرمەتىن جوعارىلاتۋ بولىپ تابىلادى», دەيدى شارانى ۇيىمداستىرۋشىلار. مەرەكە اياسىندا ەڭبەك اۋلەت­­تەرى وكىلدەرىنە ناگرادالار مەن ەستەلىك سىيلىقتار تابىس ەتىلدى. سونداي-اق, «اراي» ساياباعىندا ەڭبەك اۋلەتتەرى اللەياسىنا اعاشتار وتىرعىزىلدى. ءابدىراحمان قىدىربەك, «ەگەمەن قازاقستان».