قاۋىرت جەلى

دۇنيەدە ەت جاقىنىڭنىڭ, يا ءبىر جاقسى كورەتىن قيماس جانىڭنىڭ تەرىس اعىمنىڭ شىلاۋىندا كەتىپ بارا جاتقانىن كورە تۇرا شاراسىز بولۋدان اسقان قيىندىق جوق شىعار, ءسىرا؟! قايرانى جوق, الىسىپ-ايتىسارعا ءدىني ساۋاتىنىڭ جەتىمسىزدىگى دارمەنىن كەمىتىپ, پۇشايمان كۇيگە تۇسكەندەر سانىنىڭ, وكىنىشكە قاراي, جىل سايىن كەميتىن ءتۇرى جوق. قوعامعا تۇسكەن ءزىل-باتپان سالماق قانشاما وتباسىعا ويرانىن سالۋدا. نە ىستەۋ كەرەك, وسى ءبىر قاسىرەتتى, قالىڭداي تۇسكىسى كەلىپ تۇرعان قالىڭ تۇماندى قالاي سەيىلتۋگە بولادى؟ پوشتا جاشىگىنەن اي سايىن كوممۋ­نالدىق قىزمەت تۇرلەرىنە كەلەتىن تولەم حابارلاماسىن العانمىن. كونۆەرتتى اشقانىمدا ىشىندە حابارلاماعا قوسىمشا قاعاز ءجۇر ەكەن. جازۋىنا ءۇڭىلدىم. ەگەر ءسىزدىڭ جاقىن ادامىڭىزعا الدەقانداي ءبىر تۇسىنىكسىز ءدىني ۋاعىزدار ايتۋشى بارىن بىلسەڭىز نەمەسە پاتەرىڭىزدىڭ ەسىگىن قاعىپ, بولماسا پودەزىڭىزگە كىرىپ, كولىكتە وتىرعانىڭىزدا ءدىني مازمۇنداعى ادەبيەتتەر, ۇنپاراقتار تاراتۋ ءمالىم بولسا, ەگەر ءسىزدى ءدىني باسقوسۋلار مەن جيىندارعا كە­لۋدى ۇگىتتەسە, جاقىنىڭىز جات اعىم­نىڭ شىلاۋىنا تۇسسە, بىزبەن حابارلاسىڭىز دەپ «قاۋىرت جەلى» اتتى اقپاراتتىق كەڭەس بەرۋ ورتالىعىنىڭ جۇمىس ىستەيتىنىن, ونىڭ 114 نومىرىنە تەگىن تەلەفون شالۋعا بولاتىنى تۋرالى جازىلعان ەكەن. تولەم حابارلاماسىنا ورتا­لىقتىڭ تەلەفونى جازىلعان پا­راقتى قوسىپ جىبەرۋدى قالاي جاقسى ويلاپ تاپقان, قاجەت ادامدى قۇلاقتاندىرۋدىڭ ادە­مى ءادىسى ەكەن دەپ ىشتەي ءسۇيسىندىم. تەلەفون شالىپ, يگىلىكتى ءىس باستاۋلارىنا ريزاشىلىعىمدى ءبىلدىرىپ, حابارلاسىپ جاتقانداردىڭ بار-جوقتىعىن سۇرادىم. ورتالىقتىڭ باسشىسى يۋليا دەنيسەنكو مەنى قاجەتتى اقپاراتپەن قامتاماسىز ەتەتىنىن ايتتى. سونىمەن, ورتالىق قالاي جۇ­مىس ىستەيدى؟ كەڭەس بەرۋ 24 ساعات بويىنا ۇزبەستەن جۇرگىزىلىپ, مامان زاڭگەرلەر مەن تەولوگتار, ءدىنتانۋشىلار مەن پسيحولوگتار تەلەفونمەن دە, جۇزبە-ءجۇز دە, كومپيۋتەر ارقىلى www.1401.kz. جەلىسىندە ونلاين تۇرىندە دە كومەك قولىن سوزادى ەكەن. تەك استانا عانا ەمەس, قازاقستاننىڭ قاي ەلدى مەكەنىنەن دە قالالىق تەلەفونعا حابارلاسۋ تەگىن. كۇن سايىن ونداعان ادام مۇڭىن شاعىپ, قاجەت تۇستا بارلىق ماماندار قىسىلعان جانعا بىرىگە جاردەم كورسەتەتىن ورتالىققا تەك وسى جىلدىڭ ءبىرىنشى توقسانىندا 500-دەي ادام حابارلاسقان كورىنەدى. 1200-دەي ازامات وتباسىلارىندا ءدىني اعىمنىڭ ىقپالىنان پروب­لەمالار تۋىنداعانىمەن ورتاقتاسقان. اداسقان ادامدى قايىرا ۇيىرىنە قوسۋ – وتە ءبىر جاۋاپتى دا كۇردەلى ءارى نازىك جۇمىس. كەيدە ونىڭ تولىققاندى ءوز ورتاسىنا ورالۋىنا كوپ ۋاقىت جۇم­سالادى دەگەن ورتالىق ماماندارى 69 ءوتىنىشتىڭ قۇقىق قورعاۋ سالاسىنا جىبەرىلگەنىن, ال 4-ءۋى بويىنشا قىلمىستىق ءىس قوزعالعانىن جەتكىزدى. ءدىني تەرىس اعىم سالعان لاڭ وتباسىلاردى ىشتەن ءىرىتىپ, كەيدە ادامداردىڭ وزىنە ءوزى قول سالۋلارىنا دا يتەرمەلەيتىنىن ايتقان ماماندار بۇگىنگى تاڭدا ەلىمىزدىڭ كولەمىندە 28 وسىنداي ورتالىقتىڭ جۇمىس جاساپ جاتقانىنان حاباردار ەتتى. ەسىڭىزگە سالامىز, تەلەفون ءنومىرى – 114. انار تولەۋحانقىزى, «ەگەمەن قازاقستان».