بيىل 15 مۇعالىم ەڭبەك ەتەتىن مەكتەپ تابالدىرىعىن 7 بالا اتتادى. جالپى, ورتالاۋ مەكتەپتە 41 وقۋشى ءبىلىم السا, مەكتەپالدى دايارلىق توبىنا 5 وقۋشى بارادى. بىلتىر مەكتەپتى 3 وقۋشى ءتامامداپ, ونىڭ ءبىرى ۇزدىك اتتەستاتپەن بىتىرگەن. شاعىن عانا اۋىل دەگەنىمىز بولماسا, زامانىندا قاراشەڭگەل اۋىلىنىڭ قارا شاڭىراعى تالاي مارعاسقالاردى تۇلەتكەن كيەلى وردا.
جاڭا مەكتەپ قايىرىمدىلىق كومەك قورىنىڭ ەسەبىنەن سالىندى. ىشىندە سپورت زالى, اسحاناسى, سىنىپ بولمەلەرى بار شاعىن مەكتەپتىڭ قۇرلىسىن اۆSK Building Company جشس جۇرگىزدى. قايىرىمدىلىق قوردان جاڭا مەكتەپتىڭ قۇرىلىسىنا 45 ملن تەڭگە بولىنگەن.
جاڭا ءبىلىم وشاعىنىڭ اشىلۋ راسىمىندە قاراتال اۋدانىنىڭ اكىمى ەرلان يسابەكوۆ ءسوز سويلەپ, اۋىل تۇرعىندارى مەن بالالاردى قۇتتىقتادى. ودان كەيىن اۋىل اقساقالدارى اق باتاسىن بەرىپ, ەسىگىن ايقارا اشقان ءبىلىم وشاعىنىڭ لەنتاسىن قيدى. ءىشىن ارالاپ كورگەن قادىرمەندى قوناقتار مەن اۋدان باسشىلارى مەكتەپ تابالدىرىعىن اتتاعان بالدىرعانداردىڭ ساباعىنا قاتىسىپ, ولاردىڭ تاۋداي تالابىنا اق جول تىلەدى.
جەتىسۋ وبلىسى
