قىزىلوردادا قۇرامىندا سىنابى بار شامدار تسەحى سالىنادى

استانا. 15 مامىر. قىزىلوردادا سىنابى بار شامدار مەن قۇرىلعىلاردى قايتا وڭدەۋ تسەحى سالىنادى. بۇل تۋرالى وبلىستىق كاسىپكەرلىك جانە تۋريزم باسقارماسىنىڭ باسشىسى تەلمان سۇلەيمەنوۆ حابارلادى. «بيزنەستىڭ جول كارتاسى - 2020» باعدارلاماسى اياسىندا جەكە كاسىپكەر قايرات نۇرەكەشوۆ ءوندىرىس اشۋ ءۇشىن 6 ملن. تەڭگە كولەمىندە قايتارىمسىز گرانتتى جەڭىپ الدى. تسەح قورشاعان ورتاعا قاۋىپسىز سىناپ وندىرەتىن رەسەيدەن شىققان «ەلەكترون-2 امبەباپ» قۇرىلعىسىمەن قامتاماسىز ەتىلگەن. قۇرىلعى كۇنىنە 500 شامعا دەيىن قايتا وڭدەيدى. قۇرامىندا سىنابى بار قۇرىلعىنى قايتا وڭدەۋ كەزىندە ول حيميالىق تۇرعىدان زالالسىزداندىرىلادى. كاسىپكەردىڭ ايتۋىنشا, قالدىقتار تاس توسەۋىش شيكىزات رەتىندە قۇرىلىسقا پايدالانىلادى نەمەسە پوليگونعا كومىلەدى. «ەلەكتر ەنەرگياسىن ۇنەمدەگىش شامدار بۇگىندە مەملەكەتتىك مەكەمەلەر بولسىن, قاراپايىم تۇرعىنداردىڭ پاتەرىندە بولسىن, بارلىق جەردە قولدانىستا. قازىرگى ۋاقىتتا ءبىز قالاداعى بىرنەشە مەكەمەلەرمەن كەلىسىمشارت جاساستىق», - دەدى ق.نۇرەكەشوۆ. مۇرات ايتقوجا. دەرەككوز: قىزىلوردا وبلىستىق كاسىپكەرلىك جانە تۋريزم باسقارماسى. فوتو: www.adex.ru.