حاندار تۋى مەن تولە ءبيدىڭ شاپانى استاناداعى ۇلتتىق مۇراجايعا قويىلدى

استانا. 15 مامىر. 2014 جىلدىڭ 6 شىلدەسىندە اشىلعالى وتىرعان, جالپى اۋماعى 74 مىڭ شارشى مەتردى قۇرايتىن ۇلتتىق مۇراجايعا وتكەنىمىز بەن بۇگىنىمىزدەن سىر شەرتەتىن قۇندى جادىگەرلەر اكەلىنە باستادى. بۇل تۋرالى «قازاقپارات» حابارلادى. بۇل جادىگەرلەردىڭ قاتارىنا قازاق حاندارىنىڭ تۋ باسى مەن تولە ءبيدىڭ شاپانى قوسىلدى. شەكپەندى تولە ءبيدىڭ قوجامجارىنان تاراعان ۇرپاقتار كوزدەرىنىڭ قاراشىعىنداي ساقتاپ كەلىپتى. مۇراجايعا اكەلىنگەن شاپان قايتا جاساقتالعان كوشىرمە ەكەن. ۇلتتىق مۇراجايىنىڭ ديرەكتورى دارحان مىڭباي: «مۇراجايعا الماتى وبلىسىنان بىرەگەي قازاقتىڭ كيىز ءۇيى, جامبىل وبلىسى جالعىز وبا قورعانىنان التىن بۇيىمدار جانە پاۆلودار, سولتۇستىك قازاقستان, اقتوبە وبلىستارىنان قۇندى جادىگەرلەر, اندرونوۆ داۋىرىنەن جەتكەن تاريحي قۇندىلىقتار ءتۇسىپ جاتىر. بۇل جادىگەرلەر ءبىزدىڭ مۇراجايىمىزدان ويىپ تۇرىپ ورىن الادى. مۇراجايعا قويىلعان تاريحي قۇندىلىقتار قازاقستاننىڭ وتكەنىن پاش ەتەتىن بىردەن-ءبىر جادىگەرلەردىڭ قاتارىنا قوسىلدى دەۋگە بولادى», – دەدى. ال قازاق حاندارىنىڭ تۋ باسىن الىپ كەلگەن حان تاۋكەنىڭ تىكەلەي ۇرپاعى بەكايدار امىرە: «بۇل تەك قانا ءبىر ساندىقتا جاتپاسىن, ەلدىڭ كوز قۋانىشى بولسىن دەپ, كەشەگى ءبىزدىڭ ەل, ۇلكەن ءبىر مەملەكەت بولعانىمىزدى, ونىڭ تۋى بولعانىن ءبىلدىرۋ ماقساتىندا وسى قۇندى دۇنيەنى استاناعا اكەلىپ وتىرمىز. مەن ءاز تاۋكە حاننىڭ توعىزىنشى ۇرپاعىمىن. اتادان بالاعا مۇرا بولىپ كەلگەن قارا شاڭىراقتا وسى تۋ ساقتالىپ كەلدى. حاننىڭ ۇرپاعى بولعاندىقتان, وسى تۋدىڭ باسى مەنىڭ وتباسىمدا قالعان. ءبىز بۇل تۋدى ەڭ ءبىرىنشى قۇندى زات رەتىندە تورىمىزدە اتالار اماناتى رەتىندە كوزىڭ قاراشىعىنداي ساقتاپ كەلدىك. ونىڭ رەسمي اتاۋى «حاندار تۋى» ەكەنى بەلگىلى, كەيبىرەۋلەر ونى جوشى حاننىڭ تۇسىنان كەلەدى دەيدى, ەندى ءبىرى ونى تاۋكە حاننان كەلە جاتقان تۋ دەسەدى», – دەدى. تۋ باسى مەتاللدان جاسالعان, ءتۇسى - قويۋ قوڭىر, كەيبىر قىرلارىندا سارعىش بولىپ كەلەدى. ونىڭ جالپى بيىكتىگى - 21,5 سم., ۇستىڭگى بولىگى كۇمبەز ءتارىزدى. جولدىباي بازار. دەرەككوز: «قازاقپارات». فوتو: «قازاقپارات».