جاڭادان قۇرىلعان الماتى قالالىق قوعامدىق كەڭەستىڭ جۇمىسىنا جاقىندا ءجۇز كۇن تولدى. كەڭەس توراعاسى التىناي كوبەەۆانىڭ ايتۋىنشا, ۇيىمعا بەلسەندى ازاماتتىق ۇستانىمى, بەلگىلى ءبىر ماسەلەلەردى شەشۋدە ىقپالى بار ادامدار ەنگەن. «بيلىك جۇزەگە اسىراتىن ازاماتتىق قوعام وكىلدەرىنىڭ ۇسىنىستارىنىڭ سانى ارتتى. بۇگىندە قوعامدىق كەڭەستەردىڭ قىزمەتىن اقپاراتتىق قامتۋ دەڭگەيى مەن ساپاسى جاقساردى», دەيدى كەڭەس توراعاسى.
بيىل قۇرىلعان قوعامدىق كەڭەستىڭ قۇرامىنا 39 ادام كىرگەن. ونىڭ ىشىندە ۇكىمەتتىك ەمەس ۇيىمدار مەن باق وكىلدەرىنەن – 20 (51,3%), ءبىلىم بەرۋ سالاسىنان – 5 (10,2%), مەملەكەتتىك ورگانداردان – 3 (7,7%), دەنساۋلىق ساقتاۋ سالاسىنان – 1 (2,6%), مادەنيەت جانە سپورتتان – 3 (7,7), بيزنەس قۇرىلىمداردان 7 (20,5%) ادام بار.
باق وكىلدەرىنىڭ قاتىسۋىمەن وتكەن بريفينگتە التىناي كوبەەۆا ءىىى شاقىرىلىمداعى قوعامدىق كەڭەستىڭ قىزمەتىنە كەڭىنەن توقتالدى. «كەڭەس قىزمەتى بۇگىندە ازاماتتاردى تولعاندىراتىن ماسەلەلەردى شەشۋدە اۋقىمدى جۇمىس اتقارىپ كەلەدى. مۇنى ناقتى ىستەردەن-اق كورۋگە بولادى. قوعامدىق كەڭەس بيلىك پەن ازاماتتىق قوعام اراسىن بايلانىستىرۋشى بۋىن رەتىندە ارەكەت ەتىپ, سول ارقىلى جۇرتشىلىق پەن بيلىكتىڭ ءتيىمدى ديالوگىن قۇرىپ كەلەدى», دەپ اتاپ ءوتتى ول.
قوعامدىق كەڭەستىڭ بيۋدجەت جوباسىن, ونىڭ ورىندالۋى تۋرالى ەسەپتى, ستراتەگيالىق دامۋ جوسپارلارىن, ازاماتتاردىڭ قۇقىقتارى مەن بوستاندىقتارىن قوزعايتىن نورماتيۆتىك-قۇقىقتىق اكتىلەردى تالقىلاۋدان باستاپ, وكىلەتتىكتەردىڭ ۇلكەن توبى بار ەكەنىن ەسكەرە وتىرىپ, ناقتى جانە پاندىك قىزمەتتى قامتاماسىز ەتۋ ءۇشىن بەس كوميسسيا قۇرىلعان. بۇل توپتىڭ ارقايسىسىنىڭ ءوز جاۋاپكەرشىلىك ايماعى بار.
وسى ۋاقىتقا دەيىن كەڭەس قوعامدىق باقىلاۋ نىساندارىن پايدالانا وتىرىپ, قوعامدىق مونيتورينگ, قوعامدىق تىڭداۋ, قوعامدىق ساراپتاما, مەملەكەتتىك ورگانداردىڭ ەسەپتى كەزەڭدەگى ەسەپتەرىن تىڭداۋ, 25 وتىرىس وتكىزگەن بولسا, وسى باسقوسۋلاردا ۇزىن سانى 62 ماسەلە قارالعان. سونىمەن قاتار قۇقىقتىق اكتىلەرگە 17 قوعامدىق مونيتورينگ پەن 30 قوعامدىق ساراپتاما جۇرگىزىلىپتى. جالپى, 100 كۇندىك جۇمىس بارىسىندا كەڭەس سۇرانىسى بويىنشا قالالىق باسقارمالار اتقارعان جۇمىستار مەن بيۋدجەت قاراجاتىنىڭ يگەرىلۋى تۋرالى 14 ەسەپ بەرىلىپ, جەكە جانە 77 زاڭدى تۇلعالاردان 58 ءوتىنىش, 80 سۇرانىس جىبەرىلگەن. سونداي-اق ءارتۇرلى مەكەمەلەرگە جىبەرىلگەن ۇسىنىس, تالاپ-تىلەكتەر تاعى بار.
التىناي كوبەەۆانىڭ ايتۋىنشا, جيىنداردا اۋقىمدى ماسەلەلەر دە, جەرگىلىكتى سيپاتتاعى وزەكتى ماسەلەلەر دە تالقىلانادى. «اتقارۋشى ورگاندار قابىلدايتىن نورماتيۆتىك-قۇقىقتىق اكتىلەرگە جۇرگىزىلگەن مونيتورينگ ناتيجەلەرى بويىنشا قوعامدىق كەڭەس مۇشەلەرى ءوز قورىتىندىلارى مەن ۇسىنىمدارىن بۇل اكتىلەردىڭ تۇرعىنداردىڭ نەگىزگى بولىگىنىڭ مۇددەسىنە قايشى كەلمەۋىن, ال قالالىق قىزمەتتەر ۇسىناتىن جانە قالىڭ جۇرتشىلىقتىڭ تالابى اراسىنان مامىلە تابۋ كەرەكتىگىن ەسكەرە وتىرىپ دايىندادى», دەيدى سپيكەر.
قوعامدىق مونيتورينگ اسا وتكىر سۇراقتاردى دا قامتىعان كورىنەدى. بۇلار – كوشە-جول جەلىسىن دامىتۋ, قوعامدىق كولىك جۇمىسى, تۇرعىن ءۇي قۇرىلىسى, مەديتسينالىق قىزمەت كورسەتۋ, بالالار مەن جاسوسپىرىمدەر ءۇشىن سپورت سەكتسيالارىنىڭ قولجەتىمدىلىگى, تۇرعىن ءۇي-كوممۋنالدىق شارۋاشىلىقتاعى رەفورمالار, «مىندەتتى الەۋمەتتىك مەديتسينالىق ساقتاندىرۋ تۋرالى» زاڭىن ىسكە اسىرۋ ماسەلەلەرى, كولىكتىك قىزمەت كورسەتۋ ماسەلەلەرى مەن كارىز جەلىلەرىنىڭ جاعدايى, قالانىڭ كوممۋنالدىق مەنشىگىن پايدالانۋ, جاسىل جەلەكتەردىڭ جاي-كۇيى جانە كۇتىپ-ۇستاۋ سىندى ماسەلەلەر.
ەسەپتىك كەزەڭدە قوعامدىق كەڭەستىڭ كوشپەلى وتىرىستارى دا ۇيىمداستىرىلىپ, «قازاقستان رەسپۋبليكاسىندا قوعامدىق كەڭەستەر اپتالىعىن ۇيىمداستىرۋ جانە وتكىزۋ» تۇجىرىمداماسى اياسىندا الماتىدا مونيتورينگتىك توپتىڭ جۇمىس كەزدەسۋلەرى ءجۇرىپ جاتىر.
ء«بىز قالانىڭ سەگىز اۋدانىندا 5 ديالوگ الاڭىن وتكىزدىك. نەگىزگى ماسەلەلەرگە – شاعىن جانە ورتا بيزنەس باعدارلامالارىن ىسكە اسىرۋ شارتتارىن ۇيىمداستىرۋ مەن جەتىلدىرۋ, قالاداعى قوقىستاردى شىعارۋ, قاتتاۋ مەن شىعارۋدى باقىلاۋ, م ۇلىك يەلەرىنىڭ بىرلەستىگى جانە پت قۇرۋ ءۇشىن تۇرعىن ءۇي قاتىناستارىنىڭ جاڭا جاعدايلارىنىڭ پروبلەمالارى, حالىقتىڭ الەۋمەتتىك وسال توپتارىن مەملەكەتتىك قولداۋ باعدارلامالارىنىڭ تيىمدىلىگىن انىقتاۋعا تالداۋ مەن مونيتورينگ جۇرگىزۋ جاتادى», دەيدى ا.كوبەەۆا.
مۇنان بولەك قالالىق دەڭگەيدە الەۋمەتتىك قىزمەت كورسەتۋ مەن مەملەكەتتىك باسقارۋ سالاسىن تسيفرلاندىرۋ ماسەلەلەرى بويىنشا پارلامەنت ءماجىلىسى جانە ءماسليحات دەپۋتاتتارىمەن بىرگە جۇمىس كەزدەسۋلەرى وتكەن. مۇنداي باسقوسۋلاردىڭ اراسىندا الماتى قالاسى بويىنشا مەديتسينالىق-الەۋمەتتىك ساراپتاما كوميسسيالارىنىڭ قىزمەتىن ۇيىمداستىرۋ جانە مونيتورينگ جۇرگىزۋ جونىندەگى مونيتورينگتىك توپتىڭ وتىرىستارى بار. وسى ءىس-شارالاردىڭ قورىتىندىسىنا سايكەس الماتى قالالىق قوعامدىق كەڭەسى قالا اكىمدىگى مەن ۇكىمەت باسشىسى ءاليحان سمايىلوۆقا ۇسىنىستار جولدادى.
الماتى
