وسىناۋ ايتۋلى وقيعاعا وراي, قر ۇلتتىق ۇلانى «وڭتۇستىك» وڭىرلىك قولباسشىلىعى قولباسشىسىنىڭ ورىنباسارى پولكوۆنيك نيازتاي الكەشەۆ باستاعان اسكەري قىزمەتشىلەر مەن ارداگەرلەر كەڭەسىنىڭ توراعاسى, زاپاستاعى پولكوۆنيك اساتۋللا قۇلاحمەتوۆ عاسىر كۋاگەرىنىڭ شاڭىراعىنا بارىپ, عيبراتتى عۇمىر يەسىن قۇتتىقتادى.
قارت جاۋىنگەردىڭ قۇرمەتى ءۇشىن 5571 اسكەري ءبولىمىنىڭ وركەسترى سوعىس جىلدارىنداعى اندەردى ورىندادى. ال ۇلاندىق جاۋىنگەرلەر ءوز كەزەگىندە ارداگەرگە قۇرمەت كورسەتىپ سالتاناتتى شەرۋمەن ءجۇرىپ ءوتتى.
– بۇگىن ءبىز, ۇلتتىق ۇلاننىڭ اسكەري قىزمەتشىلەرى ۇلى وتان سوعىسىنىڭ ارداگەرى, اتى اڭىزعا اينالعان پانفيلوۆ ديۆيزياسىنىڭ سولداتى قايىرلى ۋاتاي ۇلى جونقاباەۆتى قۇتتىقتاۋعا كەلدىك. اياۋلى ارداگەرلەرگە قۇرمەت كورسەتۋ – ءداستۇرىمىز. ءبىز ولاردىڭ وتانعا جانقيارلىقپەن قىزمەت ەتۋىنىڭ, سوعىس جىلدارىنداعى كوزسىز ەرلىكتەرىنىڭ ۇلگىسىندە وسكەلەڭ ۇرپاقتى تاربيەلەيمىز. وكىنىشكە قاراي, جىل وتكەن سايىن ارداگەرلەرىمىز ازايىپ كەلەدى. سوندىقتان ءبىز ولاردى نازاردان تىس قالدىرماي, قامقورلىق تانىتىپ كوڭىلدەرىن اۋلاۋعا تىرىسامىز, – دەدى «وڭتۇستىك» وڭىرلىك قولباسشىلىعى قولباسشىسىنىڭ ورىنباسارى پولكوۆنيك نيازتاي الكەشەۆ.
وسكەلەڭ ۇرپاق ءۇشىن قايىرلى ۋاتاي ۇلى 1921 جىلى 10 قىركۇيەكتە شىعىس قازاقستان وبلىسى سامار اۋدانىندا دۇنيەگە كەلگەنىن ەسكە سالا كەتۋ ءلازىم. ەڭبەك جولىن 1940 جىلى شقو قۇلجا ورتا مەكتەبىندە مۇعالىم بولىپ باستاعان بۇگىنگى ارداگەر 1941 جىلى قازان ايىندا پانفيلوۆ ديۆيزياسىنىڭ 23-ءشى گۆارديالىق پولكىنە قىزىل اسكەر جاۋىنگەرى بولىپ الىنادى.
قايىرلى ۋاتاي ۇلى سوعىسقا باسىنان اياعىنا دەيىن قاتىسقان. 8-گۆارديالىق اتقىشتار ديۆيزياسى قۇرامىندا پۋلەمەتشى بولعان, كەڭەس وداعىنىڭ باتىرى مالىك عابدۋللينمەن ءبىر روتادا اسكەري بورىشىن وتەگەن. بەلورۋسسيا, پولشا, ەستونيانى ازات ەتۋگە قاتىسادى. 1943 جىلى اقپاندا رجەۆتەگى قاندى مايداندا اۋىر جارالانعان, جەڭىستى درەزدەندە قارسى الادى.
ۇلى وتان سوعىسىندا كورسەتكەن ەرلىكتەرى ءۇشىن «قىزىل جۇلدىز», جانە ءىى دارەجەلى «وتان سوعىسى» وردەنىمەن, «ەرلىگى ءۇشىن», «ماسكەۋدى قورعاعانى ءۇشىن» سياقتى باسقا دا مەدالدارمەن ماراپاتتالعانىن ايتا كەتۋ كەرەك.
سوعىس اياقتالعاننان كەيىن ول كىسى سامار اۋداندىق اتقارۋ كوميتەتىندە ءبولىم مەڭگەرۋشىسى قىزمەتىن اتقارىپ, ءارى قاراي اۋداندىق تۇتىنۋشىلار وداعى جۇيەسىندە باسشىلىق لاۋازىمداردا قىزمەت اتقارىپ, 1983 جىلى قۇرمەتتى ەڭبەك دەمالىسىنا شىعادى. بەس بالا تاربيەلەپ وسىرگەن ارداگەر بۇگىندە ءۇبىرلى-ءشۇبىرلى اۋلەتتىڭ اتاسى.
الماتى
