تاپسىرمالار ماڭىزى جوعارى

قورعانىس ءمينيسترى سەرىك احمەتوۆ «وڭتۇستىك» وڭىرلىك قولباسشىلىعى اسكەرلەرىندە جۇمىس ساپارىمەن بولدى, دەپ حابارلادى قورعانىس مينيسترلىگىنىڭ ءباسپاسوز قىزمەتى. لۋگوۆوي بەكەتىندە س.احمەتوۆ دەربەس موتواتقىشتار باتالونىمەن, سونداي-اق, تانك باتالونىمەن تانىستى. ب.مومىش ۇلى كەنتىندە شو­­­عىر­لانعان قازاقستانداعى ءبىر­دەن-ءبىر دەربەس تاۋ-ەگەرى پول­كىندە بولدى. تارازدا مينيستر «وڭتۇستىك» وڭىرلىك قولباسشىلىعى اسكەرلەرى قولباسشىسىنىڭ باسقارماسىندا, دەربەس تاۋ-اتقىشتارى قۇراماسىندا جانە گارنيزوندىق اسكەري گوسپيتالدە بولدى. جامبىل وبلىسى قورعانىس ىستەرى دەپارتامەنتىنىڭ جيىن پۋنكتىندە بولعان قورعانىس ۆەدومستۆوسىنىڭ باسشىسى اسكەرگە شاقىرۋ ناۋقانى بارىسىمەن تانىسىپ, جاستاردى ساپالى ىرىكتەۋ تۋرالى ناقتى تاپسىرمالار قويدى. س.احمەتوۆ تاراز گارني­زونىنداعى ءبولىم كومانديرلەرىمەن بولعان كەڭەستە مەملەكەت باسشىسى نازار اۋدارىپ وتىرعان ەلىمىزدىڭ وڭتۇستىگىندە اسكەري قاۋىپسىزدىكتى قامتاماسىز ەتۋ جونىندەگى تاپسىر­مالاردىڭ ماڭىزدىلىعىن اتاپ ءوتىپ, اسكەرلەردىڭ دايارلىق ساپاسى مەن اسكەري قىزمەتشىلەردىڭ ماشىعىن ارتتىرۋ ماسەلەلەرىنە ەرەكشە توقتالدى. قورعانىس ءمينيسترى قارۋلى كۇشتەردىڭ جوعارعى باس قولباسشىسى قويعان تاپسىرمالاردى تابىستى ورىنداۋ ءۇشىن قاجەتتى جاعدايدىڭ ءبارى جاسالعانىن اتاپ ءوتتى. س.احمەتوۆ اسكەرلەردىڭ جاۋىن­گەرلىك جانە جۇمىلدىرۋ دايارلىعىن جوعارى دەڭگەيدە ۇستاپ تۇرۋدىڭ, كاسىبي جانە جاۋىنگەرلىك دايارلىق ساپاسىن ارتتىرۋدىڭ, جوعارى اسكە­ري ءتارتىپ پەن قۇقىق ءتارتىبىن قامتا­ما­سىز ەتۋدىڭ قاجەتتىلىگىن اتاپ ءوتىپ, وڭىرلىك قولباسشىلىق باسشى­لىعى­نا شالعايداعى ءبولىم­دەر مەن ءبو­لىمشەلەرگە, اسكەري قىز­مەت­شى­لەر­دىڭ قىزمەتى مەن تۇرمىسىنا ايرىق­شا كوڭىل ءبولۋ تۋرالى تاپسىرما بەردى.