– بۇل زەرتحانانى اشۋداعى ماقساتىمىز – ايماقتاعى ارحەولوگيالىق قازبا ورىندارىن زەرتتەۋ, جاستاردى عىلىمي زەرتتەۋلەرگە تارتۋ, ولاردىڭ ارحەولوگيا مەن تاريحقا دەگەن قىزىعۋشىلىعىن ارتتىرۋ. ويتكەنى ءبىزدىڭ ۋنيۆەرسيتەتىمىز ارحەولوگيالىق قازبا جۇمىستارىن جۇرگىزۋگە ارنايى ليتسەنزياسى بار جوعارى وقۋ ورىندارىنىڭ قاتارىنا كىرەدى. ۋنيۆەرسيتەتتىڭ ارحەولوگتەرى اتىراۋ وبلىسىنىڭ اۋماعىندا ارحەولوگيالىق زەرتتەۋلەر جۇرگىزۋگە ۇلەسىن قوسىپ كەلەدى. ولار جاز ماۋسىمىندا ەجەلگى سارايشىق قالاسىنىڭ ورنىندا جۇرگىزىلگەن قازبا جۇمىستارىنا قاتىستى. قازبا جۇمىستارى كەزىندە كوپتەگەن قۇندى جادىگەر تابىلدى. سول سەبەپتەن, جاڭا ارحەولوگيالىق وقۋ-ادىستەمەلىك زەرتحانا ستۋدەنتتەر مەن جاس عالىمداردىڭ ارحەولوگيالىق نىسانداردى زەرتتەۋىنە, قۇندى جادىگەرلەردى تابۋىنا جول اشادى, – دەيدى س.يدريسوۆ.
بىلتىر ۋنيۆەرسيتەتتىڭ ارحەولوگيا ەكسپەديتسياسى قىزىلقوعا اۋدانىنداعى مۇقىر اۋىلدىق وكرۋگىنىڭ اۋماعىندا ورنالاسقان تەمىر داۋىرىنە جاتاتىن قورعاندارعا زەرتتەۋ جۇرگىزگەن. سول ەكسپەديتسياعا جەتەكشىلىك ەتكەن تاريح عىلىمدارىنىڭ دوكتورى سايفوللا ساپانوۆتىڭ ايتۋىنشا, ءبىر قورعاننان ءۇش جاۋىنگەردىڭ سۇيەگى تابىلعان. ءبىرىنىڭ جانىندا قارۋ-جاراقتارى مەن ەكى مىڭ جىل بۇرىنعى قۇمىرا, ءتورت قويدىڭ سۇيەگى, نايزا, پىشاق, ءبىر قوراپ جەبە بولعان.
– ءبىر قورعاندا ءۇش ادامنىڭ جەرلەنۋى سيرەك كەزدەسەدى. مۇنى ءبىز سارمات داۋىرىندەگى جاۋىنگەرلەر دەگەن تۇجىرىم جاسادىق. ءبىر جاۋىنگەردىڭ وڭ قولى بىلەك تۇسىنان كەسىلگەن, – دەيدى س.ساپانوۆ.
اتىراۋ وبلىسى
