قۇتتىقتاۋ ءسوز العان عىلىم جانە جوعارى ءبىلىم ۆيتسە-ءمينيسترى تالعات ەشەنقۇلوۆ: «بيىلعى ءتىل مەرەكەسىنىڭ حالقىمىزدىڭ جازۋ مادەنيەتىنىڭ جاڭا دەڭگەيگە كوتەرگەن, قازاق ءالىپبيىنىڭ نەگىزىن سالۋشى, ۇلت ۇستازى, ەلىمىزدىڭ ازاتتىعى ءۇشىن كۇرەسكەن الاش كوسەمى, احمەت بايتۇرسىن ۇلىنىڭ 150 جىلدىق مەرەيتويى اياسىندا ءوتۋى ۇلت رۋحىن كوتەرەتىن رۋحاني سەرپىلىس بولدى. سەبەبى كەزىندە كەمەڭگەر مۇحتار اۋەزوۆ: «وقىعان ازاماتتىڭ تۇڭعىشى, العاشقى شىققان كوسەمى» دەپ باعالاعان احمەت بايتۇرسىن ۇلىنىڭ سان سالالى اسىل مۇراسى عىلىمنىڭ سارا جولىن اشىپ, مادەنيەتىمىزدى جاڭا بيىكتەرگە كوتەرسە, سىزدەر بۇگىن سول الاش زيالىلارى باستاعان ۇلت ءباسپاسوزىنىڭ ءداستۇرىن ءساتتى جالعاستىرىپ, رۋحاني مادەنيەتىمىزدىڭ اجىراماس بولىگى – مەملەكەتتىك ءتىلىمىزدى ناسيحاتتاۋعا, ونىڭ قولدانىس اياسىن كەڭەيتۋگە ۇلكەن ۇلەس قوسىپ كەلەسىزدەر», دەدى.
بيىل 75 قاتىسۋشىدان 153 ماتەريال ۇسىنىلدى. ءبىر ەرەكشەلىگى, ەلىمىزدەگى جانە شەتەلدەردەگى اقپاراتتىق كەڭىستىكتەگى بۇقارالىق اقپارات قۇرالدارىندا جاريالانعان مەملەكەتتىك ءتىلدىڭ قولدانىس اياسىن كەڭەيتۋ ماقساتىندا احمەت بايتۇرسىن ۇلىنىڭ شىعارماشىلىق مۇراسىنا بايلانىستى مەملەكەتتىك جانە ورىس, اعىلشىن تىلدەرىندە جازىلعان ماتەريالداردى قابىلداۋ ەنگىزىلگەنى, الدىڭعى جىلدارمەن سالىستىرعاندا قازاق تىلىنە قاتىستى ماسەلەلەرگە قالام تەربەيتىن جۋرناليستەر قاتارىن كوبەيتتى. سولاردىڭ ىشىنەن جەڭىمپاز بەن جۇلدەگەرلەردى انىقتاۋعا ءماجىلىس دەپۋتاتتارى, دارحان مىڭباي مەن جاناربەك ءاشىمجان, قارىمدى قالامگەر, بەلگىلى جۋرناليست قاينار ولجاي, ءال-فارابي اتىنداعى قازاق ۇلتتىق ۋنيۆەرسيتەتىنىڭ پروفەسسورى, فيلولوگيا عىلىمدارىنىڭ دوكتورى نامازالى وماشەۆ, ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتى «تەلەراديو جانە قوعاممەن بايلانىس» كافەدراسىنىڭ مەڭگەرۋشىسى, فيلولوگيا عىلىمدارىنىڭ كانديداتى, دوتسەنت سەرىكزات دۇيسەنعازين قازىلىق ەتتى. ولار جۇزدەن وزعان جۇيرىكتى تاڭداۋ وڭايعا تۇسپەگەنىن جەتكىزدى. قىزۋ تالقىلاۋ, تەرەڭ تالداۋدىڭ ناتيجەسى بويىنشا باس جۇلدەنى جامبىل وبلىستىق «ار-اي» جاستار گازەتىنىڭ ءتىلشىسى ءابدىر شاپاعات جەڭىپ الىپ, وعان 1 000 000 تەڭگەنىڭ سەرتيفيكاتى تابىس ەتىلدى.
«ۇزدىك ماقالا» نوميناتسياسى بويىنشا: ءى ورىن رەسپۋبليكالىق «جاس الاش» قوعامدىق-ساياسي گازەتىنىڭ ءتىلشىسى بيفات ەلتاەۆاعا, ءىى ورىن «Egemen Qazaqstan» گازەتىنىڭ اعا ءتىلشىسى ايدانا شوتبايقىزىنا, ءىىى ورىن «تولەبي تۋى» قوعامدىق-ساياسي گازەتى رەداكتسياسىنىڭ ءبولىم مەڭگەرۋشىسى تولەگەن احمەتوۆكە بۇيىردى.
«ۇزدىك تەلە جانە راديوباعدارلاما» نوميناتسياسى بويىنشا: ءى ورىندى «جەتىسۋ راديوسىنىڭ» باس رەداكتورى مۇحيت توقتاسىن, ءىى ورىندى قازاق راديوسىنىڭ شولۋشى رەداكتورى شاكىم جانبولات, ءىىى ورىندى «Qyzylorda» تەلەارناسىنىڭ شەف-رەداكتورى تولقىن قابىلشا جەڭىپ الدى.
«ۇزدىك سايت» نوميناتسياسى بويىنشا ناتيجە مىناداي بولىپ شىقتى:
ءى ورىن – رەسپۋبليكالىق «ايقىن» گازەتىنىڭ ءتىلشىسى قارقىن كوكتەم, ءىى ورىن – حالىقارالىق «تۇركىستان» گازەتىنىڭ شتاتتان تىس ءتىلشىسى احمەر ءبىرجان, ءىىى ورىن – قازاقستان ۇلتتىق قۇراماسىنىڭ ءباسپاسوز حاتشىسى ەرمۇحامەد ماۋلەن يەلەندى.
بۇل ءۇش نوميناتسيا بويىنشا دا ءبىرىنشى ورىن يەگەرىنە – 500 000 تەڭگە; ەكىنشى ورىنعا – 400 000 تەڭگە; ءۇشىنشى ورىنعا – 300 000 تەڭگە اقشالاي سىيلىق تابىس ەتىلدى. ىنتالاندىرۋ سىيلىعىنا 12 قاتىسۋشى يە بولدى. ولاردىڭ ارقايسىسىنا 100 مىڭ تەڭگە تابىستالادى.
وسىلايشا, ءداستۇرلى بايقاۋ ءوز مارەسىنە جەتىپ, ناعىز جۇيرىكتەر توپ جارىپ شىقتى. ۇلت ۇستازى ءوزىنىڭ 1913 جىلعى ء«بىلىم جارىسى» دەگەن ماقالاسىندا: «نەشە ءتۇرلى عىلىم, ونەر – ءبارى دە تىرشىلىكتىڭ اۋىرلىعىن ازايتۋ ءۇشىن, راقاتىن مولايتۋ ءۇشىن شىعارعان نارسەلەر. عىلىم, ونەر ارتىلعان سايىن, ءدۇنيادا بەينەت كەمىمەكشى. وسىعان اقىلى جەتىپ, ەسى ەنگەن جۇرتتار عىلىم مەن ونەردى بىردەن-بىرگە اسىرۋعا تىرىسادى. اسىرۋ ءۇشىن ءارتۇرلى ىستەر ىستەيدى. سول ىستەردىڭ ءبىرى – ءبىلىم جارىسى», دەپ جازعان ەكەن.
سول ايتقاندايىن, احاڭنىڭ اياۋلى ەسىمىن ۇلىقتاپ, انا ءتىلىمىزدىڭ ابىرويىن اسقاقتاتۋدا بۇل جولعى بايقاۋدىڭ ءرولى ايرىقشا بولدى.
