سونىمەن قاتار ءتىلسىز جاۋدان كوبىرەك جاپا شەككەن ءۇش اۋىلدىڭ تۇرعىندارىنىڭ تەلەكوممۋنيكاتسيا قىزمەتىنە قاتىستى بەرەشەگى مەن ءوسىمپ ۇلى كەشىرىلەتىن بولدى.
– زارداپ شەككەندەرگە مۇمكىندىگىنشە تەزىرەك قالىپتى ومىرگە ورالۋىنا كومەكتەسۋ ءۇشىن قولىمىزدان كەلگەننىڭ ءبارىن جاساۋعا دايىنبىز. وسىعان بايلانىستى كومپانيا باسشىلىعى وسى جىلدىڭ سوڭىنا دەيىن بايلانىس قىزمەتتەرى ءۇشىن تولەمدەردى توقتاتا تۇرۋ جانە ابونەنتتەردىڭ قارىزدارى مەن قىزمەتتەردى ۋاقتىلى تولەمەگەنى ءۇشىن سالىناتىن ءوسىمپۇلدى جويۋ تۋرالى شەشىم قابىلدادى, – دەيدى «قازاقتەلەكوم» اق باسقارما توراعاسى قۋانىشبەك ەسەكەەۆ.
بۇل جەردە ورمان ورتىنەن زارداپ شەككەن اۋليەكول اۋدانىنىڭ ءۇش اۋىلى – وزەرنوە (8 ءۇي زارداپ شەككەن), لەسنوە (1 ءۇي جانىپ كەتكەن) جانە امانقاراعاي (98 ءۇي وتقا ورانعان) اۋىلدارىنىڭ تۇرعىندارىنا جەڭىلدىكتەر قاراستىرۋ تۋرالى ءسوز بولىپ وتىر. بۇل رەتتە ابونەنتتەردىڭ تەلەكوممۋنيكاتسيا قىزمەتىنە بەرەشەگى مەن ءوسىمپ ۇلى تولىقتاي كەشىرىلەدى. سونداي-اق ءورت سالدارىنان زاقىمدانعان بارلىق كليەنتتىك جابدىقتار ەسەپتەن شىعارىلادى جانە قاجەت بولعان جاعدايدا كومپانيانىڭ ەسەبىنەن وسى ەلدى مەكەندەردىڭ ابونەنتتەرىنە وتەۋسىز اۋىستىرىلادى. سونىمەن قاتار «قازاقتەلەكوم» ماماندارى وسى ءۇش ەلدى مەكەندەگى بايلانىس جەلىلەرىن قالپىنا كەلتىرۋ ماسەلەسىمەن اينالىسۋدا. سەبەبى ءتىلسىز جاۋدان جەلىلەر جۇرەتىن تىرەكتەر دە زارداپ شەككەن.
– امانقاراعاي جانە وزەرنوە اۋىلىندا ءورت سالدارىنان تۇرعىن ۇيلەردىڭ جانىندا ورنالاسقان 50-گە جۋىق بايلانىس جەلىلەرىنىڭ تىرەكتەرى جانىپ كەتكەن. جالىن 3 شاقىرىمعا جۋىق سىيىمدىلىعى ءارتۇرلى كابەلدەردى جارامسىز ەتكەن. «قازاقتەلەكوم» اق قىزمەتكەرلەرى قۇتقارۋ جۇمىستارىنا تىكەلەي قاتىستى جانە ورمان ورتتەرىنەن زارداپ شەككەن ەلدى مەكەندەردى جالپى قالپىنا كەلتىرۋ شارالارى باستالعان كەزدە بايلانىس جەلىلەرىن جوندەۋ جۇمىستارىن جۇرگىزۋگە دايىن. قوستاناي وبلىسىندا ءالى دە ورمان ورتتەرى جالعاسىپ جاتقانىن ءتۇسىنۋ كەرەك. سوندىقتان ءبىز ازىرگە ءورت توقتاتىلعان ەلدى-مەكەندەردەگى شىعىنداردى عانا باعالاي الامىز. بايلانىس جەلىلەرىن قالپىنا كەلتىرۋ بويىنشا جۇمىستار وڭىردە بۇدان دا اۋقىمدى بولۋى مۇمكىن, – دەيدى «قازاقتەلەكوم» اق «جەلى» ديۆيزيونى بىرلەستىگىنىڭ ساپا جونىندەگى ديرەكتورى شىڭعىس قۇسقامباسوۆ.
