ءتىلسىز جاۋدى اۋىزدىقتاۋعا كۇش جەتكىلىكتى
جەدەل شتاب ساعات 5 قىركۇيەك, ساعات 12:00-دە «باعانالى اۋىلىن ورتتەن قورعاپ قالۋ ءۇشىن ءورت ءسوندىرۋ جاساقتارى مەن ارنايى تەحنيكا كۇشتەرى قايتا توپتاستىرىلدى. ورماننىڭ 4-ءشى جانە 8-ءشى كۆارتالىندا ءورت بولىپ جاتىر. جەرگىلىكتى اتقارۋشى ورگاندار قازانباسى اۋىلدىق وكرۋگىنە قاراستى باعانالى ەلدى مەكەنىنىڭ 11 تۇرعىنىن ەۆاكۋاتسيالادى. ولاردىڭ ىشىندە 2 بالا بار. ءورت ءسوندىرۋ جۇمىستارىنا 50 تەحنيكا, ۇلتتىق ۇلان اسكەريلەرى, ەرىكتىلەر مەن اۋىل تۇرعىندارى تارتىلدى», دەپ حابارلادى.
«قازىرگى تاڭدا 6 ۇشاق ءورت ءسوندىرۋ جۇمىستارىنا تارتىلعان. ونىڭ تورتەۋى توتەنشە جاعدايلار مينيسترلىگىنە, ەكەۋى قورعانىس مينيسترلىگىنە تيەسىلى, كۇش جەتكىلىكتى. تەك قازىر سۋ كوزدەرىن ىزدەۋدە قيىندىقتار سەزىلۋدە. قاجەت بولسا, سۋ تاسيتىن كولىكتەرمەن قوسىمشا سۋ جەتكىزەمىز. ويتكەنى اعاش باسىنداعى جالىندى مەيلىنشە تەجەۋ ءۇشىن تىكۇشاقتاردى ۋاقتىلى سۋمەن قامتاماسىز ەتۋ كەرەك. وسىلايشا ساناۋلى كۇندەردىڭ ىشىندە ءورتتى تولىقتاي اۋىزدىقتاۋ جوسپارلانىپ وتىر», دەدى توتەنشە جاعدايلار ءمينيسترى يۋري يلين.
ورشەلەنىپ كەتكەن ءورتتىڭ تەك اۋليەكول وڭىرىنە عانا ەمەس, باسقا اۋداندارعا دا تيگىزگەن زيانى وراسان. مىسالى, وسى اپتادا ليساكوۆ قالاسىنىڭ ىرگەسىندەگى ۇلكەن ساياباق ورتكە وراندى. قوستاناي قالاسىنداعى بىرنەشە بيزنەس نىسانى جانىپ كەتتى.
قارابالىق, ۇزىنكول اۋداندارىنداعى ورمان ۋچاسكەلەرى مەن قۇرعاق ءشوپ القاپتارىن ءورت شالىپ, كوپتىڭ كۇشىمەن دەر كەزىندە ءسوندىرىلدى. قاراسۋ اۋدانىنا قاراستى ليۋبلينسك اۋىلىنداعى التى ءۇي اينالاسى ءبىر جارىم ساعاتتىڭ ىشىندە قىزىل جالىنعا ورانىپ, تۇگەل جانىپ كەتتى. ليۋبلينسك اۋىلدىق وكرۋگىنىڭ اكىمى اندرەي ماكسيموۆتىڭ ايتۋىنشا, ءتىلسىز جاۋ 5 قىركۇيەك كۇنى تاڭەرتەڭ تولىقتاي تىزگىندەلگەن.
– قازىر زارداپ شەككەن التى وتباسى تۋىستارىنىڭ ۇيىنە ورنالاستىرىلدى. بۇل وتباسىلاردىڭ ءبىرىنىڭ ءبىر ۋچاسكەدە ەكى ءۇيى بولعان. ونىڭ بىرەۋى جانىپ كەتكەنىمەن, ەكىنشى ءۇي امان. قازىر ءبىز ورتتەن زارداپ شەككەندەردىڭ مۇلكىن تىزىمدەپ, تەزىرەك وتەماقى بەرۋ جۇمىستارىمەن اينالىسىپ جاتىرمىز. تاياۋ ارادا ورتتەن كەلگەن شىعىن مولشەرىن ەسەپتەپ, كومەك كورسەتۋىمىز كەرەك. كەيبىر تۇرعىنداردىڭ قۇجاتتارى ورتەنىپ كەتكەن. بۇل دا ءبىراز قيىندىق تۋعىزادى, – دەدى اكىم.
گۋمانيتارلىق كومەك كورسەتىلۋدە
اۋليەكول اۋىلىنداعى «بولاشاق» سپورت كەشەنىندە ورتتەن زارداپ شەككەن تۇرعىندارعا گۋمانيتارلىق كومەك كورسەتىلىپ جاتىر. توتەنشە جاعداي مينيسترلىگىنىڭ اسكەري كۇشتەرى اۋليەكولدىڭ ىرگەسىندەگى نوۆونەجەن اۋىلىندا پالاتكالار تىگىپ, باسپاناسىز قالعانداردى ورنالاستىرۋدا. ءماجىلىس دەپۋتاتتارىنىڭ باستاماسىمەن نۇر-سۇلتان قالاسىندا دا اۋليەكول جۇرتىنا جىلۋ جينالىپ جاتقانىن ەستىدىك. رەسپۋبليكالىق جەدەل شتاب وكىلدەرى ءورت كەزىندە زارداپ شەككەندەردىڭ قۇجاتتارى كەزەكتەن تىس قالپىنا كەلتىرىلەتىنىن مالىمدەدى.
– تابيعي اپاتتان زارداپ شەككەن اۋداندارداعى حالىققا قىزمەت كورسەتۋ بولىمدەرىنىڭ قىزمەتكەرلەرى كوشى-قون پوليتسياسىنىڭ وكىلدەرىمەن بىرگە ءورت سوندىرۋشىلەرگە كومەك كورسەتۋگە دايىن. جەكە باستى كۋالاندىراتىن قۇجاتتاردى, سونداي-اق جىلجىمالى جانە جىلجىمايتىن م ۇلىككە قاتىستى قۇجاتتاردى قالپىنا كەلتىرۋ ءۇشىن تۇرعىندار حقو-عا جۇگىنۋى قاجەت. قىزمەتكەرلەر ازاماتتارعا تۇسكى ءۇزىلىسسىز قۇجاتتاردى راسىمدەۋگە كومەك كورسەتۋگە دايىن, زارداپ شەككەن ازاماتتاردى قابىلداۋ كەزەكتەن تىس جۇزەگە اسىرىلادى, – دەيدى مەملەكەتتىك كورپوراتسيانىڭ وبلىستىق فيليالىنىڭ ديرەكتورى ميرجان جاڭاباەۆ.
ال ەڭبەك, الەۋمەتتىك قورعاۋ جانە كوشى-قون كوميتەتى ورتتەن زارداپ شەككەن تۇرعىندارعا تيەسىلى الەۋمەتتىك تولەمدەردى دە اۋدارا باستادى.
– رەسپۋبليكالىق بيۋدجەتتەن قىركۇيەك ايىندا بەرىلەتىن زەينەتاقى, جاردەماقى بۇگىن اۋدارىلادى. بۇل رەسپۋبليكالىق دەڭگەيدە شەشىلدى. الەۋمەتتىك تولەمدەر ورتتەن زارداپ شەككەندەرگە عانا ەمەس, اۋداننىڭ بۇكىل تۇرعىندارىنا, باس-اياعى 8 447 ادامعا تولەنەدى. ونىڭ ىشىندە 6 مىڭ زەينەتكەر, 388 كوپبالالى انا بار, – دەدى اتالمىش كوميتەتكە قاراستى وبلىستىق دەپارتامەنت باسشىسى اينۇر ساتاەۆا. مۇنىڭ سىرتىندا, ەڭبەك جانە حالىقتى الەۋمەتتىك قورعاۋ مينيسترلىگى جۇمىسسىز قالعاندارعا اقىلى دەمالىس جاريالاماق.
سونداي-اق وبلىستىق پوليتسيا دەپارتامەنتىنىڭ قىزمەتكەرلەرى دە ءبىر كۇندىك جالاقىسىن ءورت كەزىندە زارداپ شەككەندەرگە كومەك كورسەتەتىن بىرىڭعاي قوعامدىق قورعا اۋدارادى.
– وبلىستىڭ جەكە قۇرامى اۋليەكول اۋدانىنىڭ ءورت سالدارىنان زارداپ شەككەن تۇرعىندارىنا كومەك كورسەتەدى. ءبىز كەز كەلگەن قولداۋدى قاجەت ەتەتىن جەرلەستەرىمىزگە كومەكتەسۋدى ءوزىمىزدىڭ ازاماتتىق پارىزىمىز دەپ سانايمىز, – دەگەن مالىمەت تاراتتى.
قايىرىمدىلىق شارالارىنان Qazaq Oil دا تىس قالعان جوق. اتالمىش كومپانيا قوستاناي وبلىسىندا ءورتتى سوندىرۋگە قاتىسقان تەحنيكالارعا 50 ميلليون تەڭگەگە تەگىن ديزەل وتىنىن بەردى. «قۇرمەتتى جەرلەستەر! «Qazaq Oil» جقس ۇلتتىق جەلىسىنىڭ ۇجىمى قوستاناي وبلىسىنداعى ءورت سالدارىنان قاسىرەتكە دۋشار بولعان جاندارعا شىنايى قولداۋ بىلدىرەتىنىن جەتكىزەدى. ءبىز سىزدەرمەن بىرگەمىز!», دەپ جاناشىرلىق تانىتقان كومپانيا ۇجىمى جۇرتتى سىندارلى ساتتە سابىرلى بولۋعا شاقىردى.
ء«بىز بىرگەمىز» قايىرىمدىلىق اكتسياسى اياسىندا اۋليەكولگە قوستاناي ۇن كومبيناتى, «دەپ», «جاس قانات» قۇس فابريكاسى سياقتى ءىرى كاسىپورىندار دا ازىق-ت ۇلىك جونەلتىپ جاتىر.
– اۋليەكول اۋدانىنداعى الاپات ورتتەن كەيىن ەلىمىزدىڭ تۇكپىر-تۇكپىرىنەن كومەك اعىلىپ جاتىر. بۇل باعىتتا قوستاناي وبلىسىنىڭ كاسىپكەرلەرى مەن وبلىستىق كاسىپكەرلەر پالاتاسى وڭىرلىك كەڭەسىنىڭ وكىلدەرى دە بەلسەندى جۇمىس جۇرگىزۋدە. مۇنداي جاعداي ەشكىمدى بەيجاي قالدىرمايدى. قازىر وڭىردەگى جاعدايدى تۇراقتاندىرۋ بويىنشا بارلىق قاجەتتى شارالار قابىلدانۋدا, – دەدى وبلىستىق كاسىپكەرلەر پالاتاسىنىڭ ديرەكتورى دانيار كۇزەنباەۆ.
د.كۇزەنباەۆتىڭ ايتۋىنشا, وبلىستىق كاسىپكەرلەر پالاتاسى ورتتەن زيان شەككەن بيزنەس نىساندارىنىڭ شىعىنىن ەسەپتەۋ جۇمىستارىن جۇرگىزىپ جاتىر.
قوستاناي وبلىسى
