ايىپپۇل كولەمىن كوبەيتۋ جول اپاتتارىنىڭ ازايۋىنا سەپتىگىن تيگىزەدى

استانا. 13 مامىر. اكىمشىلىك پوليتسيا كوميتەتى جول قوزعالىسى ەرەجەسىن بۇزعاندارعا سالىناتىن ايىپپۇل كولەمىن ۇلعايتۋ قاجەت دەپ ەسەپتەيدى. بۇل تۋرالى «قازاقپارات» حابارلادى. كوميتەت تاراپىنان ايتىلعانداي, جول قوزعالىسى قاۋىپسىزدىگىنە قاتىستى وزگەرىستەر جول-كولىك وقيعالارى مەن ودان جاپا شەگەتىندەردىڭ سانىن كەمىتەدى ءارى جۇرگىزۋشىلەردىڭ  قۇقىقتىق ءبىلىمىن كوتەرەدى. ۆەدومستۆونىڭ كەلتىرگەن دەرەگىنە سۇيەنە سويلەسەك, 2012-2013 جىلدار ارالىعىندا ەلىمىزدە جول ەرەجەلەرىنىڭ بۇزىلۋى كۇرت وسكەن.  وسىدان كەلىپ, جول اپاتىنان قايتىس بولعاندار مەن ءجابىر كورگەندەر سانى ارتقان. 2013 جىلدىڭ وزىندە باقىلاۋ-ولشەۋ تەحنيكالىق قۇرالدارى كومەگىمەن تىركەۋگە الىنعان جول ەرەجەلەرىن بۇزۋ جاعدايلارى شامامەن 90 پايىزعا, وقيعالار 65 پايىزعا, ودان جاراقات العاندار 71 پايىزعا كوبەيگەن. مۇنداي كەلەڭسىزدىكتەردىڭ  90 پايىزى جۇرگىزۋشىلەردىڭ كىناسىنەن بولسا, 600-گە جۋىق وقيعا سپيرتتىك ىشىمدىك ىشكەن ازاماتتاردىڭ كەسىرىنەن, ءاربىر ءتورتىنشى جول-كولىك وقيعاسى تالاپ ەتىلگەن جىلدامدىق مولشەرى ساقتالماعاننان ورىن العان.  سونداي-اق, وتكەن جىلى بارلىق جول اپاتىنىڭ 30 پايىزدان استامى قارسى باعىتقا شىعىپ كەتۋدەن بولعان. ەندى, جۇرگىزۋشى جولدىڭ قارسى باعىتىنا ءوتىپ كەتسە جانە جول پوليتسياسىنىڭ اۆتوكولىكتى توقتاتۋ جونىندەگى زاڭدى تالابىن ورىنداماسا, وندا ول جۇرگىزۋشىلىك كۋالىگىنەن ايىرىلادى. ال جاڭا زاڭناماعا سايكەس, ايىپپۇلدار 1,5-2 ەسەگە, ءتىپتى كەيبىر باپ بويىنشا 3 ەسەگە دەيىن كوتەرىلگەنى بەلگىلى. ايىپپۇلداردىڭ كولەمىن بەلگىلەۋ كەزىندە جول اپاتتارى از بولاتىن ەلدەردىڭ تاجىريبەسى ەسكەرىلىپتى. كوميتەت قىزمەتكەرلەرىنىڭ ايتۋىنشا, جول ەرەجەسىن ساقتاماعاندار ءۇشىن جوعارى ايىپپۇل فينليانديا مەن شۆەيتساريادا سالىنادى ەكەن. بۇل مەملەكەتتەردە ايىپپۇل كولەمىنە شەك قويىلماعان. ويتكەنى, كىنالى جۇرگىزۋشى قانشا ايىپاقى تولەيتىنى ونىڭ  جىلدىق كىرىسىنە بايلانىستى ەكەن. فينليانديادا جىلدامدىقتى  ساقتاماعاندار ءۇشىن سالىناتىن ەڭ از ايىپپۇل  بىر جارىم مىڭ ەۆرونى قۇرايدى  (379 مىڭ تەڭگە), باعدارشامدا "قىزىل" جانىپ تۇرعاندا جۇرگەنى ءۇشىن 90 ەۆرو (شامامەن 23 مىڭ تەڭگە), ال قاۋىپسىزدىك بەلدىگىن تاقپاعانى ءۇشىن 135 ەۆرو (34 مىڭ تەڭگە) تولەيدى. جولدىباي بازار. دەرەككوز: «قازاقپارات». فوتو: mediaovd.kz.