ءتۇسى قارا نەمەسە سۇر اۆتوكولىكتەر كوبىرەك جول اپاتىنا ۇشىرايتىن كورىنەدى

استانا. 13 مامىر. ەلىمىزدەگى ساقتاندىرۋ كومپانيالارىنىڭ ءبىرى 2013 جىلى جول اپاتىنا ۇشىراعان جەڭىل اۆتوكولىكتەرگە قاتىستى ءتۇرلى ستاتيستيكالىق مالىمەتتەرگە سۇيەنە وتىرىپ, جول كولىك وقيعاسىنا مەيىلىنشە كوبىرەك قانداي ءتۇستى ماشينالار تاپ كەلەتىن زەرتتەدى. بۇل تۋرالى «24kz» حابارلادى. زەرتتەۋ ناتيجەسىندە انىقتالعانداي, اق, سارعىش, سارى, فيولەت ءتۇستى اۆتوكولىكتەر كەلەڭسىز جاعدايعا باسقالارعا قاراعاندا ەداۋىر از كەزىگەتىن كورىنەدى. مامانداردىڭ پىكىرىنشە, اق, سارعىش جانە فيولەت ءتۇستى ماشينالار جولدا انىق كورىنەتىندىكتەن اپاتقا سيرەك تۇسەدى ەكەن. ال, جۇرتشىلىققا كوبىرەك ۇنايتىن قارا جانە سۇر ءتۇستى تەمىر تۇلپارلار جول اپاتىنا مەيىلىنشە ءجيى-ءجيى ۇشىرايتىن بولىپ شىققان.  ناقتىلاي ايتقاندا, سۇر قارا ءتۇستى ءاربىر بەسىنشى اۆتوكولىك ءبىر رەت بولسا دا جول كولىك وقيعاسىنا كەزىككەن. ماماندار مۇنى تاڭ اتا ءارى كەش باتقان كەزدە كۇمىس جانە قارا ءتۇستى اۆتوكولىكتەر جول ۇستىندە كوزگە ارەڭ ىلىگەتىنىمەن ءتۇسىندىرىپتى. سول سياقتى, قىزىل اۆتوكولىكتەر دە  قاۋىپتى ەكەن. ويتكەنى, قىزىل كولىكتى ادەتتە جاس جىگىتتەر مەن قىزدار تاڭدايدى. ال, جول اپاتىنا تاپ كەلەتىندەردىڭ كوبىسى وسى توپتاعىلار. كەيبىر دەرەكتەرگە قاراعاندا, ەلىمىز بويىنشا جول-كولىك وقيعاسىنا كىنالى 24 پەن 33 جاس ارالىعىنداعى ەر ازاماتتار جالپى جول اپاتىنىڭ  37 پايىزىن,  قىزدار 38 پايىزىن قۇرايدى. مامانداردىڭ پايىمداۋىنشا, قارا نەمەسە قىزىل ءتۇستى ماشينانى قالايتىن جۇرگىزۋشىلەر ادەتتە جۇيىتكىپ جۇرگەندى جاقسى كورەدى. ءارى سپورتتىق اۆتوكولىكتەردىڭ كوبى قارا نەمەسە قىزىل ءتۇستى كورىنەدى. رەتى كەلگەندە ايتا كەتەيىك, 2013 جىلى ەلىمىز بويىنشا 23 359 جول اپاتى تىركەلىپتى. سونىڭ سالدارىنان 3 مىڭنان اسا ادام قايىس بولىپ, 29 مىڭ جان ءتۇرلى جاراقات العان. جولدىباي بازار. دەرەككوز: «24kz». فوتو: semey.tv.