وتاندىق بانكتەر باسەكەگە دايىن بولۋى قاجەت

استانا. 13 مامىر. 2015 جىلدىڭ مامىرىندا ۇلتتىق بانكى ەلىمىزدىڭ 2020 جىلعا دەيىنگى اقشا-نەسيە ساياساتىنىڭ تۇجىرىمداماسىن ۇسىنادى. ورتالىق كوممۋنيكاتسيالار قىزمەتىندە وتكەن بريفينگتە  ۇلتتىق بانكى توراعاسى قايرات كەلىمبەتوۆ وسىلاي دەدى. بۇل تۋرالى egemen.kz ءتىلشىسى حابارلادى. توراعانىڭ ايتۋىنشا, 2020 جىلعا دەيىنگى اقشا-نەسيە ساياساتىنىڭ نەگىزگى باعىتتارىن كورسەتەتىن اتالمىش قۇجاتتى ۇلتتىق بانكى 2015 جىلدىڭ مامىرىنا قاراي ازىرلەيدى. بۇل تۇجىرىمدامانى جاساردا ەكىنشى دەڭگەيلى بانكتەر, ساقتاندىرۋ ۇيىمدارى جانە قارجى ينستيتۋتتارى قاتىستىرىلادى. سونداي-اق, بريفينگتە قايرات كەلىمبەتوۆ قازاقستاندىق بانكتەر 2019 جىلدىڭ 1 قاڭتارىنان باستاپ «بازەل - III» تالاپتارىن ورىنداۋعا دايىن بولاتىنىن جەتكىزدى. وسىعان بايلانىستى ول: «2015 جىلدىڭ 1 قاڭتارىنان باستاپ بانكتەر «بازەل - III» تالاپتارىنا كوشە باستايدى. العاشقى ءۇش جىلدا ولارعا قويىلار تالاپتار ءىس جۇزىندە وزگەرمەيدى. جالپى, بانكتەر 2019 جىلدىڭ 1 قاڭتارىنا قاراي دايىن بولادى جانە «بازەل - III» قازاقستانعا ەنگىزىلەدى دەپ جوسپارلاپ وتىرمىز», – دەدى. بۇدان بولەك, توراعا ەلىمىزدىڭ بانكتەرى كەز كەلگەن قارجىلىق قۇرىلىمدارعا, اسىرەسە, كەدەن وداعىنا قاتىسۋشى مەملەكەتتەردىڭ قارجى ينستيتۋتتارىنا لايىقتى باسەكەلەس بولۋى قاجەت ەكەنىن اتاپ ءوتتى. «كەدەن وداعى ەلدەرى بانكتەرىنىڭ بىرلەسكەن اكتيۆتەرىندە قازاقستاندىق بانكتەر 5 پايىزعا يە. رەسەي بانكتەرىنىڭ العاشقى جيىرماسىنىڭ ءىرى بىرلەسكەن اكتيۆتەرى ورتا ەسەپپەن العاندا ءبىر بانككە 61 ملرد. دوللاردان تيەدى. ال, الدىڭعى قاتارلى قازاقستاندىق بانكتەردىڭ بىرلەسكەن اكتيۆى – ءبىر بانككە ورتا ەسەپپەن 11 ملرد. دوللاردان كەلەدى. باسەكەگە قابىلەتتىلىك تۋرالى ايتقاندا ءبىز بارىنەن بۇرىن كەدەندىك وداق ەلدەرىنىڭ بانكتەرىمەن باسەكەلەستىككە شىداۋعا دايىن بولۋىمىز كەرەك», – دەدى ول. سونىمەن قاتار, قايرات كەلىمبەتوۆ جۇمىس ىستەمەيتىن قارىزدار ەكىنشى دەڭگەيلى بانكتەردىڭ نەسيە قورجىنىنىڭ 30 پايىزىن نەمەسە شامامەن ۇشتەن ءبىر بولىگىن قۇرايتىنىن, بۇل جاعدايدى رەتكە كەلتىرۋ كەرەكتىگىن ءسوز ەتتى. سونداي-اق, ول ەكىنشى دەڭگەيلى بانكتەرگە بۇرىن سوڭدى بولماعان سالىق جەڭىلدىكتەرى بەرىلەتىنىن دە اتاپ ءوتتى. جولدىباي بازار. دەرەككوز: egemen.kz. فوتو: primeminister.kz.