اتالعان مەكتەپتىڭ بۇل اۋداندا سالىنۋى تەگىن ەمەس. ويتكەنى 400 مىڭداي حالقى بار قالاداعى تۇرعىنداردىڭ باسىم بولىگى شىعىس كەنتىندە تۇرادى. سەمەيگە قونىس اۋداراتىنداردىڭ كوبى تۇرعىلىقتى ورىن رەتىندە ءدال وسى اۋداندى تاڭدايدى. سەبەبى بۇل اۋماق وسىمدىك شارۋاشىلىعىمەن اينالىسقانعا قولايلى.
وبلىس اكىمىنىڭ ورىنباسارى ايدىن كارىموۆ 2025 جىلعا دەيىن وڭىردە 10-نان اسا مەكتەپ سالىناتىنىن جەتكىزدى.
«ەلىمىزدىڭ بارلىق وڭىرىندە وقۋ جىلى باستالدى. سەمەيدە 5 مىڭنان استام وقۋشى مەكتەپكە باردى. ورىن تاپشىلىعىن ازايتۋ ءۇشىن قالادا تاعى 4 مەكتەپ اشىلادى. تۇتاستاي العاندا, 2025 جىلعا دەيىن وبلىستا 11 مەكتەپ اشىلادى دەپ كوزدەلىپ وتىر. شىعىس كەنتىندەگى بۇل مەكتەپ زاماناۋي ءبىلىم بەرۋ ستاندارتتارىنا ساي جابدىقتالعان», دەدى ا.كارىموۆ.
اباي وبلىسىنىڭ ءبىلىم باسقارماسىنىڭ مالىمەتىنە سۇيەنسەك, بيىل وڭىردە 1-سىنىپتىڭ تابالدىرىعىن 10 280 بالا اتتاعان. سونداي-اق وقۋشى ورىندارىنىڭ تاپشىلىعىن ازايتۋ ماقساتىندا 1 700 بالاعا ارنالعان 4 مەكتەپ اشىلىپتى. ال 2025 جىلعا قاراي 5 100 ورىندىق 11 مەكتەپ سالۋ جوسپارلانىپ وتىر.
«وبلىستا 301 مەكتەپ بار. ولاردىڭ بارلىعى اشىلىپ, قىزمەتتەرىنە كىرىستى. سونىمەن قاتار سەمەيدە 4 جاڭا مەكتەپ پايدالانۋعا بەرىلدى. شىعىس كەنتىندەگى 1 200 وقۋشىعا ارنالعان مەكتەپ زاماناۋي, سوڭعى ستاندارتتارعا ساي قۇرال-جابدىقتارمەن قامتىلعان. مۇندا ءبىلىم ەكى تىلدە بەرىلەدى. اباي وبلىسىنداعى مەكتەپتەردىڭ
100%-ى اپتاسىنا 5 كۇن وقيتىن بولادى», دەدى ءبىلىم باسقارماسىنىڭ وكىلدەرى.
سونىمەن قوسا جارما اۋدانىنىڭ قاپاي باتىر اۋىلىندا دا 100 وقۋشىعا ارنالعان مەكتەپ عيماراتى پايدالانۋعا بەرىلگەنىن ايتا كەتكەن ورىندى. مۇندا سپورت جانە اكت زالدارى, اسحانا, IT-سىنىبى, كىتاپحانا مەن ارنايى جابدىقتالعان پسيحولوگ كابينەتى قاراستىرىلعان.
وسى رەتتە «مەكتەپكە جول» اكتسياسى اياسىندا وڭىردەگى وقۋشىلارعا وقۋ قۇرالدارى مەن مەكتەپ فورماسىن ساتىپ الۋعا كومەك كورسەتىلىپ كەلە جاتقانىن ايتا كەتۋ كەرەك. ايتالىق, وسى ناۋقان ارقىلى اباي وبلىسىندا 5 316 بالا قاجەتتى قولداۋعا يە بولدى.
«20-25 تامىز ارالىعىندا اۋدانداردىڭ ورتالىق بازارلارىندا, ساۋدا ۇيلەرىندە مەكتەپ تاۋارلارىن تومەن باعامەن ساتۋ ءۇشىن بىرقاتار كاسىپكەردىڭ قاتىسۋىمەن مەكتەپ جارمەڭكەلەرى ۇيىمداستىرىلدى. وبلىستىڭ جاناشىر ازاماتتارى, كاسىپكەرلەرى, مەتسەناتتارى اكتسياعا قوسىلىپ, اتا-انالارعا قولداۋ كورسەتتى. مىسالى, «ۆوسحود» كەنتىندەگى №34 ورتا مەكتەپتىڭ 80 وقۋشىسىنا سپورتتىق كيىم مەن وقۋ قۇرال-جابدىقتارى بار سومكەلەر تابىستالدى», دەلىنگەن جاۋاپتى ۆەدومستۆو اقپاراتىندا.
اكتسيا قىركۇيەك ايىنىڭ سوڭىنا دەيىن جالعاسادى.
اباي وبلىسى
