ەكونوميكاداعى ءوسىم جانە ينفلياتسيانى تومەندەتۋ

تاقىرىپ بويىنشا پرەمەر-ءمينيستردىڭ ورىنباسارى – قارجى ءمينيسترى ەرۇلان جاماۋباەۆ، ۇلتتىق ەكونوميكا ءمينيسترى الى­بەك قۋانتىروۆ جانە ۇلتتىق بانك تور­اعاسىنىڭ ورىنباسارى اقىل­جان بايماعامبەتوۆ بايانداما جا­سادى.

ۇلتتىق ەكونوميكا ءمينيسترى الىبەك قۋانتىروۆ الەۋمەتتىك-ەكونوميكالىق دامۋ بولجامى 2021 جىلى ەكونوميكانىڭ ءوسۋى بويىنشا قورىتىندى دەرەكتەر، حالىقارالىق قارجى ۇيىم­دارىنىڭ الەمدىك ەكونوميكانىڭ ءوسۋى مەن ەكسپورتتىق تاۋارلار باعاسى بويىنشا كۇتۋلەرى ەسكەرىلە وتىرىپ قالىپتاستىرىلعانىن ايتىپ ءوتتى. وسى بويىنشا بيۋدجەتتىك جوسپارلاۋ ءۇشىن نەگىز رەتىندە پايدالانىلاتىن بازالىق ستسەناريدە مۇنايدىڭ ورتاشا باعاسىن باررەلىنە 85 دوللار دەڭگەيىندە جانە اقش دوللارىنىڭ ەسەپتىك باعامىن 470 تەڭگە دەڭگەيىندە پايدالانۋ ۇسىنىلادى. وسى ستسەناري بويىنشا جالپى ىشكى ءونىمنىڭ ورتاشا جىلدىق ناقتى ءوسۋى 3،9%-دى قۇرايدى، ونىڭ ىشىندە 2023 جىلى – 4%. بۇل رەتتە ەكسپورتتىڭ جانە ەكونوميكانىڭ بارلىق نەگىزگى سالالارىنىڭ ءوسۋى كۇتىلۋدە.

ەكونوميكانى دامىتۋدىڭ ءۇش ستسەناريى ازىرلەندى

حالىقارالىق قارجى ۇيىم­دارى­نىڭ كونسەنسۋس-بولجامىنا ساي­كەس 2022 جىلى مۇنايدىڭ الەم­دىك باعاسى باررەلىنە 104،2 دوللار دەڭ­گەيىندە كۇتىلۋدە. 2023 جىلى الەمدىك ەكونوميكانىڭ ءوسۋى 3%-دى قۇرايدى.

سىرتقى جانە ىشكى پارا­مەترلەردىڭ وزگەرۋىنە بايلانىس­تى قازاقستان ەكونوميكاسىن دامىتۋدىڭ 2023-2027 جىلدارعا ارنالعان ءۇش ستسەناريى (بازالىق، وپتيميستىك جانە پەسسيميستىك) ازىرلەندى. «بازالىق ستسەناري كەزىندە مۇنايدىڭ ورتاشا باعاسىن باررەلىنە 85 دوللار دەڭگەيىندە جانە دوللاردىڭ ەسەپتىك باعامىن 470 تەڭگە دەڭگەيىندە پايدالانۋ ۇسىنىلادى. وسى ستسەناري بو­يىنشا ىشكى جالپى ءونىمنىڭ ورتاشا جىلدىق ناقتى ءوسۋى 3،9%-دى قۇرايدى، ونىڭ ىشىندە 2023 جىلى – 4%. وپتيميستىك ستسەناري كەزىندە مۇنايدىڭ بولجامدى باعاسى باررەلىنە 110 دوللار بولادى (اقش دوللارىنىڭ باعامى – 440 تەڭگە دەڭگەيىندە انىقتالدى). ەكونوميكانىڭ ورتاشا جىلدىق ءوسۋى 4،2 % دەڭگەيىندە بولجانۋدا. پەسسيميستىك ستسەناريدە مۇناي باعاسى باررەلىنە 60 دوللار بولىپ،  ءىجو-ءنىڭ بولجامدى ناقتى ءوسۋى ورتا ەسەپپەن 3،5%-دى قۇرايدى»، دەپ ءتۇسىندىردى ۇلتتىق ەكونوميكا ءمينيسترى.

ينفلياتسيا بارلىق ستسەناريدە 2023 جىلى 7،5-9،5% دەڭ­گەيىندە، 2024 جىلى – 4-5% دەڭ­گەي­ىندە، كەيىننەن 2025-2027 جىلدارى 3-4%-عا دەيىن تومەندەيدى دەپ بەل­گىلەندى.

ءمينيستردىڭ ايتۋىنشا، بيۋدجەت­تىك جوسپارلاۋ ءۇشىن نەگىز رەتىندە بازالىق ستسەناريدى پايدالانۋ ۇسىنىلادى. وسى ستسەناريگە سايكەس ءىجو-ءنىڭ ناقتى ءوسۋى 2023 جىلعى 4%-دان 2027 جىلى 4،2%-عا دەيىن جەدەلدەيدى. نو­مينالدى ءىجو 120،7 ترلن تەڭگەدەن 177 ترلن تەڭگەگە دەيىن وسەدى. ەكونوميكانىڭ بارلىق بازالىق سالالارىندا وڭ ءوسۋ كۇتىلۋدە.

ماسەلەن، ونەركاسىپتە ورتاشا جىلدىق ءوسۋ قارقىنى 3،1%-دى، ونىڭ ىشىندە وڭدەۋ ونەركاسىبىندە – 3،5%-دى، تاۋ-كەن ءوندىرۋ ونەر­كاسىبىندە – 2،9%-دى قۇرايدى. اۋىل شارۋاشىلىعىنىڭ جالپى ءونىم كولەمىنىڭ ورتاشا جىلدىق ءوسۋى – 3،9%. قۇرىلىس سالاسىنىڭ بولجامدى ءوسۋى ورتا ەسەپپەن 3،8%-دى، ساۋدا – 5،7% بولادى. «مۇناي ءوندىرۋ 2023 جىلى 92،6 ملن توننانى قۇراپ، 2027 جىلى 100 ملن تونناعا دەيىن ۇلعايادى. ۇلتتىق بانكتىڭ بولجامى بويىنشا ەكسپورت 81 ملرد دوللاردان 84،6 ملرد دوللارعا دەيىن، يمپورت 45،7 ملرد دوللاردان 53،5 ملرد دوللارعا دەيىن وسەدى»، دەدى ۇلتتىق ەكونوميكا ءمينيسترى.

«قازاقستان رەسپۋبليكاسىنىڭ ۇلتتىق قورىنان 2023-2025 جىل­دارعا ارنالعان كەپىلدەندىرىلگەن ترانسفەرت تۋرالى» زاڭ جوباسى بيۋدجەت كودەكسىنىڭ جاڭا تالاپتارىن ەسكەرە وتىرىپ ازىرلەندى. ۇلتتىق قوردان كەپىلدەندىرىلگەن ترانسفەرتتىڭ مولشەرى بيۋدجەت قاعيدالارىنا سايكەس مۇنايدىڭ كەسىمدى باعاسىن ەسكەرە وتىرىپ ايقىندالدى. وسىلايشا، زاڭ جوباسىندا مۇنايدىڭ كەسىمدى باعاسى 2023 جىلى باررەلىنە 48،9 دوللار، 2024-2025 جىلدارى باررەلىنە 42،2-40،3 دوللار دەڭگەيىندە بەل­گى­لەندى. وسىنى ەسكەرە وتىرىپ، رەس­پۋبليكالىق بيۋدجەتكە كەپىلدەن­دىرىلگەن ترانسفەرتتىڭ مولشەرى 2023 جىلى 2،2 ترلن تەڭگە، 2024 جىلى 2 ترلن تەڭگە، 2025 جىلى 1،9 ترلن تەڭگە كولەمىندە بەلگىلەندى.

جالپى سيپاتتاعى ترانس­فەرتتەردىڭ كولەمى وڭىرلەردىڭ قار­جىلىق دەربەستىگىن كەڭەيتۋ جانە الەۋمەتتىك يگىلىكتەر مەن مەم­لەكەتتىك كورسەتىلەتىن قىزمەت­تەردىڭ قولجەتىمدى بولۋىن تەڭەس­تىرۋ، سونداي-اق ورتالىق پەن وڭىرلەر اراسىنداعى ترانسفەرتتەر كولەمىن بىرتىندەپ قىسقارتۋ جونىندەگى جاڭا تاسىلدەر ەسكەرىلىپ ەسەپتەلدى. وسىنى ەسكەرە وتىرىپ، ءۇش دونور ءوڭىر – نۇر-سۇلتان جانە الماتى قالالارى، اتىراۋ وبلىسى ايقىندالدى، ولار بويىنشا بيۋدجەتتىك الىپ قويۋلار مىناداي كولەمدە ايقىندالدى: 2023 جىلى – 487 ملرد تەڭگە، 2024 جىلى – 536 ملرد تەڭگە، 2025 جىلى – 577 ملرد تەڭگە.

ۇلتتىق ەكونوميكا مينيستر­لىگىنىڭ باسشىسى اتاپ وتكەندەي، قال­عان 17 ءوڭىر بويىنشا بيۋد­جەتتىك سۋبۆەنتسيالار كولەمى 2023 جىلى – 4،9 ترلن تەڭگە، 2024 جىلى – 5،2 ترلن تەڭگە، 2025 جىلى – 5،7 ترلن تەڭگەنى قۇرادى. جالپى سيپات­تاعى ترانسفەرتتەردىڭ كولەمى رەس­پۋبليكالىق بيۋدجەتتىڭ پارا­مەترىندە ەسكەرىلدى.

پرەمەر-ءمينيستردىڭ ورىنباسارى – قارجى ءمينيسترى ەرۇلان جاماۋباەۆ «2023-2025 جىلدارعا ارنالعان رەسپۋبليكالىق بيۋد­جەتتىڭ جوباسى تۋرالى» زاڭ جوباسى تۋرالى باياندادى. زاڭ جوباسى بيۋدجەت كودەكسىنە سايكەس، ەلى­مىزدىڭ 2027 جىلعا دەيىنگى الەۋ­مەتتىك-ەكونوميكالىق دامۋ بولجامى نەگىزىندە ازىرلەندى.

2023 جىلى تۇسىمدەر 17،8 ترلن تەڭگە دەڭگەيىندە بولجانىپ وتىر.

كەلەسى جىلى ۇلتتىق قوردان كەپىلدەندىرىلگەن ترانسفەرت اعىم­داعى جىلمەن سالىستىرعاندا 1،8 ەسەگە ازايا وتىرىپ، 2،2 ترلن تەڭگە مولشەرىندە تارتىلادى. «بيۋد­جەت تاپشىلىعى 2023 جىلى جال­پى ىشكى ءونىمنىڭ 2،7%-ىنان كەزەڭ-كەزەڭىمەن 2025 جىلى جالپى ىشكى ءونىمنىڭ 2،5%-ىنا دەيىن تومەن­دەۋىمەن جوسپارلانعان. 2023 جىلى شىعىستار كىرىستەر مەن تاپ­شىلىقتى ەسكەرە وتىرىپ، 2022 جىلدىڭ جوسپارىنان 2،2 ترلن تەڭ­گەگە ۇلعايادى جانە 21 ترلن تەڭگەنى قۇرايدى»، دەدى ە.جا­ماۋباەۆ.

بيۋدجەت پارامەترلەرى بيۋدجەت­تىك زاڭنامامەن ورناتىلعان كە­پىل­دەندىرىلگەن ترانسفەرت، شى­عىس­­تاردىڭ ءوسۋ قارقىنى جانە بيۋد­­جەت تاپشىلىعى بويىنشا ەرەجە­­لەرگە سايكەس كەلەدى. «2023 جىلى الەۋ­مەتتىك سالاعا 8 ترلن تەڭگە كولە­مىندە قاراجات جوسپارلاندى. شىعىستار زەينەتاقى مەن جاردەم­اقى تولەۋگە، ءبىلىم بەرۋ، دەنساۋلىق ساقتاۋ سالالارىن، مادە­نيەت جانە سپورتتى دامىتۋعا، جاستاردى ىنتالاندىرۋعا باعىت­تالاتىن بولادى»، دەدى قارجى ءمينيسترى.

ەكونوميكانىڭ ناقتى سەكتورىن دامىتۋدى قولداۋعا 2023 جىلعا 2،1 ترلن تەڭگە كوزدەلدى.

ءوز كەزەگىندە ۇلتتىق بانك تورا­عاسىنىڭ ورىنباسارى اقىل­جان بايماعامبەتوۆ ۇلتتىق بانك­تىڭ ەلدىڭ 2023-2027 جىلدارعا ارنالعان ماكروەكونوميكالىق دامۋ بولجامدارىن ازىرلەۋگە قاتىسقانىن ايتتى. ء«بىزدىڭ بول­جا­مىمىز بويىنشا، ينفلياتسيا 2023 جىلدىڭ سوڭىنا قاراي با­زالىق مولشەرلەمەگە قاتىستى قابىلداناتىن شەشىمدەر، كونتر­تسيكلدىق بيۋدجەت قاعيدالارىن ىسكە اسىرۋدى جوسپارلاۋ، سىرتقى ينفلياتسيالىق قىسىمدى رەت-رەتىمەن تومەندەتۋ جانە وسى جىلعى جوعارى بازا ەسەپ ايىرىسۋلارىنان شىعۋ اياسىندا قازىرگى دەڭگەيدەن 7،5-9،5%-عا دەيىن باياۋ­لايدى. قازىرگى ۋاقىتتا ۇلتتىق بانكتە كەزەكتى بولجامدى راۋند وتكىزىلىپ جاتقانىن، ونىڭ ناتيجەسى وسى جىلعى 5 قىركۇيەكتە جاريا­لاناتىنىن اتاپ وتەمىن. ورتا مەرزىمدى كەزەڭدە جاڭا كۇتپەگەن وزگەرىستەر ورىن الماسا، ينفلياتسيا 2024 جىلدىڭ سوڭىنا قاراي نىسانالى دالىزگە جۋىقتايتىن بولادى»، دەدى ا.بايماعامبەتوۆ.

2023 جىلى تولەم بالانسىنىڭ ءادىسناماسى بويىنشا، تاۋارلار ەكسپورتى ۇكىمەت بەلگىلەگەن شيكى­زات­تىڭ جوعارى باعاسىن ستسەناريلىك تۇزەتۋگە بايلانىستى 80،9 ملرد دول­لارعا دەيىن قالىپتاسىپ، 0،9%-عا ازداپ تومەندەيدى.

ۇلتتىق بانك توراعاسى ورىن­باسارىنىڭ ايتۋىنشا، تاۋار يم­پورتى جوعارى دەڭگەيدە قالىپ، 45،7 ملرد دوللار بولادى. شە­تەلدىك ونىمگە ءوسىپ كەلە جاتقان سۇرانىس حالىق پەن بيزنەس­تىڭ قاجەتتىلىكتەرىن وتەۋ ءۇشىن قا­زاق­ستاندىق ءوندىرىستىڭ جەتىسپەۋ­شى­لىگىنە، سونداي-اق فيسكالدىق شىعىس­تاردىڭ ۇلكەن كولەمىنە بايلا­نىستى بولىپ وتىر.

ينفوگرافيكانى جاساعان امانگەلدى قياس، «ەQ»

الەۋمەتتىك مىندەتتەمەلەر تولىق ورىندالادى

بايانداماشىلاردى تىڭداعان پرەمەر-مينيستر ۇشجىلدىق كەزەڭگە ارنالعان رەسپۋبليكالىق بيۋدجەت جوباسى، ەڭ الدىمەن، مەملەكەتتىڭ بارلىق الەۋمەتتىك مىندەتتەمەسىن تولىق جانە ۋاق­تىلى ورىنداۋعا، سونداي-اق اعىم­داعى جاعدايدا ەكونوميكانى ساپالى جانە ورنىقتى دامىتۋدى قامتاماسىز ەتۋگە باعىتتالعانىن اتاپ ءوتتى. «2023-2025 جىلدارى جالپى ىشكى ءونىمنىڭ ءوسىمى 4-4،1% دەڭگەيىندە بولادى دەپ بولجانىپ وتىر. ينفلياتسيانىڭ ورتاشا جىلدىق دەڭگەيى 2025 جىلعا قاراي 3-4%-عا تومەندەيدى دەپ جوس­پارلانۋدا. رەسپۋبليكالىق بيۋدجەت كىرىستەرى 2023 جىلى 3 ترلن تەڭگەگە ۇلعايادى. وسىلايشا، رەس­پۋب­ليكالىق بيۋدجەت كىرىستەرىنىڭ جوعارى دەڭگەيدە ءوسۋ قارقىنىن قامتا­ماسىز ەتەمىز»، دەدى ءا.سمايى­لوۆ.

ۇكىمەت باسشىسى ۇلتتىق قوردان رەسپۋبليكالىق بيۋدجەتكە بولىنەتىن ترانسفەرتتەر ەداۋىر تومەندەيتىنىن اتاپ ءوتتى. ولار 2023 جىلى 1،4 ترلن تەڭگەگە، 2024 جىلى تاعى 800 ملرد جانە 2025 جى­لى تاعى 500 ملرد تەڭگەگە ازايادى. «بۇل – وتە ماڭىزدى اسپەكت. كە­پىلدەندىرىلگەن ترانسفەرت ۇلت­تىق قورعا مۇناي سەكتورىنان تۇسەتىن تۇسىمدەردىڭ كولەمىنەن اسپاي­تىن بولادى. ال بيۋدجەت شىعىس­تارىنىڭ ءوسۋى ينفلياتسيا مەجە­سىن ەسكەرگەندە، ۇزاق مەرزىمدى ەكو­نوميكالىق ءوسۋدىڭ ورتاشا دەڭ­گەيىنەن اسپايدى. جالپى العاندا، بيۋدجەت جوباسى تەڭگەرىمدى»، دەدى پرەمەر-مينيستر.

ءا.سمايىلوۆتىڭ ايتۋىنشا، بيۋدجەت الەۋمەتتىك سيپاتقا يە. الەۋ­مەتتىك سالاعا 2023 جىلى 8 ترلن تەڭگە كوزدەلگەن. ەكونومي­كانىڭ ناقتى سەكتورىندا وڭدەۋ ونەركاسىبىن دامىتۋ، بيزنەستى قولداۋ، كولىك ينفراقۇرىلىمىن دامىتۋ جانە گازداندىرۋ باسىم باعىتتار بولىپ تابىلادى. ء«بىزدىڭ مىندەتىمىز – بيۋدجەت قاراجاتىن ءتيىمدى پايدالانۋ»، دەدى پرەمەر-مينيستر.

ۇسىنىلعان زاڭ جوبالارى ءۇشىن داۋىس بەرۋ پروتسەدۋراسىنان كەيىن ۇكىمەت باسشىسى ۇلتتىق ەكونوميكا جانە قارجى مينيسترلىكتەرىنە پرەمەر-مينيستر كەڭسەسىمەن بىرگە زاڭ جوبالارى مەن الەۋمەتتىك-ەكونوميكالىق دامۋ بولجامىن پارلامەنتكە ەنگىزۋدى قامتاماسىز ەتۋدى تاپسىردى.

قانت يمپورتىنىڭ ۇلەسى 17%-عا دەيىن قىسقارۋعا ءتيىس

ۇكىمەت وتىرىسىندا الداعى جىلدارى قانت سالاسىن دامىتۋ جونىندە ماسەلە قارالىپ، پرەمەر-مينيستر بىرقاتار تاپسىرما بەردى.

اۋىل شارۋاشىلىعى ءمينيس­ترىنىڭ مىندەتىن اتقارۋشى ءابىل­حايىر تامابەك مەملەكەت باس­شىسىنىڭ تاپسىرماسىنا سايكەس، قانت سالاسىن دامىتۋدىڭ 2026 جىلعا دەيىنگى كەشەندى جوسپارى ازىرلەنگەنىن مالىمدەدى. ول قانت قىزىلشاسىنىڭ ەگىس الاڭدارىن كەڭەيتۋ ارقىلى شيكىزات بازاسىن ۇلعايتۋدى، جاڭا سۋارمالى جەرلەردى ىسكە قوسۋدى، سۋارۋدىڭ سۋ ۇنەمدەۋ تەحنولوگيالارىن ەنگىزۋدى، تۇقىم شارۋاشىلىعىن دامىتۋدى، قانت قىزىلشاسىن قايتا وڭدەۋ بو­يىنشا زاۋىتتاردىڭ قۋاتتىلىعىن تەحنيكالىق جانە تەحنولوگيالىق قايتا جاراقتاندىرۋدى، سون­داي-اق جاڭا يننوۆاتسيالىق زاۋىت سالۋدى كوزدەيدى.

جوسپاردى ىسكە اسىرۋ 2026 جىلعا قاراي قانت يمپورتىنىڭ ۇلەسىن 58-دەن 17%-عا دەيىن ازاي­تۋعا مۇمكىندىك بەرەدى. اتالعان سالا بويىنشا جەتىسۋ وبلىسىنىڭ اكىمى بەيبىت يساباەۆ پەن پاۆلودار وبلىسىنىڭ اكىمى ابىلقايىر سقاقوۆ بايانداما جاسادى.

تالقىلاۋدى قورىتىندىلاي كەلە، ءا.سمايىلوۆ ازىق-ت ۇلىك قاۋىپسىزدىگىن قامتاماسىز ەتۋ مەن نارىقتى وتاندىق ونىمدەرمەن تولىق­­تىرۋدىڭ ۇكىمەتتىڭ ستراتەگيا­لىق مىندەتى ەكەنىن ايتىپ ءوتتى. «قا­لىپتاسقان جاعداي كەيبىر تاۋار­لىق پوزيتسيالار بويىنشا، اسى­رەسە قانت نارىعىندا پروبلە­مالاردىڭ بار ەكەنىن كورسەتتى. ءبىز قانت تاپشىلىعى مەن ونىڭ قىم­باتتاۋىنا قاتىستى حالىقتىڭ نارازىلىعىن كورىپ وتىرمىز. بۇل جونىندە مەملەكەت باسشىسى تارا­پىنان دا ءادىل سىن ايتىلدى. وسى­عان بايلانىستى سالانى دامى­تۋ بويىنشا كەشەندى جوسپار ازىر­لەندى»، دەدى پرەمەر-مينيستر.

ءا.سمايىلوۆ ءبىرىنشى كەزەكتە قانت زاۋىتتارىن وتاندىق شيكى­زاتپەن قامتاماسىز ەتۋ مىندەتى تۇرعانىن ايتتى. ول ءۇشىن ەگىس القاپ­تارىن 11،5 مىڭنان 38 مىڭ گەكتارعا دەيىن، ياعني 3 ەسە ارتتىرۋ جوسپارلانىپ وتىر. «بۇل الداعى بەس جىلدا وتاندىق شيكىزاتتان قانت ءوندىرۋ كولەمىن جىل سايىن 250 مىڭ تونناعا دەيىن جەتكىزۋگە مۇمكىندىك بەرەدى»، دەدى ۇكىمەت باسشىسى.

پرەمەر-ءمينيستردىڭ ايتۋىنشا، قانت زاۋىتتارىن بارىنشا جاڭعىرتىپ، وندىرىستىك قۋاتىن ارتتىرۋ قاجەت. «جالپى، قانتپەن قامتاماسىز ەتۋ جاعدايى تۇراقتالدى. قانتتىڭ قاجەتتى قورى بار. دۇرلىگۋگە جول بەرمەۋ ءۇشىن قانت باعاسىنا قاتىستى ءتۇرلى كەلەڭسىزدىكتىڭ الدىن الىپ، الىپساتارلىق ارەكەتتەر مەن قاجەتسىز دەلدالداردى انىقتاۋ قاجەت»، دەدى ءا.سمايىلوۆ.

ءسوز سوڭىندا پرەمەر-مي­نيستر اۋىل شارۋاشىلىعى مي­نيس­ترلىگىنە ساۋدا جانە ينتەگراتسيا مينيسترلىگىمەن جانە ءوڭىر اكىمدىكتەرىمەن بىرلەسىپ، قانت سالاسىن دامىتۋ بويىنشا كەشەندى جوسپاردى تولىق كولەمدە ورىنداۋدى تاپسىردى.

اۋىل شارۋاشىلىعى مينيستر­لىگىنە ساۋدا جانە ينتەگراتسيا مي­نيسترلىگىمەن، «بايتەرەك» حول­دينگىمەن بىرلەسىپ، قانت زاۋىتتارىن جاڭعىرتۋ جانە شيكىزات ساتىپ الۋعا اينالىم قاراجاتىن تولىق­تىرۋ ءۇشىن جەڭىلدىكپەن كرەديت بەرۋ ماسەلەسىن پىسىقتاۋ جۇكتەلدى.

اۋىل شارۋاشىلىعى مينيستر­لىگىنە پاۆلودار وبلىسىنىڭ اكىم­دىگىمەن، «بايتەرەك» حولدينگىمەن بىرلەسىپ، وڭىردە قانت قىزىلشاسى ءوندىرىسىنىڭ كولەمىن كەڭەيتۋ شارالارىن قابىلداپ، پاۆلودار وبلىسىندا جاڭا قانت زاۋىتىن سالۋ ماسەلەسىن پىسىقتاۋ تاپسىرىلدى.

ساۋدا جانە ينتەگراتسيا مي­نيستر­لىگىنە ىشكى نارىقتى دەمپينگ­تەن قورعاۋ ءۇشىن قانتقا ەڭ تومەنگى بولشەك ساۋدا باعاسىن بەلگىلەۋ ماسەلەسىن پىسىقتاۋ مىندەتتەلدى.