باس پروكۋراتۋرانىڭ ءباسپاسوز قىزمەتىنىڭ حابارلاۋىنشا, ءموبيلدى توپتارعا كەلىپ تۇسكەن وسىنشاما ارىز-شاعىمنىڭ ءاربىر تورتىنشىسىندە زاڭ بۇزۋشىلىق راستالعان. مىسالى, الماتى وبلىسىندا ءبىلىم بەرۋ ورگاندارى تاراپىنان 251 جەكەمەنشىك بالاباقشانى زاڭسىز تەكسەرۋگە جول بەرىلگەن جوق. ادەتتە, مۇنداي تەكسەرۋلەر مەملەكەتتىك تاپسىرىستى ورىنداۋ ماسەلەلەرى بويىنشا جۇرگىزىلەدى. ال قوستاناي وبلىسىندا پروكۋرورلاردىڭ ارالاسۋىنان كەيىن NPO DSK جشس-نىڭ 15 قىزمەتكەرىنە جالاقى بويىنشا 3,4 ملن تەڭگە مولشەرىندە 2 ايلىق بەرەشەك تولەندى.
جامبىلدىق پروكۋرورلار ت.رىسقۇلوۆ اۋدانىنىڭ تۇرعىن ءۇي-كوممۋنالدىق شارۋاشىلىق ءبولىمى باسشىسىنىڭ ارەكەتىن تەكسەرىپ, ونىڭ كاسىپكەرلەرگە مەملەكەتتىك ساتىپ الۋ سالاسىنداعى 10 ملن تەڭگە سوماسىنداعى كەپىلدىك جارنانى قايتارماعانىن انىقتاعان. وسى فاكتىنى تەكسەرۋ كەزىندە پروكۋرورلار ءبولىم باسشىسىنىڭ بۇدان باسقا 39 كاسىپكەرگە 40 ملن تەڭگەدەن استام بەرەشەگى بارىن دا اشكەرەلەگەن. بۇل فاكتىلەردى اۋداندىق پروكۋراتۋرا قىلمىستىق كودەكستىڭ 189-بابى 4-بولىگىنىڭ 2-تارماعىندا (سەنىپ تاپسىرىلعان بوتەن م ۇلىكتى يەمدەنۋ نەمەسە ىسىراپ ەتۋ) كوزدەلگەن قىلمىس بەلگىلەرى بويىنشا سوتقا دەيىنگى تەرگەپ-تەكسەرۋلەردىڭ بىرىڭعاي تىزىلىمىندە تىركەگەن.
ارنايى پروكۋرورلار جۇرگىزگەن سوتقا دەيىنگى تەرگەپ-تەكسەرۋ ناتيجەلەرى بويىنشا اۋداندىق سوتتىڭ ۇكىمىمەن كىنالى ادام ءومىر بويى بەلگىلى ءبىر لاۋازىمداردى اتقارۋ قۇقىعىنان, سونداي-اق 7 جىلعا باس بوستاندىعىنان ايىرىلدى. ال بيزنەس سۋبەكتىلەرىنە كەلتىرىلگەن زالال تولىق وتەلدى.
موبيلدىك توپتار شەشەتىن ماسەلەلەردىڭ اۋقىمى جەكە جاعدايلارمەن شەكتەلمەيدى, كوبىنە پروكۋرورلار قۇقىقتىق اكتىلەرگە وزگەرىستەر ەنگىزۋدى تالاپ ەتەتىن جۇيەلى پروبلەمالارمەن كۇرەسەدى. ال بۇل جۇمىس «اتامەكەن» ۇلتتىق كاسىپكەرلەر پالاتاسىمەن ءوزارا تىعىز ءىس-قيمىلدا جۇرگىزىلۋدە. باس پروكۋراتۋرانىڭ مالىمەتىنە قاراعاندا, پروكۋراتۋرا ورگاندارىنىڭ كومەگىمەن بيزنەستىڭ 28 وڭىرلىك پروبلەماسى ناقتى شەشىمىن تاپقان.
مىسالى, پاۆلودار جانە ماڭعىستاۋ وبلىستارىندا مەملەكەتتىك ورگانداردىڭ كوممەرتسيالىق نىسانداردى زاڭسىز تەكسەرۋ تاجىريبەسى توقتاتىلسا, شىمكەنت قالاسىندا شارۋا قوجالىقتارىن سۋارمالى سۋمەن قامتاماسىز ەتۋ بويىنشا شارالار قابىلداندى. ال جامبىل وڭىرىندە پروكۋرورلار قابىلداعان شارالاردىڭ ارقاسىندا ەلەكتر جەلىلەرىنىڭ تىرەكتەرىن جالعا الىپ وتىرعان كاسىپكەرلەردەن اقشا الىنبايتىن بولدى.
وسى دەرەكتەردىڭ ءوزى-اق پروكۋرورلاردىڭ ۋاكىلەتتى ورگانداردىڭ زاڭسىز تىيىم سالۋ جانە شەكتەۋ شارالارىن جويۋ جونىندەگى جاڭا قۇزىرەتى كاسىپكەرلەردىڭ قۇقىقتارىن قورعاۋداعى ءتيىمدى قۇرالعا اينالعانىن ايعاقتاي الادى. مىسالى, قوستاناي وبلىسىنىڭ پروكۋراتۋراسىنىڭ سالىق سالاسىندا جۇرگىزىلگەن تالداۋ قورىتىندىسى بويىنشا 141 سالىق تولەۋشىگە بانكتىك شوتتاردىڭ زاڭسىز بۇعاتتالعانىن انىقتالعان. پروكۋراتۋرانىڭ قاۋلىسىمەن تىيىم سالۋلار كەرى قايتارىلدى.
جالپى, جىل باسىنان بەرى كاسىپكەرلىك سالاسىنداعى بۇزۋشىلىقتار بويىنشا ونىڭ ىشىندە ءموبيلدى توپتاردىڭ جۇمىسى شەڭبەرىندە 893 قاداعالاۋ اكتىسى ەنگىزىلىپ, 143 مىڭنان استام بيزنەس سۋبەكتىسىنىڭ قۇقىقتارى قورعالعان. باس پروكۋراتۋرانىڭ مالىمەتىنە قاراعاندا, 534 ملن تەڭگەدەن استام قارجىعا 5,9 مىڭ اكىمشىلىك جازا الىپ تاستالىپ, 6,4 مىڭنان استام زاڭسىز تەكسەرۋ مەن باقىلاۋدىڭ وزگە دە نىساندارىنىڭ جولى كەسىلدى. سونداي-اق 1 139 تىيىم سالۋ-شەكتەۋ شاراسى مەن مەملەكەتتىك ورگانداردىڭ 702 اكتىسىنىڭ كۇشى جويىلسا, 669-دان استام ادام جاۋاپكەرشىلىككە تارتىلعان.
ەستەرىڭىزگە سالا كەتەيىك, كەز كەلگەن كاسىپكەر ءوز قۇقىقتارىن بۇزۋ فاكتىلەرى تۋرالى پروكۋراتۋرا ورگاندارىنا 115 (Call-ورتالىق), 30-18-30 (باس پروكۋراتۋرانىڭ ءموبيلدى توبى) نومىرلەرى نەمەسە وبلىس پروكۋراتۋرالارىنىڭ سايتتارىندا كورسەتىلگەن نومىرلەر بويىنشا حابارلاسا الادى.
