كەزدەسۋدى «اتامەكەن» ۇلتتىق كاسىپكەرلەر پالاتاسى ەلوردا اكىمدىگىمەن بىرلەسىپ ۇيىمداستىردى.
«اتامەكەن» قر ۇكپ تورالقا توراعاسى رايىمبەك باتالوۆتىڭ ايتۋىنشا, بيزنەس وكىلدەرى مەملەكەتتىك ورگاندار قىزمەتكەرلەرىنىڭ الدىندا كاسىپكەرلىكتىڭ وتكىر جانە وزەكتى ماسەلەلەرىن كوتەرە الاتىن, بيزنەستىڭ دامۋىنا كەدەرگى كەلتىرەتىن اكىمشىلىك كەدەرگىلەردى تالقىلاي الاتىن اشىق پىكىرتالاس الاڭى بيزنەستى قورعاۋ مەن قولداۋدىڭ ەكوجۇيەسىن قۇرۋعا ىقپال ەتەدى.
كەزدەسۋدىڭ بارلىق تاراپتار ءۇشىن پايدالى ەكەنىن اتاپ وتكەن رايىمبەك باتالوۆ توقسانىنا ءبىر رەت قانا ەمەس, وسى ۋاقىت اراسىندا جۇمىس كەزدەسۋلەرىن وتكىزۋدى ۇسىندى.
ەلوردا اكىمى التاي كولگىنوۆ بۇل ۇسىنىستى قولدادى.
«اتامەكەن الاڭىندا تاقىرىپتىق كەزدەسۋلەر وتكىزۋدى ۇسىنامىن, توقسانىنا ءبىر رەت كۇتۋدىڭ قاجەتى جوق. توقسانىنا ءبىر رەت وسىنداي كەڭەيتىلگەن كەزدەسۋ وتكىزە الامىز. اكىمدىك تاراپىنان ءبىز بيزنەس وكىلدەرىنە جۇيەلى قولداۋ كورسەتەتىن بىرقاتار شارا قابىلدادىق. بيزنەستى, اسىرەسە شاعىن جانە ورتا كاسىپكەرلىكتى قولداۋدىڭ پارمەندى تەتىكتەرىنىڭ ءبىرى - «Astana اكك» اق قىزمەتى. الەۋمەتتىك-كاسىپكەرلىك كورپوراتسيا كاسىپكەرلەرگە بيۋروكراتيالىق كەدەرگىسىز جەر تەلىمدەرىن, اەا اۋماعىندا «Astana Invest» جانە يندۋستريالىق پارك ارقىلى جەڭىلدىكتى پرەفەرەنتسيالار بەرۋگە مۇمكىندىك بەرەدى. بۇل شارالار داعدارىس كەزەڭىندە ەرەكشە جانە ماڭىزدى ءرول اتقاردى.
سونىمەن قاتار, ءتۇرلى باعدارلامالار بويىنشا گرانتتار مەن جەڭىلدەتىلگەن نەسيەلەر بەرىلەدى. ماسەلەن بيىل جاڭا بيزنەس-يدەيالاردى ىسكە اسىرۋ ءۇشىن 130-دان استام گرانت بەرىلدى, بۇل وتكەن جىلمەن سالىستىرعاندا 2 ەسە كوپ. شوب نىساندارىنا ينجەنەرلىك جەلىلەر جۇرگىزۋ تۇرىندە قولداۋ كورسەتەمىز, بيزنەس شىعىندارىن ازايتۋ جانە قولداۋ ءۇشىن قاجەتتى ينفراقۇرىلىم جاسايمىز. بۇگىندە «iQala» قالالىق قىزمەتتەر ورتالىعى, ينۆەستورلارعا ارنالعان «Astana Invest» فرونت-كەڭسەسى جانە ت.ب. تابىستى جۇمىس ىستەپ جاتىر», دەپ اتاپ ءوتتى نۇر-سۇلتان قالاسىنىڭ اكىمى التاي كولگىنوۆ.
ءوز كەزەگىندە رايىمبەك باتالوۆ مۇنداي الاڭداردىڭ بيزنەس ءۇشىن ماڭىزدى ەكەنىن اتاپ ءوتتى.
«پالاتا ادۆوكاتتار القاسى مەن زاڭ قوعامداستىعى ارقىلى, كاسىپكەرلەردىڭ تىكەلەي وتىنىشتەرى ارقىلى وڭىرلەر بويىنشا بيزنەستىڭ تۇيتكىلدى ماسەلەلەرىنىڭ جالپى كورىنىسىن قالىپتاستىرادى. مۇنداي الاڭدار بيزنەس ءۇشىن وتە ماڭىزدى, ويتكەنى ولار ماسەلەلەردى شەشىم قابىلداۋشى تۇلعالار دەڭگەيىندە جاريالاپ قانا قويماي, سونىمەن قاتار بۇل ماسەلەلەردىڭ اكىمنىڭ, پروكۋروردىڭ جانە مەملەكەتتىك ورگانداردىڭ باقىلاۋعا الىنعانىنا كوز جەتكىزۋگە مۇمكىندىك بەرەدى. اشىق ايىپتاۋدا كىمنىڭ دۇرىس ەكەندىگى جانە تۋىنداعان جاعدايلارعا كىم كىنالى ەكەندىگى ايقىن بولادى. مۇنداي اشىق ديالوگ بيزنەستى دە, مەملەكەتتىك ورگانداردى دا تارتىپكە كەلتىرەدى», دەپ اتاپ ءوتتى رايىمبەك باتالوۆ.
ەلوردالىق بيزنەسمەندەر ەركىن ميكروفون فورماتىندا جەر قاتىناستارى, قۇرىلىس جانە قالانى اباتتاندىرۋ, جوبالاردى قارجىلاندىرۋ, الەۋمەتتىك جانە ءبىلىم بەرۋ سالالارىندا ۇلكەن قىزىعۋشىلىق تۋدىراتىن ماسەلەلەردى ايتا الدى.
