– راۆشان سايفيددينوۆيچ, قازاقستانعا قوش كەلىپسىز! «Super Bol» جوباسىنىڭ ماڭىزدى كەزدەسۋىنە تورەلىك ەتۋ ميسسياسى سىزگە جۇكتەلىپتى...
– ىستىق ىقىلاستارىڭىزعا راحمەت! قازاقستان فۋتبولىنىڭ جۇگىن ارقالاپ جۇرگەن ازاماتتار «Super Bol» جوباسىنىڭ شەشۋشى كەزدەسۋىنە قازىلىق ەتۋگە شاقىرعاندا بىردەن كەلىسىمىمدى بەردىم. سەبەبى جوبانىڭ ماقساتى ۇنادى. جاستارعا دەگەن قامقورلىقتى سەزىندىم. بۇعان دەيىن وسى تەكتەس جوبالار جايلى ەستىگەن ەمەسپىن. قازاقستان فۋتبولىنىڭ اياق الىسى ءتاۋىر دەپ ايتۋعا تولىق نەگىز بار. ۇلتتىق قۇراما بيىل ۇلتتار ليگاسىنداعى كەزدەسۋلەرىن ءساتتى وتكىزىپ, ازىرگە توپ باستاپ تۇر. سوڭعى جىلدارى كلۋبتىق دەڭگەيدەگى جارىستاردا دا قازاقستاندىق كوماندالار جاقسى ويىن ورنەگىن كورسەتىپ ءجۇر. «Super Bol» سياقتى جوبالاردىڭ ارقاسىندا فۋتبولدىڭ دامۋى تىڭ سەرپىن الىپ, تالانتتى جاستار قاتارعا قوسىلاتىنىنا سەنىمدىمىن. جىلدان جىلعا جوبانىڭ اۋقىمى كەڭەيە تۇسەتىنى بەلگىلى. اسىرەسە شالعاي ەلدى مەكەندەردەگى تاسادا قالعان جاستار «جارىققا» شىعىپ, ەل فۋتبولىن العا سۇيرەيدى دەگەن ءۇمىت مول. ءبىز ءوز تاراپىمىزدان ارىپتەستىك تانىتىپ, بارىنشا قولداۋعا ءازىرمىز.
– ءسىزدى فۋتبول الاڭىنان كورمەگەنىمىزگە كوپ بولدى. نە دەسەك تە, تاريحتا ەسىمىڭىز التىن ارىپپەن جازىلدى. فيفا-نىڭ ۇزدىك تورەشىسى اتانۋ باق پا الدە ەڭبەكتىڭ وتەۋى مە؟
– ۇزدىك بىلاي تۇرسىن, فيفا-نىڭ تورەشىسى اتانۋ ۇلكەن ابىروي. الەمدىك دەڭگەيدەگى ماتچتارعا قازىلىق ەتۋ باقىتى بۇيىرسا, ەڭبەگىڭنىڭ ەلەنگەنى. ءارى ۇلكەن امانات ارقالاعانىڭ. ءوز باسىم تورەشى اتانعاننان بەرى فيفا-نىڭ رەفەريى بولۋدى ارماندادىم. ول ءۇشىن الدىڭعى بۋىن تورەشىلەردىڭ ويىنداعى ءار ءىس-قيمىلىن باقىلادىم. سول ۋاقىتتا پەرالۋيدجي كوللينا, ماركۋس مەرك سياقتى تورەشىلەردىڭ اتاعى دۇركىرەپ تۇرعان ەدى. ولار سياقتى كەم دەگەندە ءبىر كەزدەسۋگە جوعارى دەڭگەيدە قازىلىق ەتە الامىن با دەگەن ساۋال مازالايتىن. جولىم بولدى دەسە بولادى. فيفا-نىڭ رەسمي تۇردە تورەشىسى اتانا سالا فينليانديادا وتكەن جاستار اراسىنداعى الەم چەمپيوناتىنا جولداما الدىم. ادەتتە مۇنداي مۇمكىندىك ەشكىمگە بەرىلە بەرمەيدى. كەيىنگى 4 جىلدا 40-تان استام حالىقارالىق ويىندا باس تورەشى بولدىم. ودان كەيىن الەم چەمپيوناتتارىنىڭ كەزدەسۋلەرىنە تورەشىلىك ەتۋ سەنىپ تاپسىرىلدى. ارينە, باقپەن بىرگە ماڭداي تەردىڭ دە وتەۋى دە بولار. ءوزىمدى دامىتۋ ءۇشىن حالىقارالىق تاجىريبەگە سۇيەنىپ, ىزدەنىپ, جاتتىعىپ, ءار كەزدەسۋدەن سوڭ وزىمە ەسەپ بەرىپ وتىردىم.
– سوڭعى ۋاقىتتا ايەل تورەشىلەر ءجيى قازىلىق ەتىپ ءجۇر. «Super Bol» مەن «جەڭىس» كوماندالارى اراسىندا وتكەن كەزدەسۋدە دە قوس قاپتالداعى كومەكشىڭىز ايەلدەر بولدى...
– بۇگىندە ايەلدەر فۋتبولى جۇرتتىڭ نازارىن اۋدارتا باستادى. جۋىردا عانا اياقتالعان ەۋروپا چەمپيوناتى سونىڭ دالەلى. سايكەسىنشە, ايەل تورەشىلەردىڭ دە دەڭگەيى ارتىپ كەلەدى. ەرلەر اراسىنداعى كەزدەسۋگە ايەل تورەشى تاعايىندالۋىنىڭ ەش ابەستىگى جوق دەپ ەسەپتەيمىن. كەرىسىنشە فۋتبولشىلار اشۋعا بوي الدىرماي, كەزدەسۋ بارىسى جايلى وتەدى دەپ ويلايمىن. بۇل تاجىريبەنى وزبەكستان فۋتبول فەدەراتسياسىنا دا ەنگىزۋدى قولعا الىپ جاتىرمىز.
– تاجىريبە دەمەكشى, بۇگىندە VAR جۇيەسىنە كوشۋ تولىققاندى جۇزەگە اسىپ جاتىر. مۇنداي جاڭاشىلدىققا كوزقاراسىڭىز قالاي؟
– 2010 جانە 2014 جىلى وتكەن الەم چەمپيوناتىندا VAR جۇيەسى بولعان جوق. دەسە دە جاڭا جۇيەنىڭ «راحاتىن» سەزىنىپ ۇلگەردىك. 2016 جىلى توكيو قالاسىندا وتكەن كلۋبتىق چەمپيوناتتا تاجىريبە رەتىندە ەنگىزىلگەن بولاتىن. ءاۋ باستا تۇسىنبەۋشىلىك بولعانى راس. قازىردىڭ وزىندە كەيبىرەۋلەر بۇعان ۋاقىت كوپ جۇمسالىپ, سالدارىنان ويىننىڭ جىلدامدىعى باسەڭدەپ, ادەمى فۋتبولدىڭ شىرقى بۇزىلادى دەپ ەسەپتەيدى. كەيبىر ماڭىزدى كەزدەسۋلەردە تورەشىنىڭ ءبىر عانا قاتەلىگى ويىن تاعدىرىن شەشىپ, قاي كوماندانى بولماسىن التىننان ايىرۋى مۇمكىن. بۇل رەتتە, ءادىل شەشىم قابىلداۋ ءۇشىن جۇيەنىڭ تيىمدىلىگى زور. ەندىگى جەردە قانداي دا ءبىر شەشىمدى قابىلداۋدا كوپ ۋاقىت جۇمسالماۋ ءۇشىن بەينەكامەرالاردىڭ سانىن ارتتىرىپ, دۇرىس راكۋرستاردان ءتۇسىرۋ ماڭىزدى.
– اڭگىمەڭىزگە راحمەت.
اڭگىمەلەسكەن
ورالحان احماديا,
«Egemen Qazaqstan»
