ينۆەستيتسيالىق جوبانىڭ قۇنى – شامامەن 5 ملرد تەڭگە. قۇرىلىس جۇمىستارى ەكى كەزەڭنەن تۇرادى. جوباعا سايكەس ەمدىك ءساناتوريدى 2027 جىلعا دەيىن سالۋ جوسپارلانعان. ونىڭ ناتيجەسىندە كولدىڭ جاعاجايى كوركەيتىلىپ, سۋعا تۇسۋگە ارنالعان گلەمپينگتەر سالىنادى. ەڭ باستىسى, بالشىقپەن ەمدەۋدى كوزدەيتىن ارنايى باسسەينمەن جاراقتالاتىن ساۋىقتىرۋ كەشەنىن ىسكە قوسۋ جوبالانىپ وتىر. سونداي-اق ءدال وسى جەردە ەكو-قوناقۇيلەر, مەيرامحانالار جانە اتپەن سەرۋەندەۋگە ارنالعان ورتالىقتىڭ جۇمىسىن جولعا قويۋ كوزدەلۋدە.
«كەلەر جىلى قۇرىلىس جۇمىستارىنىڭ ءبىرىنشى كەزەڭى باستالادى. ەكىنشى كەزەڭدە كۇردەلى قۇرىلىس جۇمىستارىن ىسكە اسىرۋ كوزدەلىپ وتىر. جوبالاۋ جۇمىستارىن باستاپ كەتتىك. قازىر دەمالىس ايماعىنا بارساڭىز, كولدىڭ ماڭىنداعى بەيبەرەكەتتىلىكتى بايقايسىز. جەر ۋچاسكەسىنىڭ قۇجاتى راسىمدەلگەن. ءبىز بارلىعىن ەۋروپالىق ساپاعا سايكەس سالعىمىز كەلەدى. بىراق بەلگىلى ءبىر قيىندىقتار بار – 11 گەكتار جەر ينۆەستيتسيالىق جوباعا كىرگەنىمەن, بۇل اۋماقتا جوباعا كەدەرگى كەلتىرەتىن جەكەمەنشىكتەگى ەكى ۋچاسكە بار. بۇل ورايدا ينۆەستيتسيالىق جوبا بۇكىل جاعالاۋدى قامتۋ ءۇشىن تەڭ قۇقىلى ايىرباس جاساۋعا نيەتتىمىز», دەدى جوبانىڭ جەتەكشىسى اسقار يجانوۆ.
ايتسە دە اباي وبلىسىنىڭ اكىمى نۇرلان ۇرانحاەۆ تەڭ قۇقىلى ايىرباستى تەك مەملەكەتتىڭ مەنشىگىندەگى نىسانمەن عانا جۇرگىزۋگە بولاتىنىن جەتكىزدى. بۇدان باسقا ينۆەستور جول مەن تۇششى سۋدىڭ ماسەلەسى رەتتەۋدى قاجەت ەتەتىنىن ايتتى. ءوڭىر باسشىسىنىڭ ايتۋىنشا, بەسقاراعاي اۋدانىنىڭ تۋريستىك الەۋەتى زور. تەك جول-كولىك ينفراقۇرىلىمىن جاڭعىرتىپ, ينۆەستيتسيالىق كليماتتى جاقسارتۋ قاجەت.
«وسىدان 15-20 جىل بۇرىن موڭعولياعا ساپارلاپ قايتقان ەدىم. اتالعان ەلدە ينفراقۇرىلىم جاقسى دامىعان دەپ ايتا المايمىن. بىراق سوعان قاراماستان بۇل مەملەكەتكە باراتىن تۋريست كوپ. ريۋكزاكتى ارقاسىنا اسىپ الىپ, كورىكتى جەرلەردى ارالاپ جۇرە بەرەدى.
الايدا قازىر قاجەتتى ينفراقۇرىلىم قاراستىرىلماسا, بۇل باعىتتى دامىتۋ قيىن. مىسالى, بەسقاراعايدا ينۆەستورلار شوشقالى كولىنىڭ ماڭىنان ەمدىك شيپاجايدى سالۋدى جوسپارلاپ وتىر. بۇل ءوز كەزەگىندە ىشكى جانە سىرتقى تۋريزمگە قان جۇگىرتەدى دەپ ويلايمىز. البەتتە, قازىر الەمدە ەكولوگيالىق ءتۋريزمنىڭ كەڭ ەتەك جايعانىنان حاباردارمىز. دەسە دە ەكوتۋريستەردى وڭىرىمىزگە تارتقىمىز كەلسەك, ولار ايالداپ تىنىعا الاتىنداي ورىنداردى جان-جاقتى ويلاستىرۋىمىز كەرەك دەپ ەسەپتەيمىن», دەدى ن.ۇرانحاەۆ.
شوشقالى كولى ءوزىنىڭ ەمدىك قاسيەتتەرىمەن ەرەكشەلەنەدى. جىل سايىن كولگە كورشىلەس پاۆلودار وبلىسى مەن رەسەيدىڭ رۋبتسوۆسك, بارناۋل, ءنوۆوسىبىر قالالارىنان كەلەتىن تۋريستەر ۇزىلمەيدى. الايدا كولدىڭ ماڭى زامان تالابىنا ساي اباتتاندىرىلماعان. جەرگىلىكتى حالىق وسى ماسەلە قولعا الىنسا, جاڭا جۇمىس ورىندارى اشىلىپ, اۋداننىڭ كوركەيۋىنە سەپتىگىن تيگىزەر ەدى دەپ سانايدى.
اباي وبلىسى,
بەسقاراعاي اۋدانى
