سپورت • 18 تامىز، 2022

چەمپيون بولۋدى ارماندايمىن – دەيدى دزيۋدودان ازيا چەمپيوناتىنىڭ ەكى دۇركىن كۇمىس جۇلدەگەرى ءابيبا ابۋجاقىنوۆا

99 رەت كورسەتىلدى

بىلتىر اسا جەڭىل سالماق دارەجەسىندە ونەر كورسەتكەن بەلدى بالۋان، ريو وليمپياداسى مەن الەم چەمپيوناتىنىڭ ەكى دۇركىن قولا جۇلدەگەرى وتگونتسەتسەگ گالبادراح ۇلكەن سپورتتان قول ۇزگەننەن كەيىن «ەندى جۋىق ارادا وعان لايىقتى ءىزباسار تابىلا قويار ما ەكەن؟» دەپ قوبالجىعانىمىز راس. ءيا، موڭعوليادان قونىس اۋدارىپ كەلگەن قارشىعاداي قىز بىرنەشە جىل بويى قازاقستاننىڭ ايەلدەر دزيۋدوسىن جالعىز ءوزى ورگە سۇيرەگەنىن جانكۇيەرلەر جاقسى بىلەدى. بىراق قوبالجۋىمىز بەكەر ەكەن. سوڭعى كەزدەرى ءدال سول 48 كيلو سالماقتا ءابيبا ابۋجاقىنوۆا ورەلى ونەرىمەن كوزگە ءتۇسىپ ءجۇر. ول جۋىردا نۇر-سۇلتاندا وتكەن قۇرلىقتىڭ باستى دوداسىندا كۇمىس مەدال يەلەندى. اتالعان جارىس اياقتالعاننان سوڭ ونىمەن از-كەم اڭگىمەلەسكەن ەدىك.

– ءابيبا، اۋەلى ءوزىڭدى «ەگە­مەن قازاقستان» گازەتىنىڭ قا­لىڭ وقىرماندارىمەن جا­قى­نىراق تانىستىرا كەتسەڭ.

– مەن 1997 جىلى وزبەك­ستاننىڭ تاشكەنت وبلىسىنا قاراستى شىرشىق قالاسىندا دۇنيەگە كەلدىم. بالاۋسا شاعىم­دا انام كوركەم گيمناستيكاعا بەردى. ءبىر جىلداي جاتتىققان سوڭ ءوزىمنىڭ قالاۋىم بويىنشا دزيۋدوعا اۋىستىم. ءاۋ باستا اكە-شەشەم بۇل تاڭداۋىمدى قۇپ­تامادى. «قىز بالاعا الىسىپ-ج ۇلىسۋ جاراسپايدى. ءبىر جەرىڭدى زاقىمداپ الاسىڭ»، دەپ قارسى­لىق ءبىلدىردى. بىراق مەن العان بە­تىمنەن قايتپاي، جاتتىعۋىمدى جالعاستىرا بەردىم. وسى ونەر­دىڭ قىر-سىرىن وزبەكستاندا تۇرا­تىن قازاق باپكەرى باقىتجان جۇمانوۆتان ۇيرەندىم. ۋاقىت وزا ءتۇرلى جارىسقا قاتىسىپ، جۇلدەلى ورىنداردى يەلەنە باس­تادىم. سول كەزدە عانا اتا-انام­نىڭ كوڭىلدەرى ءجىبىپ، ماعان اق باتالارىن بەردى.

– قازاقستانعا قاي كەزدە قونىس اۋداردىڭدار؟

– 2014 جىلى شەكارا اسىپ، شىمكەنت قالاسىنا قونىس­تاندىق. اكە-شەشەم سول جاقتا قالدى، مەن الماتىعا اتباسىن بۇرىپ، رەسپۋبليكالىق سپورت كوللەدجىنە وقۋعا ءتۇستىم. ول جەردە كەزىندە ازيا ويىندارى مەن قۇرلىق چەمپيوناتىندا جۇلدەگەر اتانعان تانىمال دزيۋدوشى، بىلىكتى باپكەر نۇربول سۇلەيمەنوۆتەن ءتالىم-تاربيە الدىم. قازىرگى كەزدە اتىراۋ قالاسىندا مەيىرجان ەسماعامبەتوۆتىڭ قول استىندا جاتتىعامىن.

– العاش رەت سەن 2017 جى­لى حورۆاتيانىڭ استاناسى – زاگرەبتە وتكەن جاس­تار اراسىنداعى الەم بىرىنشى­لىگىن­دە جارق ەتىپ كوزگە ءتۇسىپ، كۇمىس مەدال يەلەندىڭ. سول جارىس جايىندا اڭگىمەلەپ بەرسەڭ.

– زاگرەبتە بەس كەزدەسۋ وتكى­زىپ، حورۆاتيا، رەسەي، بەلگيا جانە برازيليانىڭ بالۋاندارىن جەڭدىم. فينالدا ءوزىمنىڭ جىبەرگەن ورەسكەل قاتەلىگىمنىڭ سالدارىنان جاپون قىزىنا ەسە جىبەردىم. سول جارىستا مەن تىك تۇرىپ كۇرەسۋ بارىسىندا قار­سى­لاستارىما «اۋىرتۋ» ءادىسىن ءسات­تى قول­دانىپ، كوپشىلىكتىڭ نازا­رىن وزىمە اۋداردىم. ون­داي ءتاسىلدى ەكىنىڭ ءبىرى جاساي بەر­مەي­تىن. الايدا جاپونيالىق سپورتشىنىڭ بويى تىم الاسا بولعاندىقتان، وعان قارسى بۇل ءادىسىم وتپەدى. وسىلايشا، كۇمىس مەدالدى قاناعات تۇتۋىما تۋرا كەلدى. كەيىننەن بۇل ءادىستى اسا قاۋىپتى دەپ ساناپ، دزيۋدو كۇرەسىنەن الىپ تاستادى.

– بىلتىر بىشكەكتە وتكەن ازيا چەمپيوناتىندا قازاق­ستاننىڭ بالۋاندارى بار-جو­عى ءۇش جۇلدەگە يەلىك ەتتى. ەلدوس جۇماحانوۆ پەن سەۆارا نىشانباەۆا قولا مەدال ەن­شىلەسە، جالعىز سەن عانا في­نالعا شىقتىڭ. شەشۋشى تۇستا جەڭىسكە جەتۋىڭە نە كەدەرگى بولدى دەپ ويلايسىڭ؟

– قارسىلاستارىمدى تەگىستەي ۇتىپ كەلە جاتىپ، اقتىق سىندا لي يانانمەن بەلدەستىم. قىتاي دزيۋ­دوشىسى وعان دەيىن قۇرلىق چەم­پيونى اتانىپ، گراند سلەم مەن گران-پري جارىستارىندا بىر­نەشە مارتە جەڭىس تۇعىرىنا كو­تەرىلگەن. ياناندى جەڭىپ جاتىپ، قاتەلىككە بوي الدىردىم. ول ءوز مۇمكىندىگىن ءمۇلت جىبەرگەن جوق.

– بىشكەكتە جەڭىپ العان كۇمىس مەدالىڭدى نۇر-سۇلتاندا التىنعا ايىرباستاعىڭ كەلگەن شىعار...

– ءيا، ونداي وي بولدى. بيىلعى ازيا چەمپيوناتىندا تايپەيلىك لين چەن-حاو مەن موڭعوليالىق نارانتسەتسەگ گانبااتاردى جەڭگەن سوڭ فينالدا ۆاكانا كوگامەن كۇش سىناستىم. بۇل بالۋان­نىڭ ەسىمى جانكۇيەرلەرگە جاقسى تا­نىس. ول 2019 جىلى جاستار اراسىندا الەم چەمپيونى اتانىپ، بىلتىر بۋداپەشتتە وتكەن ايەلدەردىڭ دۇنيەجۇزىلىك دوداسىندا كۇمىس مەدال يەلەندى. نەگىزى ونى جەڭۋگە بولاتىن ەدى. سەبەبى مەن سولاقايمىن. سو­لا­قاي بالۋاندارمەن بەلدەس­كەن­دە كوگانىڭ ءبىراز قيپاقتاپ قالاتىنىن جاقسى بىلەمىن. بىراق شەشۋشى تۇستا مەنىڭ جوسپارىم جۇزەگە اسپادى. ابايسىزدا ونىڭ قاقپانىنا ءتۇسىپ قالدىم. وسىلايشا، قاتارىنان ەكىنشى جىل ازيا چەمپيوناتىنىڭ كۇمىس مەدالىن قاناعات تۇتتىم.

– اڭگىمەڭە كوپ راحمەت، ءابيبا. الداعى جارىستاردا ساعان ساتتىلىك تىلەيمىز.

– سىزگە دە كوپ راحمەت! بۇ­يىرت­سا، بيىل تاشكەنتتە شى-
­مى­ل­دىعى تۇرىلەتىن الەم چەم­پيو­­نا­­تىندا جەڭىس تۇعىرىنا كوتەرى­لۋ ءۇشىن بارىمدى سالامىن. باي­­راق­تى باسەكەلەردە مە­نىڭ التىن­­نان القا تاعاتىن كۇن­دەرىم ءالى الدا دەپ ويلايمىن.

 

اڭگىمەلەسكەن

عالىم سۇلەيمەن،

«Egemen Qazaqstan»

سوڭعى جاڭالىقتار

ەلوردادا Astana Marathon-2022 وتەدى

ەلوردا • بۇگىن، 12:16

سوماليدە جارىلىس بولدى

الەم • بۇگىن، 10:25

بۇگىنگى ۆاليۋتا باعامى

قارجى • بۇگىن، 10:13

ەكىنشى ورىنعا تابان تىرەدى

سپورت • بۇگىن، 07:32

وۆەرتايمدا جەڭدى

حوككەي • بۇگىن، 07:30

ۇقساس جاڭالىقتار