ۇكىمەت • 16 تامىز، 2022

ءاليحان سمايىلوۆ ديزەل وتىنىنا قاتىستى ماسەلەنى شەشۋدى تاپسىردى

443 رەت كورسەتىلدى

قر پرەمەر-ءمينيسترى ءاليحان سمايىلوۆ ۇكىمەت وتىرىسىندا ىشكى نارىقتى جانار-جاعارماي ماتەريالدارىمەن قامتاماسىز ەتۋ بويىنشا تاپسىرما بەردى، دەپ حابارلايدى Egemen.kz primeminister.kz-كە سىلتەمە جاساپ.

كوللاج: egemen.kz

ۇكىمەت باسشىسى كەيبىر وڭىرلەردە ديزەلدىك وتىن بويىنشا پروبلەما تۋىنداپ وتىرعانىن اتاپ ءوتتى.

«بۇل ازاماتتارىمىزدىڭ نارازىلىعىن تۋدىرۋدا. ەگىس ناۋقانى باستالار الدىندا مۇنداي پروبلەما قالاي ورىن الىپ وتىر؟»،  دەدى ءاليحان سمايىلوۆ ەنەرگەتيكا مينيسترىنە. 

ءوز كەزەگىندە بولات اقشولاقوۆ ديزەل وتىنىنا جوعارى سۇرانىستى جابۋ ءۇشىن بارلىق رەسۋرستاردىڭ ءبىرىنشى كەزەكتە اۋىل شارۋاشىلىعى تاۋارىن وندىرۋشىلەر مەن جقس-عا بولىنەتىنىن حابارلادى. ونەركاسىپ كاسىپورىندارى مەن قتج ءۇشىن وتىن قالدىقتارى ەكىنشى كەزەكتە بولىنەتىن بولادى، ال جەتىسپەگەن جاعدايدا قاجەتتى كولەم يمپورتتالماق.

بۇدان بولەك، مينيسترلىك شەكارا پەريمەترى بويىنشا ترانزيتتىك كولىك ءۇشىن ديزەل وتىنىنا سارالانعان باعا بەلگىلەۋدى كوزدەيتىن بۇيرىق جوباسىن ازىرلەدى. باعالار تۇرعىلىقتى جەرىنە، تۇتىنۋ كولەمىنە جانە كولىك تۇرىنە قاراي سارالانادى.

ماسەلەن، قازاقستاندىقتار ءۇشىن جۇرگىزۋشى كۋالىگى بولعان جاعدايدا، قازىرگى باعا – 230-260 تەڭگە بويىنشا ليميت تاۋلىگىنە 100 ليتر ديزەل وتىنىن قۇرايدى، قازاقستاندا تىركەلگەن جۇك كولىگى ءۇشىن – تاۋلىگىنە 300 ليتر. قالعان ادامدار توبىنا، سونداي-اق كورسەتىلگەن كولەمنەن ارتىق ديزەل وتىنى ءۇشىن 1 ليتر 450 تەڭگەدەن ساتىلاتىن بولادى.

باياندامانى تىڭداپ بولعاننان كەيىن ۇكىمەت باسشىسى ەنەرگەتيكا مينيسترلىگىنە وتاندىق نارىقتا جانار-جاعارماي تاپشىلىعىن بولدىرماۋ ءۇشىن بارلىق شارالاردى ۋاقىتىلى قابىلداۋدى تاپسىردى.

«جانارماي قۇيۋ ستانتسيالارىنىڭ يەلەرىمەن ءتيىستى جۇمىستار جۇرگىزۋ كەرەك. ازاماتتارىمىز بەن اۋىل شارۋاشىلىعى سالاسى زارداپ شەكپەۋى كەرەك. بولات ورال ۇلى، جاعدايدى كۇندەلىكتى جەكە باقىلاۋىڭىزدا ۇستاڭىز»، دەپ تاپسىرما بەردى پرەمەر-مينيستر. 

سوڭعى جاڭالىقتار

ۇقساس جاڭالىقتار