ەلىمىزدىڭ تۇكپىر-تۇكپىرىنەن 40 قۇرىلىسشى شاقىرىلىپ, ولاردىڭ ىشىندە 5 قۇرىلىسشىعا – «قازاقستاننىڭ قۇرمەتتى قۇرىلىسشىسى», 30 قۇرىلىسشىعا – «قازاقستاننىڭ ەڭبەك سىڭىرگەن قۇرىلىسشىسى» اتاعى مەن توسبەلگىسى تاپسىرىلدى, سونداي-اق اتالعان سالاداعى 7 مامان قازاقستان قۇرىلىسشىلار وداعىنىڭ العىس حاتتارىمەن جانە كاسىبي اتالىمدارىمەن ماراپاتتالدى. «ەڭبەك سىڭىرگەن قۇرىلىسشى» قۇرمەتىنە 30 مامان, ال قالعان نوميناتسيالارعا قاراپايىم جۇمىسشىلار يە بولدى. سونىمەن قاتار ەلەۋلى ەڭبەكتىڭ ناسيحاتتالۋى ءۇشىن «قۇرمەتتى پروراب», «قۇرمەتتى كران ءماشينيسى», «قۇرمەتتى شەبەر» نوميناتسيالارى بويىنشا دا توسبەلگىلەر ءوز يەلەرىن تاپتى. قازاقستان قۇرىلىسشىلار وداعى ەلىمىزدىڭ باسقا وڭىرلەرىندەگى قۇرىلىسشىلاردى دا نازاردان تىس قالدىرمادى. رەسپۋبليكا بويىنشا 40 ناگرادا مەن العىس حات اتالعان ءىس-شاراعا كەلە الماعان وڭىرلەردەگى قۇرىلىسشىلارعا جولداندى.
«قۇرمەتتى قۇرىلىسشى» اتانعان ميرام بايديلدين, سەيفۋللا جاڭاباەۆ, سەرىكباي ومارقاس, تەمىرالى وتەمۇرات جانە سەرگەي تراپەزنيكوۆ ەل ەكونوميكاسىنىڭ كۇرەتامىرى قۇرىلىس بولعاندىقتان, ارىپتەستەرىنىڭ ەڭبەگى قانداي باعاعا دا لايىقتى ەكەنىن اتاپ ءوتتى.
بۇگىنگى تاڭدا بۇل وداققا وسى سالاداعى 1 200-دەن استام كاسىپورىن سەنىم ارتىپ, ولاردىڭ 250 مىڭنان استام مۇشەسىن قامتىپ وتىر. وداقتىڭ باستى ماقساتى – بيزنەستى دامىتۋ. ويتكەنى قۇرىلىس ەل ەكونوميكاسىنىڭ دامۋىنا اسەر ەتەتىن جەتەكشى سالالاردىڭ ءبىرى بولىپ سانالادى.
سالتاناتتى جيىندا ەلىمىزدىڭ بەتكەۇستار قوعام قايراتكەرلەرى, سپورت شەبەرلەرى, بۇقارالىق اقپارات قۇرالدارى وكىلدەرى قاتىستى. كەشتىڭ كوركىن ۇلتتىق ناقىشتاعى ساز اسپاپتار ءانسامبلى مەن باسقا دا ساحنا شەبەرلەرى كىرگىزە ءتۇستى.
قۇرىلىسشىلار وداعىنىڭ تورالقا توراعاسى تالعات ەرعاليەۆ الداعى ۋاقىتتا جاس جەتكىنشەكتەردى قازاقستان بويىنشا اتالعان ەڭبەك تۇرىنە باۋلۋعا تىڭ جوبا دايىنداپ جاتقانىن جەتكىزدى. كەلەشەك جاستاردىڭ قولىندا ەكەندىگىن ەسكەرسەك, ەلىمىزدىڭ ساۋلەت ونەرىنەن كۇتەتىن ءۇمىت زور. قۇرىلىسشى ماماندىعى – قىراعىلىق پەن شەبەرلىك, تالانت پەن تالعامدى تالاپ ەتەتىن ەلەۋلى ماماندىقتاردىڭ ءبىرى دە بىرەگەيى. قۇرىلىسشىنىڭ قولتاڭباسى قالعان عيماراتتار – سول قوعامنىڭ ومىرىنەن سىر شەرتەتىن ەرەكشە دەرەككوزى دەسەك ارتىق ەمەس.
– الدىمىزدا ۇلكەن مىندەتتەر تۇر. الداعى جەتى جىلدا تاعى 10 ميلليونداعان پاتەر تاپسىرۋ قاجەت. سوندىقتان ەڭبەك اۋقىمى وتە ۇلكەن. بۇل جاس ۇرپاقتى اتالعان سالاعا تاربيەلەپ, قۇرىلىسقا قاجەتتى جاس مامانداردى وقىتۋدى, ماماندىقتىڭ تانىمالدىلىعىن, ەڭبەككە دەگەن قۇرمەتتى ارتتىرۋدى قاجەت ەتەدى. سەبەبى اپتاپتا دا, ايازدا دا قۇرىلىس ەش توقتاماۋى ءتيىس. ءبىزدىڭ ۇيىم قازىر وسى ماسەلەمەن شۇعىلدانۋدا, – دەدى ت.ەرعاليەۆ.
«اتامەكەن» ۇكپ تورالقاسىنىڭ تۇرعىن ءۇي-كوممۋنالدىق شارۋاشىلىعى جانە قۇرىلىس كوميتەتىنىڭ توراعاسىنىڭ مىندەتىن اتقارۋشى يرينا مانجانوۆا جارتى عاسىردان استام ۋاقىت اتاپ ءوتىلىپ كەلە جاتقان قۇرىلىسشىلار كۇنى ەڭبەك اۋلەتتەرىنىڭ مەرەيىن وسىرەتىنىن, قازىرگى پاندەميا, ەكونوميكالىق داعدارىستارعا قاراماستان وتاندىق قۇرىلىسشىلار اتالعان سالانى العا جەتەلەپ كەلە جاتقانىن اتاپ ءوتتى.
