ەلباسى نۇرسۇلتان نازارباەۆ استانادا قازاقستان قارۋلى كۇشتەرىنىڭ سالتاناتتى اسكەري شەرۋىندە تاۋەلسىز ەلدە تۇرۋعا, بەيبىت ءومىر سۇرۋگە مۇمكىندىك سىيلاعان, تاريحتا قايتالانباس ورنى بار قاھارمان, ەرجۇرەك باتىرلاردى ناسيحاتتاۋ جونىندە تاپسىرما جۇكتەدى. مەملەكەت باسشىسىنىڭ سوزىمەن ۇندەسكەن ۇلكەن شارا شىعىس وڭىرىندە ءوتتى.
وسكەمەندە قازاق حالقىنىڭ ايگىلى قولباسشىسى, ەل مەن جەردى جاۋدان ازات ەتۋدە اتى اڭىزعا اينالىپ, «حان باتىر», «دارابوز» اتانعان قابانباي باباعا ۇلكەن ەسكەرتكىش قويىلدى. وتان قورعاۋشى كۇنىندە وبلىس ورتالىعىنا كىرەبەرىس جول شەتىندەگى بيىك قىراتتا سالتاناتتى تۇردە اشىلعان باتىر بابا ءمۇسىنى قۋباس اتىمەن بىرگە اسقاقتاپ, كورگەن جاننىڭ رۋحىن جانىدى.
قولادان قۇيىلعان ەسكەرتكىشتىڭ بيىكتىگى – 13 مەتر. ەسكەرتكىش اۆتورى – بەلگىلى ءمۇسىنشى نۇرلان دالباي. استانا قالاسىنداعى «بالقىتۋ» جشس-ىندە قۇيىلعان ەسكەرتكىشتى قۇيۋ مەن ورناتۋ جۇمىستارىنا رەسپۋبليكالىق بيۋدجەتتەن 105 ميلليون تەڭگە بولىنگەن بولاتىن. سونداي-اق, ەسكەرتكىش ماڭايىن كورىكتەندىرۋ, اباتتاندىرۋ جۇمىستارىنا قالا بيۋدجەتىنەن 30 ميلليون تەڭگە ءبولىندى.
ەسكەرتكىشتىڭ اشىلۋ سالتاناتىنا وبلىس اكىمى بەردىبەك ساپارباەۆ باستاعان ءوڭىر جۇرتشىلىعىمەن بىرگە, مادەنيەت مينيسترلىگىنىڭ جاۋاپتى حاتشىسى قۋاتجان ۋاليەۆ, مەملەكەتتىك سىيلىقتىڭ لاۋرەاتتارى: اقىن ۇلىقبەك ەسداۋلەت پەن نەسىپبەك ايت ۇلى, قابانباي باتىر كەسەنەسىنىڭ شىراقشىسى, پروفەسسور كامال ابدراحمان جانە الماتى وبلىستىق ءماسليحاتىنىڭ حاتشىسى ەرمەك كەلەمسەيىت باستاپ جەتىسۋ جەرىنەن ارنايى كەلگەن دەلەگاتسيا قاتىستى.
دۋمان اناش,
«ەگەمەن قازاقستان».
ءتاجىن كيىپ داڭقتىڭ
نەسىپبەك ايت ۇلى, مەملەكەتتىك سىيلىقتىڭ لاۋرەاتى. كوتەرىلدى ءور تۇلعاڭ تاس تۇعىرعا تاعى دا, تۋعان ۇلسىڭ, ەر بابا, قازاعىڭنىڭ باعىنا! ءتاجىن كيىپ داڭقتىڭ, توڭىن بۇزىپ تاريحتىڭ, باتىرلىقتىڭ ءوزىڭسىڭ قونعان التىن تاعىنا. كوكتەي ءوتىپ جىلداردى داۋىلداتىپ باسىلعان, سەنىڭ اتىڭ كوشەدى عاسىرلارعا عاسىردان. تۇلپارىڭنىڭ ءدۇبىرى قۇلاعىندا ءداۋىردىڭ, قالىڭ جاۋدى توڭكەرىپ التاي تاۋدان اسىرعان. قاسىرەتتى الاستاپ, قياناتتى قاقپايلاپ, حالقىڭ وتىر باقىتتىڭ بەلدەۋىنە ات بايلاپ, بوستاندىعىن قازاقتىڭ بار الەمگە ايگىلەپ, سەنىڭ رۋحىڭ – توبەمدە جەلبىرەگەن كوك بايراق! ايبات شەگىپ دۇشپانعا ەل-جۇرتىڭا قاس قىلعان, تۇرا بەرەر قاسقايىپ قاسيەتتى تاس تۇلعاڭ! جەلەپ-جەبەپ قولدادىڭ – ۇرپاعىڭدى قورعادىڭ, جەلتوقساندا كەشەگى جانارىنا جاس تۇنعان!.. جاماعاتتى جينالعان جالت قاراتىپ سوزىمە, ارۋاعىڭدى شاقىرسام, كورىنەر مە كوزىمە؟! اتامەكەن توسىندە الشاڭ باسقان الاڭسىز, بۇكىل قازاق قارىزدار ماڭگى-باقي وزىڭە!..
