قازاقستاندا كۇن ساۋلەسىمەن جۇرەتىن اربا جاسالدى

قازاقستان ونەرتاپقىشتارى كۇن ساۋلەسىمەن جۇرەتىن, مۇگەدەكتەرگە ارنالعان اربا جاساپ شىعاردى. ونى حالىقارالىق قازاق-تۇرىك ۋنيۆەرسيتەتىنىڭ عالىمدارى ومىرگە كەلتىردى. بۇل وقۋ ورنىنىڭ بۇدان 22 جىل بۇرىن قازاقستان پرەزيدەنتى نۇرسۇلتان نازارباەۆ پەن تۇركيا باسشىسى سۇلەيمەن دەميرەلدىڭ ورتاق مامىلەگە كەلۋلەرى ارقاسىندا اشىلعانى ءمالىم. مىنە, وسى وقۋ ورنىنىڭ وقى­تۋ­شىلار قاۋىمى ەلباسىنىڭ «قا­زاقستان-2050» ستراتەگياسىندا عىلىمعا قاتىستى اتاپ كورسەتىلگەن قاعيداتتارعا ەرەكشە نازار اۋداردى. ال اتالمىش قۇجاتتا ەلىمىزدىڭ ۇزدىك 30 مەملەكەتتىڭ قاتارىنا قوسىلۋى ءۇشىن يننوۆاتسيالىق جۇيەلەردىڭ تيىمدىلىگىن ارتتىرىپ, عىلىم مەن ءبىلىم ساپاسىن جاقسارتۋعا زور كوڭىل بولىنگەن بولاتىن. تۇركىستاندىق ۇستازدار بىردەن قازىرگى زاماننىڭ العا قويىپ وتىرعان وزەكتى ماسەلەسى توڭىرەگىندە ىزدەنۋگە كۇش سالدى. سونىڭ ناتيجەسىندە جوعارىدا ايتىلعان قولاربا دۇنيەگە كەلدى. قازىر بۇل وقۋ ورنىنىڭ كورپۋستارىن بالامالى ەلەكتر قۋاتىنا كوشىرۋ جونىندە جۇمىستار جاسالىپ جاتىر. وسى 22 جىلدىڭ ىشىندە ۋني­ۆەر­سيتەتتى 100 مىڭعا جۋىق تۇلەك ءبى­تىرىپ شىقتى. قازىر ولار ەلىمىزدىڭ ءار تۇكپىرىندە ءتۇرلى سالادا ەڭبەك ەتىپ ءجۇر. بۇگىندە وقۋ ورنىندا 26 مەملەكەتتەن 10 مىڭنان استام ستۋدەنت ءبىلىم الۋدا. مۇندا عىلىمي-يننوۆاتسيالىق جوبالارعا دا ەرەكشە كوڭىل بولىنگەن. ۋنيۆەرسيتەت عالىمى فەرحاد چايىر ۇزاق جىلداردان بەرى كۇن نۇرىنان قۋات الاتىن بىرنەشە جوبانى جۇزەگە اسىردى. ال تۇركيا تاراپىنىڭ قارجىلاندىرۋىمەن ىسكە اسقان ءتورتىنشى ەڭبەگى مۇگەدەك جاندار ءۇشىن تاپتىرماس قۇرال بولدى. العاشقى اربانى وقۋ ورنىنىڭ باسشىلارى كەنتاۋ قالاسىنىڭ تۇرعىنى جانىبەك بەردىمۇراتوۆقا تەگىن سىيعا تارتتى. اعاشتان بۇيىم­دار جاساۋمەن اينالىساتىن جاس كاسىپكەرگە بۇل ۇلكەن دەمەۋ بولدى. مۇرات ايتقوجا.