قازاعىمنىڭ ەل قورعاعان ساردارى!
وتانىنا بەيبىت نۇرىن شاشاتىن.
تۇراقتىلىق, تىنىشتىقتىڭ ساقشىسى
قازاعىمنىڭ وفيتسەرى جاساسىن.
تۋعان ەلدىڭ تىنىشتىعىن ساقتاعان,
وتان ءۇشىن تاڭعا كىرپىك قاقپاعان.
وفيتسەرلەر ماقتانىشى ەلىمنىڭ,
بەرگەن انتىن ار الدىندا اقتاعان.
اتىڭدى ەستىپ اتا جاۋىڭ جايراسىن,
باۋىرجاندار نامىسىڭدى قايراسىن.
ساعادات پەن قاسىم قاھارماندارىڭ,
تالعات قىران جاۋعا اسىرعان ايلاسىن.
ادامزاتتىڭ باقىتىنىڭ ولشەمى,
ارقاشاندا ماقتان تۇتار ەل سەنى.
ەگەمەن ەل, ەرتۇرىكتىڭ ەرلەرى –
قازاعىمنىڭ سەرتكە ۇستاعان سەمسەرى.
ازات ەلدىڭ كوك بايراعى قولىڭدا,
اردى قويىپ ەڭ ءبىرىنشى ورىنعا,
تەرىڭدى توك, جانىڭدى دا اياما,
ماڭگىلىككە, ماڭگى ەلدىڭ جولىندا.
جاسا-جاسا بابالاردىڭ ارمانى,
جاسا-جاسا تاۋەلسىزدىك ءار تاڭى.
جاسا-جاسا, جوعارعى باس قولباسشى –
قازاعىمنىڭ ەل قورعاعان ساردارى!
استانا.
ون ءتورت جىلدان بەرى اسكەر قاتارىندامىن
مەن «شىعىس» وڭىرلىك قولباسشىلىعىنا قاراستى اسكەري بولىمدە قىزمەت ەتەمىن. قىزدار ساپىنىڭ الدىڭعى شەبىندە ءجۇرىپ, باعىتتى باستايتىن روتا كومانديرى رەتىندە اسكەري پارادقا وسىمەن ەكىنشى رەت قاتىسقالى وتىرمىن. 2011 جىلى وتكەن اسكەري پارادتا روتا كومانديرى قىزمەتىن اتقارعان بولاتىنمىن. بيىلعى پارادتا دا وسى قىزمەتىمە قايتا تاعايىندالدىم.
پارادقا قاتىسۋشىلاردىڭ تۇرمىستىق جاعدايى وتە جاقسى. ءبىرىنشى رەت قاتىسىپ وتىرعاندارعا اقىلىمىزدى ايتىپ, كومەك قىلامىز. الدىڭعى, ورتاڭعى نەمەسە اياق جاعىنداعى ساپتا تۇرعانداردىڭ شالىس باسقان قيمىلى كورىنبەي قالادى دەۋگە بولمايدى. ءبىر شالىس باسقانىڭ تۇرماق, كوزقاراسىڭنىڭ ءوزى قاراعان ادامعا انىق بايقالىپ تۇرادى. سوندىقتان ءتارتىپ بويىنشا باسىمىز وڭ جاق باعىتقا جانە ءوزىمىز سول جاققا قاراي قاراپ, باعدارلاپ ءجۇرۋىمىز قاجەت. وڭ قاپتالدا تۇرعان ادام جولىمىزدى باعىتتاپ, ءبىزدى الىپ ءجۇرىپ وتىرادى. سونىڭ جۇرىسىنەن جاڭىلىسپاۋعا تىرىسامىز.
اسكەر قاتارىندا ون ءتورت جىلدان بەرى قىزمەت ەتىپ كەلەمىن. «شىعىس» وڭىرلىك قولباسشىلىعىنان 54 اسكەري قىز ىرىكتەلىپ, وسى قالاعا كەلگەندەردىڭ تەك 28-ءى عانا سىننان سۇرىنبەي ءوتىپ, پارادقا قاتىسۋ قۇقىنا يە بولدى. ەكىنشى رەت اسكەري پارادقا قاتىسىپ وتىرعاندىعىمدى ۇلكەن مارتەبە سانايمىن.
جۇلدىز ءىلياسوۆا,
مايور, اسكەري پارادقا قاتىسۋشى.
وتانىمدى قورعاۋ – باستى پارىزىم
– مارات, اسكەري قىزمەتكەر بولۋدى تاڭداپسىڭ, وتباسىڭدا اسكەري ادامدار بار ما ەدى؟
– مەنىڭ اكەم احان 20 جىلىن اسكەري سالاعا ارنادى. سونىڭ ىشىندە كوپ جىل اسكەري كوميسسارياتتى باسقاردى. قازىر زاپاستاعى پولكوۆنيك, ۇنەمى اسكەري كيىممەن سىمداي تارتىلىپ جۇرەتىن اكەمىزگە قاراپ اسكەري سالانىڭ مامانى بولسام دەپ ارمانداۋشى ەدىم. بۇل كۇندەرى سول ارمانىم ىسكە اسىپ, تاۋەلسىز قازاقستاننىڭ قارۋلى كۇشتەرى قاتارىنداعى قىزمەتىمدى ابىرويلى اتقارا باستادىم.
– جوعارى ءبىلىمدى قانداي وقۋ ورنىندا الدىڭ؟
–تۇركىستان قالاسىنداعى №15 م.جۇماباەۆ اتىنداعى مەكتەپ-گيمنازيانى بىتىرگەن جىلى الدىمدا سان تاراۋ جول تۇردى. ءوز ەلىمىزدە دە بىرنەشە اسكەري وقۋ ورنى بار عوي. مەكتەپتە بىرگە وقىعان قاتارلاستارىم باسقا سالانى قالاپ جاتتى. دەگەنمەن, مەن رەسەي فەدەراتسياسى قورعانىس مينيسترلىگىنە قاراستى اسكەري ۋنيۆەرسيتەتتە ءبىلىم الۋدى قالادىم. ونىڭ ۇستىنە رەسەي مەن قازاقستان اراسىندا جوعارى ءبىلىمدى اسكەري مامانداردى دايارلاۋ جونىندە كەلىسىم جاسالعان ەكەن. وسى كەلىسىمگە سايكەس ماسكەۋدەگى اسكەري ۋنيۆەرسيتەتكە وقۋعا تۇسكەن قازاقستاندىق ستۋدەنتتەرگە مەملەكەتتىك وقۋ گرانتى بولىنەدى. مىنە, وسى مۇمكىندىكتى پايدالانۋدى كوزدەدىم. باعىم بار ەكەن, ۇبت قورىتىندىسىندا جوعارى بالل جينادىم. ءسويتىپ, 2007 جىلى ماسكەۋدەگى اسكەري ۋنيۆەرسيتەتكە الەۋمەتتانۋشى ماماندىعىنا وقۋعا ءتۇستىم. وسى ۋنيۆەرسيتەتتە وقي ءجۇرىپ, 2011 جىلى قوسىمشا پوليگراف كۋرسىن ءبىتىردىم.
– العاشقى وفيتسەرلىك قىزمەتىڭ قالاي باستالدى؟
– ارينە, قاي سالادا جۇمىستى باستاۋ وڭاي بولمايتىن شىعار. اسىرەسە, اسكەري سالانىڭ تارتىبىنە كوندىگۋگە تۋرا كەلدى. ويتكەنى, بۇل ءوزىمنىڭ قالاعان ماماندىعىم عوي. راس, باستاپقىدا قينالمادىم دەي المايمىن. ازامات دەگەن اتىمىز بار, تاۋەلسىز ەلىمىزدىڭ اۋماقتىق تۇتاستىعىن قورعاۋ, تىنىشتىعىن كۇزەتۋ, جالپى, قازاقستاننىڭ مەملەكەتتىلىگىن ساقتاۋ ءبىز سەكىلدى بۇگىنگى جاستاردىڭ پارىزى بولۋى كەرەك دەگەن ويعا بەكىندىم. مۇنى اكەم دە, شەشەم دە, بۇل كۇندەرى اسكەري سالادا ابىرويلى قىزمەت ەتىپ جۇرگەن اعالارىم دا ساناما سىڭىرە بەرگەن ەدى. سول تاربيەنىڭ جەمىسى بولار, سونىمەن بىرگە, كوكەيىمدە ابدەن پىسكەن ىزگى ارمانىم مەنى اسكەري بولىمدە قىزمەت ەتۋگە جەتەلەي بەردى. ءسويتىپ, 2012 جىلدىڭ تامىزىندا اقتوبە وبلىسىندا ورنالاسقان اسكەري بولىمدە قىزمەتىمدى باستادىم. اسكەري بولىمدە ماعان بىردەن ۇلكەن جاۋاپكەرشىلىك جۇكتەلىپ, روتا كومانديرىنىڭ تاربيە جانە الەۋمەتتىك-قۇقىق جۇمىستارى جونىندەگى ورىنباسارى لاۋازىمىن اتقاردىم. الدىڭعى تولقىن اعا وفيتسەرلەر اقىل-كەڭەسىن بەرىپ, اسكەري قىزمەتتىڭ ۇڭعىل-شۇڭعىلىن كوپ ۇيرەتتى. وسى اسكەري بولىمدەگى جۇمىسىم مەنى اسكەري ورتاعا تەز ۇيرەنۋىمە كوپ كومەگىن بەردى.
– قازىر اتىراۋداعى اسكەري بولىمگە اۋىسىپسىڭ, مۇندا قانداي قىزمەت اتقارىپ ءجۇرسىڭ؟
– ءيا, قازىر وسىنداعى اسكەري بولىمگە اۋىسقانىما ءبىر جىلعا جاقىندادى. مۇندا دا اسكەري سالانىڭ قىر-سىرىنا ابدەن قانىققان اعا بۋىننىڭ تاجىريبەسىنەن ۇيرەنىپ جاتقانىم وتە كوپ. ءبىز سەكىلدى جاس وفيتسەرلەردىڭ وسى سالادا تۇراقتاپ قالۋىنا «باتىس» وڭىرلىك قولباسشىلىعى اسكەرلەرىنىڭ قولباسشىسى مۇرات نۇعىمانوۆ سەكىلدى تاجىريبەلى وفيتسەرلەر كوپ ەڭبەك ءسىڭىرىپ كەلەدى.
ال اتقاراتىن قىزمەتىمە توقتالار بولسام, مىندەتىم –اسكەري قىزمەتكە كەلىسىمشارتپەن كەلۋشىلەردىڭ تەز بەيىمدەلۋىنە پسيحولوگيالىق تۇرعىدان قولداۋ كورسەتۋ. قازىر ءبىزدىڭ اسكەري بولىمگە كەلىسىمشارتپەن قىزمەت ەتۋشىلەر كەلىپ جاتىر. ولاردىڭ ءبارىنىڭ بىردەي وتباسىلىق جاعدايى تۇراقتى بولماۋى مۇمكىن, نەمەسە, اسكەري قىزمەتكە شاقىرىلعاننان كەيىن دە وتباسىلىق قيىندىقتار تۋىنداۋى عاجاپ ەمەس قوي. ءاربىر اسكەرگە شاقىرىلۋشىمەن جەكە سويلەسەمىن, وتباسىلىق جاعدايىمەن جەتە تانىسامىن. ولاردىڭ پروبلەمالىق ماسەلەلەرىن اسكەري ءبولىم باسشىلىعىمەن اقىلداسا وتىرىپ, وڭ شەشۋگە ىقپالىم تيسە, دەيمىن عوي.
– اڭگىمەڭە راحمەت, ەڭبەگىڭ جەمىستى بولسىن.
اڭگىمەلەسكەن
جولداسبەك شوپەعۇل,
«ەگەمەن قازاقستان».
اتىراۋ وبلىسى.
پارادتا ۇشىنشى رەت بولامىن
اسكەري پارادقا وسىمەن ءۇشىنشى رەت قاتىساتىن بولامىن. ءار جىلعى پارادتىڭ قيىندىعى مەن قىزىعى قوسا جۇرەتىنى بەلگىلى. ۇزدىكسىز جاتتىعۋ بىرتە-بىرتە ءوز ناتيجەسىن بەرۋدە.
العاشقىدا اياعىمىز اۋىرىپ, تالىپ كەتەتىن. قازىر ەتىمىز ابدەن ۇيرەندى. دەگەنمەن, قاتتى شارشايسىڭ. تەك وسى ءبىر اۋا رايىنىڭ سالقىندىعى بولماسا, جاتتىعۋىمىز جاقسى ءجۇرىپ جاتىر. باستاپقى كەزدەگىدەي ەمەس, قالىپتى جاعداي سياقتى ابدەن ۇيرەنىپ الدىق. شىنىمدى ايتسام, وسى جولى دا پارادقا قاتىسىپ وتىرعانىما قۋانىشتىمىن. اركىمنىڭ دە ارمانى عوي دەپ ويلايمىن. الداعى ۋاقىتتا دا قاتىسسام دەگەن نيەتىم بار.
مەن – «وڭتۇستىك» وڭىرلىك قولباسشىلىعىنا قاراستى اسكەري بولىمىنەن كەلىپ اسكەري پارادقا دايىندالىپ جاتقان اسكەري قىزمەتشىلەردىڭ ءبىرىمىن. دايىندىقتىڭ ارقاسىندا كوپ تاجىريبە جيناقتاعانىمدى ءارى اسكەري بىلىكتىلىگىمنىڭ ارتقاندىعىن ايتا كەتكىم كەلەدى.
مارال امانتايقىزى,
اعا لەيتەنانت, اسكەري پارادقا قاتىسۋشى.
