2012 جىلعى 16 اقپانداعى «اسكەري قىزمەت جانە اسكەري قىزمەتشىلەردىڭ مارتەبەسى تۋرالى» زاڭعا سايكەس جانە قازاقستان رەسپۋبليكاسى پرەزيدەنتىنىڭ 2014 جىلعى 14 ناۋرىزداعى №768 جارلىعى, قازاقستان رەسپۋبليكاسى قورعانىس ءمينيسترىنىڭ 2014 جىلعى 20 ناۋرىزداعى №116 بۇيرىعى نەگىزىندە قاراعاندى قالاسى وكتيابر اۋدانىنىڭ قورعانىس ىستەرى جونىندەگى بولىمىندە قازاقستان رەسپۋبليكاسىنىڭ قارۋلى كۇشتەرىنە كوكتەمگى مەرزىمدى اسكەري قىزمەتكە شاقىرۋ ناۋقانى باستالعان بولاتىن.
قورعانىس زاڭناماسىنا سايكەس اسكەري قىزمەت ەكى تۇردە جۇزەگە اسىرىلادى: اسكەرگە شاقىرۋ بويىنشا جانە كەلىسىمشارت بويىنشا. اسكەرگە شاقىرۋ بويىنشا اسكەري قىزمەت ەركىن جانە مىندەتتى رەتتە جۇزەگە اسىرىلادى. بۇرىنعى كەزگە قاراعاندا, قازاقستان ارمياسىنا جاستاردىڭ كوپشىلىگىن اسكەرگە شاقىرۋعا قاجەتتىلىگى كوپ بولماسا دا, كەيىن كەلىسىمشارت جۇيەسى بويىنشا جاساقتاۋعا تولىقتاي اۋىستىرىلاتىن بولادى. سوندا دا جەرگىلىكتى اسكەري باسقارۋ ورگاندارى ءۇشىن اسكەرگە شاقىرۋ باسىمدى جانە دە جاي عانا ەمەس, باستى جۇمىس باعىتتارىنىڭ ءبىرى بولىپ تابىلادى.
اسكەري بولىمدەردى جاستارمەن تولىقتىرۋ جانە ساپالى جاساقتاۋ ماقساتىندا ءبىزدىڭ ءبولىمنەن اسكەرگە شاقىرۋعا جاتاتىن قۇرامدى الدىن الا زەردەلەۋ مەن ىرىكتەۋ جۇمىستارى ءجۇرگىزىلدى. بۇل جۇمىس 15-25 ناۋرىز ارالىعىندا اتقارىلدى. بۇدان سوڭ ءساۋىر مەن ماۋسىم ايلارىندا مەرزىمدى اسكەرگە شاقىرىلۋشىلاردى ىرىكتەۋ جۇمىستارى جالعاستىرىلادى. سول بويىنشا وزدەرىمەن جانە اتا-انالارىمەن جەكە-دارا, سونداي-اق, جۇمىس ىستەيتىن نەمەسە وقۋ وقيتىن ورنى وكىلدەرىمەن اڭگىمەلەسۋ وتكىزىلىپ جاتىر. مۇنىڭ ءوزى جاس ازاماتتاردىڭ دەنساۋلىق جايىن, ادامگەرشىلىك جانە ىسكەرلىك قاسيەتتەرىن, جالپى ءبىلىم دەڭگەيىن, دەنە تاربيەسىن, وتباسىلىق جاعدايى مەن ارنايى دايىندىعىن انىقتاۋعا مۇمكىندىك بەرەدى. سونىمەن بىرگە, مورالدىق-پسيحولوگيالىق كۇيىنە, وتباسىنداعى ءجۇرىس-تۇرىسى مەن ەكسترەمالدى جاعدايلاردا توزىمدىلىگىنە, ەرتە جاستاعى اۋرۋ-سىرقاتىنا نازار اۋدارىلادى. اڭگىمەلەسۋ ناتيجەلەرى زەردەلەۋ پاراعىنا جازىلادى.
قازىر قالامىزدا قر قك قۇرىلۋىنا 22 جىل جانە جەڭىس كۇنىنىڭ 69 جىلدىعىنا ارنالعان رەسپۋبليكالىق بىرىڭعاي جاپپاي-قورعانىس ايلىعى اياسىندا اسكەري-پاتريوتتىق باعىتتا بەلسەندى ءىس-شارالار جۇرگىزىلۋدە. وكتيابر اۋدانىنىڭ وقۋ ورىندارىندا اسكەرگە شاقىرىلاتىن جاستار اراسىندا سپورتتىق جارىستار مەن ويىندار, جاس اسكەريدىڭ كۇندەرى, جاۋىنگەرلىك ساباقتارى وتكىزىلىپ جاتىر. وكتيابر اۋدانىنىڭ اكىمدىگىمەن بىرلەسىپ, ەڭبەك ۇجىمدارى مەن وقۋ ورىندارىندا ۇلانداردى اسكەرگە سالتاناتتى تۇردە شىعارىپ سالۋ كەشتەرى ۇيىمداستىرىلۋدا.
1 ساۋىردەن باستاپ اۋداندىق اسكەرگە شاقىرۋ كوميسسياسى ءوزىنىڭ بەلسەندى جۇمىسىن باستادى. اۋدانىمىزدىڭ قورعانىس ىستەرى جونىندەگى بولىمىنەن اسكەرگە شاقىرىلۋشىلار سانى جىلدان-جىلعا ارتىپ كەلەدى. بارلىعى ءوز نيەتتەرىمەن قىزمەت ەتۋگە دايىن. تاڭداۋ دەڭگەيى, تالاپ بيىك. جوعارى جانە ورتا ارناۋلى وقۋ ورىندارىن بىتىرۋشىلەر ءبىرىنشى كەزەكتە قامتىلادى. اسكەرگە, ەڭ باستىسى, سالاماتتى جانە ءبىلىمدى ساربازدار قاجەتتىگى ۋاقىت تالابى بولىپ وتىر. سونداي-اق, بولاشاق جاۋىنگەرلەردىڭ ەرىك-جىگەرى مەن پسيحولوگيالىق توزىمدىلىگىنە ۇلكەن تالاپ قويىلادى. ال اسكەري ءتارتىپتى ءبىلۋ, ونى ورىنداۋعا ءازىر تۇرۋ – ءوزىڭنىڭ جەكە باسىڭدى قالىپتاستىرۋ مەن اسكەري قىزمەتكە دايىندالۋ جولىنداعى ماڭىزدى قادام دەگەن ءسوز.
ءبولىمنىڭ اسكەري-تەحنيكالىق مەكتەبىنىڭ تۇرمىسقا قولايلى جاتاقحاناسى بار. ماتەريالدىق بازاسى جامان ەمەس. ونداعى وقىتۋشىلار 20 جىل جانە ودان دا كوپ ەڭبەك ەتكەن بۇرىنعى كادرلىق اسكەري قىزمەتشىلەر. اتالعان مەكتەپ بىرنەشە كۋرسانتتاردى دايارلادى. مۇنىمەن بىرگە, قالاداعى ءبىلىم بەرۋ ورىندارى مەن ۇيىمدارىندا جاستارعا العاشقى اسكەري دايىندىق بويىنشا جۇمىستار جۇرگىزىلەدى. ەلدىك رۋحتى كوتەرەتىن, ورەندەردىڭ بويىندا پاتريوتتىق سەزىمدى قالىپتاستىراتىن, وتانسۇيگىشتىككە تاربيەلەيتىن ءىس-شارالار ماڭىزى ءبىر بولەك. اسكەري-پاتريوتتىق تاربيە بەرۋگە №77 ورتا مەكتەپ ديرەكتورى زايرا جانتىباەۆا, ءااد ساباعىنىڭ اسكەري جەتەكشىسى, اعا لەيتەنانت قايرات كەنەتاەۆ, قازاق-تۇرىك ليتسەيىنىڭ وقىتۋشىسى, لەيتەنانت اسقار قوسجانوۆ سياقتى ۇستازدار زور بەلسەندىلىك كورسەتىپ كەلەدى.
ءبولىم دايىندىعىنان وتكەن گيمنازيا وقۋشىسى تيمۋر ابدۋگافاروۆ – بۇگىندە الماتى اسكەري-ينجەنەرلىك راديوەلەكترونيكا جانە بايلانىس ينستيتۋتىنىڭ 3 كۋرس كۋرسانتى. اگروتەحنيكالىق كوللەدجىنىڭ اسكەري جەتەكشىسى, وتستاۆكاداعى پودپولكوۆنيك لەونيد سلەمەنەۆتىڭ قولداۋى مەن تاربيەلەۋى ارقاسىندا ۆيكتور كراۆچەنكو اسكەري وقۋ ورنىندا ءبىلىم جالعاستىرۋدى تاڭداپ الدى. اۋدانىمىزداعى ءبىراز جاستار اسكەري ينستيتۋتتارىن ءبىتىرىپ, وفيتسەر بولىپ قىزمەت ەتەدى. ماسەلەن, قۇرلىق اسكەرلەرى اسكەري ينستيتۋتىنىڭ تۇلەگى لەيتەنانت قۋانىش ابدىكارىموۆ الماتىداعى 55524 اسكەري ءبولىمىندە تەحنيكالىق ۆزۆود كومانديرى قىزمەتىن اتقارۋدا, ۆورونەج اۆياتسيالىق ينجەنەرلىك ۋنيۆەرسيتەتىن بىتىرگەن لەيتەنانت ەلدوس تيسبەكوۆ – اسكەري مەتەورولوگيالىق قىزمەت ينجەنەرى.
جالپى, ۇلتتىق تاربيەدەن تەرەڭدەپ ءنار العان جاستارعا ۇلتتىق ءپاتريوتيزمدى قالىپتاستىرۋدا اتا-بابالارىمىزدىڭ ۇلاعاتتى ويلارى مەن تالىمدىك تاربيەسىنىڭ اتقاراتىن ورنى ەرەكشە.
سوندىقتان دا ءبىز ءوز تاراپىمىزدان العا قويعان ماقساتتاردى جوعارى جاۋاپكەرشىلىكپەن ورىنداپ كەلەمىز.
دۋمان باكىروۆ,
وكتيابر اۋدانىنىڭ قورعانىس ىستەرى جونىندەگى ءبولىمىنىڭ باستىعى, پودپولكوۆنيك.
قاراعاندى.
*
دەرەك پەن دايەك
ىرىكتەۋدەن وتكەندەر بورىشتارىن وتەۋدە
شىعىس قازاقستان وبلىسىنىڭ قورعانىس ىستەرى جونىندەگى دەپارتامەنتىنىڭ شاقىرۋ جانە كەلىسىمشارت بويىنشا اسكەري قىزمەتشىلەردى ىرىكتەۋ باسقارماسى باستىعىنىڭ ورىنباسارى, پودپولكوۆنيك ەرجان جاقىپوۆتىڭ ايتۋىنشا, 17 ساۋىردە اسكەري بورىشىن وتەۋگە شاقىرىلعان جاستاردىڭ ىرىكتەۋدەن وتكەن العاشقى لەگى شەكارا قىزمەتىندە بورىشىن وتەۋگە جونەلتىلدى. بيىل شىعىس وڭىرىندە اسكەر قاتارىنا الىنۋشىلاردىڭ جالپى سانى 1 مىڭعا تارتا ادامدى قۇرايدى. ونىڭ ىشىندە ۇقك شەكارا قىزمەتىنە – 200, قورعانىس مينيسترلىگىنە – 200-دەن استام, رەسپۋبليكالىق ۇلانعا – 20-عا جۋىق, توتەنشە جاعدايلار مينيسترلىگى مەن ىشكى ىستەر مينيسترلىگىنە 400-دەن استام جاس جىبەرىلمەك.
دۋمان اناش,
«ەگەمەن قازاقستان».
وسكەمەن.
سارباز بولۋ – ماقتانىش
شىندىعىن ايتقاندا, بۇل كۇندە بالالارى اسكەر قاتارىنا شاقىرىلۋشى بارلىق اتا-انالار سەكىلدى ءبىزدىڭ دە كوڭىلىمىز تولقۋلى. ۇلكەن ۇلىمىز جۇماننىڭ ەسەيىپ, وتان الدىنداعى ازاماتتىق پارىزىن وتەۋ جاسىنا تولىپ قالعاندىعىن بايقاماي دا قالىپپىز. ول ءوزى مۇنى ماقتانىش ەتىپ, ناعىز سارباز اتانعانشا اسىق. اسىرەسە, شەكاراشىلار ساپىنا قوسىلىپ, ەلىمىزدىڭ شىعىس ايماعىندا تىنىشتىعىمىزدى كۇزەتپەكتىگى تىلەۋىنەن شىققانداي بولدى. شەكاراشى بولۋ جاسىنان ارمانى ەدى. تەمىرجول كوللەدجىن بىتىرگەن تۇڭعىشىمىزدىڭ قالاداعى وكتيابر اۋدانى قورعانىس ىستەرى جونىندەگى ءبولىمنىڭ ارناۋلى كوميسسياسىنان وتۋدە دەنساۋلىعى دا, العاشقى اسكەري دايىندىعى دا جاقسى ەكەنى قۋانتىپ تاستادى.
بۇگىندە اسكەري مىندەتتىلىك جاستاردىڭ ءبارى ءۇشىن وزدەرىنىڭ پاتريوتتىق بورىشىن اتقارۋعا دەگەن تاماشا ۇردىسكە اينالعانى ايان. بۇل ولاردىڭ وتانشىلدىق سەزىمى ءوسۋىنىڭ ناقتى ايعاعى بولسا, سونداي-اق, ەلىمىز ارمياسىنىڭ بەدەلى بيىكتەۋىن تانىتاتىندىعى انىق. باسقا دا تۇرعىلىستارىنداي, قاستەرلى مىندەتىن اتقارۋعا جاعداي بارىنا ەش الاڭىمىز جوق. جالپىسىندا, ارميا – ومىرلىك ۇلكەن مەكتەپ. سوندىقتان سوندا شىنىعىپ-شىڭدالۋدىڭ ورنى بولەكتىگىن بىلەمىز. اكە-شەشەسى رەتىندە ۇلىمىز جۇماننىڭ ازاماتتىق سىناقتى ادال, ابىرويلى اتقارا الاتىندىعىنا سەنەمىز. اماناتىمىز دا سول. كۇش-قۋاتى جىلدان-جىلعا نىعايۋداعى جاس مەملەكەتىمىزدىڭ تاعى ءبىر بولاشاق قورعانىنىڭ اعاسى جولىن جالعاستىرماقتىعى دا تاياۋ. ولار سارباز بولۋىنا قۋانسا, وتان قورعاۋشىلاردى ءوسىرۋشى تۇرعىسىندا ءبىز دە قۋانىشتىمىز.
فاريزا, قاجىبەك شاديەۆتەر,
اتا-انا.
قاراعاندى.
شار بولاتتاي شىڭدالامىز
مەن 1995 جىلى شىعىس قازاقستان وبلىسىنىڭ زىريان قالاسىندا دۇنيەگە كەلدىم. وتكەن جىلى زىريان قالاسىنداعى №11 ورتا مەكتەپتى ءتامامدادىم. اسكەر قاتارىنا وسىدان ءبىر اي بۇرىن شاقىرىلعان ەدىم. جالپى, ومىرىمدە ءبىرىنشى رەت اسكەري مىندەتىمدى وتەۋگە شاقىرتۋ الدىم. بۇل – كەز كەلگەن ەر ازامات ءۇشىن ۇلكەن قۋانىش دەپ بىلەمىن. ويتكەنى, تۋعان ەلىڭنىڭ قارۋلى كۇشتەرى قاتارىندا قىزمەت ەتۋ – ءبىر جاعىنان پەرزەنتتىك پارىزىمىز, ەكىنشى جاعىنان شار بولاتتاي شىڭدالىپ شىعۋىمىزعا كومەكتەسەدى.
جولىم وڭ بولدى. اسكەري كوميسسارياتتا بارلىق سىننان, مەديتسينالىق تەكسەرۋدەن سۇرىنبەي ءوتتىم. دەنساۋلىعىمدا كىنارات جوق. مەنى ەلىمىزدىڭ ۇلتتىق قاۋىپسىزدىك كوميتەتىنىڭ شەكارا قىزمەتىنە جونەلتۋگە شەشىم شىعاردى. جاقىندا جولعا شىعامىز. وفيتسەرلەردىڭ ايتۋىنشا, الدىمەن الماتى قالاسىنا بارماقپىز.
اتا-انام زىريان قالاسىندا تۇرادى. ءوزىم اۋدانداعى كولىك جانە قۇرىلىس كوللەدجىنە سىرتتاي وقۋعا تۇسكەنمىن. وتباسىندا جالعىز ۇلمىن. اسكەري قىزمەتىمدى ابىرويمەن ورىنداۋعا تىرىسامىن. بورىشىمدى وتەپ ورالعان سوڭ, تۋعان قالامىز – زىرياننىڭ ىشكى ىستەر بولىمىندە جۇمىس ىستەگىم كەلەدى.
سەرگەي روديونوۆ.
شىعىس قازاقستان وبلىسى,
زىريان اۋدانى.
