شاراينا
حۋان كارلوس ۆارەلا پاناما وپپوزيتسياسىنىڭ سەركەسى بولىپ تابىلادى. سايلاۋ ناتيجەلەرى جاريا ەتىلگەن سوڭ ونىڭ پاناما پرەزيدەنتى بولعانى انىقتالدى. پانامانىڭ وڭشىل تسەنتريستىك پارتياسىنىڭ وكىلىنە سايلاۋشىلاردىڭ 39 پايىزى ءوز داۋىستارىن بەرگەن.
ال بيلەۋشى دەموكراتيالىق وزگەرىستەر ءۇشىن پارتياسىنىڭ وكىلى حوسە دومينگو ارياس ۆارەلادان شامامەن 8 پايىز داۋىس از جيناعان. پاناماداعى سايلاۋدىڭ ءبىر ەرەكشەلىگى – مۇندا سايلاۋشىلاردىڭ ەڭ كوپ داۋىسىن العان ۇمىتكەر جەڭىسكە جەتەدى. ونىڭ پايىزدىق ۇلەسى ەش ءرول اتقارمايدى. ۆارەلا – قازىر پانامانىڭ ۆيتسە-پرەزيدەنتى. ول سايلاۋدا جەڭىسكە جەتسە, ەكونوميكالىق ءوسىم باعىتىن جالعاستىرۋعا ۋادە بەرگەن بولاتىن. ونىڭ سايلاۋالدى باعدارلاماسىندا, سونداي-اق, ينفلياتسيانى تومەندەتۋ مەن كەدەيلىكتى ازايتۋ بار.
پرەمەر سوت الدىندا جاۋاپ بەرۋدە
تايلاند پرەمەر-ءمينيسترىنىڭ مىندەتىن اتقارۋشى ينگلاك چيناۆات كورولدىكتىڭ كونستيتۋتسيالىق سوتى الدىندا جاۋاپ بەردى. وعان لاۋازىمدىق وكىلەتتىگىن اسىرا پايدالاندى دەگەن ايىپ تاعىلىپ وتىر. ەگەر چيناۆات كىنالى دەپ تابىلاتىن بولسا, وندا مينيسترلەر كابينەتى وتستاۆكاعا كەتەدى.
چيناۆاتتىڭ ءىس-ارەكەتىنە وپپوزيتسياشى-سەناتورلار توبى شاعىمدانىپتى. ولار تايلاند ۇلتتىق قاۋىپسىزدىك كەڭەسىنىڭ باسشىسى تاۆيل پليەنسريدى وتستاۆكاعا جىبەرىپ, ۇكىمەت باسشىسىنىڭ مىندەتىن اتقارۋشى ءوزىنىڭ وكىلەتتىگىن اسىرا پايدالانعانىنا سەنىمدى. سەناتورلار, سونداي-اق, چيناۆات مۇنداي قادامعا باقاي ەسەپپەن باردى دەپ ەسەپتەيدى. سوت الدىندا جاۋاپ بەرگەن پرەمەر-ءمينيستردىڭ مىندەتىن اتقارۋشى ءوزىنىڭ كىناسىن مويىنداۋدان باس تارتقان. ونىڭ پىكىرىنشە, ۇكىمەت باسشىسى رەتىندە ەل مۇددەسىنە سايكەس قانداي شەشىم قابىلداسا دا قۇقىلى.
وباما فورۋمعا بويكوت جاريالادى
اق ءۇي امەريكالىق كورپوراتسيالاردى سانكت-پەتەربۋرگتە وتەتىن حالىقارالىق فورۋمعا قاتىسۋدان باس تارتۋعا شاقىردى. بۇل جەردە اڭگىمە اسا ءىرى ەنەرگەتيكالىق, قارجىلىق جانە ونەركاسىپتىك كومپانيالار تۋرالى بولىپ وتىر.
ماسەلەن, Alcoa, Goldman Sachs, PepsiCo, Morgan Stanley جانە ConocoPhillips سياقتى الىپتار قازىردىڭ وزىندە فورۋمعا قاتىسۋدان باس تارتىپ ۇلگەرگەن. بۇعان پرەزيدەنت وبامانىڭ كەڭەسشىلەرىنىڭ بەلسەندى ۇگىتى سەبەپ بولعان سەكىلدى. وباما اكىمشىلىگى ءوزىنىڭ بەلسەندى ارەكەتىنەن كەيىن ءىس جۇزىندە اقش-تىڭ ءىرى كومپانيالارىنىڭ ءبارى فورۋمعا بارمايتىنىنان ءۇمىتتى. دەگەنمەن, كەيبىر كومپانيالار باسشىلارى 22-24 مامىر كۇندەرى وتەتىن فورۋمعا تومەنگى شەندەگى قىزمەتكەرلەرىن بولسا دا جىبەرمەك كورىنەدى. ايتپەسە ولاردىڭ جوعالتاتىنى كوپ بولماق ەكەن.
ولتىرىلگەنى وتىرىك بولىپ شىقپاسىن
ۇلتتىق باسكەتبول اسسوتسياتسياسىنىڭ بۇرىنعى ويىنشىسى دەننيس رودمان وتكەن جىلدىڭ تامىزىندا جانە جەلتوقسانىندا ولتىرىلگەن سولتۇستىك كورەيانىڭ باسشىسى كيم چەن ىننىڭ جەزدەسى مەن ونىڭ دوس ايەلىن ءتىرىدەي كورگەنىن ايتقان. مۇنى باسكەتبولشى Dujour باسىلىمىنا سۇحباتىندا حابارلاسا كەرەك.
سولتۇستىك كورەيا تۋرالى قانداي اڭگىمە ايتىلماسىن, ادامدار سوعان سەنەدى. سوڭعى رەت مەن سول ەلدە بولعانىمدا كيم چەن ىننىڭ جەزدەسى مەن ونىڭ دوس ايەلىنىڭ ولتىرىلگەنى تۋرالى اڭگىمە جەلدەي ەسكەن-تۇعىن. بىراق مەن الگى ەكەۋىنىڭ قاسىندا تۇردىم, دەپ مالىمدەگەن رودمان. مۇنان بولەك, رودمان كيم چەن ىننىڭ اقش پرەزيدەنتى باراك وبامامەن كەزدەسىپ, سولتۇستىك كورەيانىڭ يادرولىق باعدارلاماسى تۋرالى كەلىسسوزدەر جۇرگىزگىسى كەلەتىنىن كولدەنەڭ تارتقان. باسكەتبولشىنىڭ ايتۋىنشا, سولتۇستىك كورەيا بەيبىت ءومىر سۇرگىسى كەلەتىن شاعىن عانا ەل بولىپ تابىلادى.
ليۆيادا – جاڭا ۇكىمەت باسشىسى
احمەد ماايتيك ليۆيانىڭ جاڭا پرەمەر-ءمينيسترى بولدى. ەندى ول 15 كۇننىڭ ىشىندە كابينەتتى جاساقتاپ, ونى بەكىتۋ ءۇشىن پارلامەنتكە ۇسىنۋى ءتيىس. بۇل تۋرالى جالپىعا ورتاق ۇلتتىق كونگرەستىڭ (پارلامەنت) سپيكەرى نۋري ابۋ ساحمەين جاريا ەتتى.
ماايتيك ليۆيا باسشىسى مۋاممار كاددافي تاعىنان تايدىرىلعالى بەرگى بەسىنشى پرەمەر بولىپ وتىر. ونى جاقتاپ پارلامەنتتەگى 121 دەپۋتات ءوز داۋىستارىن بەرگەن. پرەمەر بولۋ ءۇشىن ۇمىتكەردى كەم دەگەندە 120 دەپۋتات قولداۋى ءتيىس. وسىلايشا 42 جاستاعى بيزنەسمەن ليۆيا تاريحىنداعى ەڭ جاس ۇكىمەت باسشىسى اتاندى. ونىڭ الدىنداعى پرەمەر ابداللا ءال-تاني وسى لاۋازىمعا بەكىگەننەن كەيىن 5 كۇننەن سوڭ, ياعني 13 ساۋىردە وتستاۆكاعا كەتكەن بولاتىن. ول بۇل ارەكەتىن جوعارى لاۋازىمنان ءوز ءومىرى مەن جاقىندارىنىڭ قاۋىپسىزدىگى ءۇشىن الاڭدايتىندىقتان باس تارتاتىندىعىمەن تۇسىندىرگەن ەدى.
قىسقا قايىرىپ ايتقاندا:
*دۇنيەجۇزى بويىنشا ادام قۇقى ەڭ كوپ بۇزىلاتىن ەل رەتىندە حالىقارالىق سىنعا ءجيى ۇشىرايتىن سولتۇستىك كورەيا ادام قۇقىن بۇزۋ سالاسىندا امەريكا قۇراما شتاتتارى الەمدىك كوشباسشى بولىپ تابىلادى دەپ ەسەپتەيدى. مۇنى كحدر باسشىسى كيم چەن ىن مالىمدەدى. *امەريكانىڭ كاليفورنيا شتاتى جاعالاۋلارى مەن تىنىق مۇحيتىنداعى گۋام ارالىندا رەسەي ۇشاقتارى بايقالعان. بۇل تۋرالى اقش اسكەري-اۋە كۇشتەرىنىڭ باسشىسى گەربەرت كارلايل حابارلادى. ول, سونداي-اق, رەسەي اسكەري-اۋە كۇشتەرىنىڭ بەلسەندىلىگى وڭتۇستىك كورەيا مەن جاپونيا جاعالاۋلارىندا دا كۇرت وسە تۇسكەنىن ءمالىم ەتىپ وتىر. *فرانتسيا ديپلوماتيالىق ميسسياسىنىڭ قىزمەتكەرى يەمەن استاناسى – سانا قالاسىنىڭ ماڭىندا اتىپ ولتىرىلگەن. ەلشىلىكتىڭ تاعى ەكى قىزمەتكەرى دەنە جاراقاتتارىن العان. مۇنى يەمەن ىشكى ىستەر مينيسترلىگىندەگى دەرەك كوزىنە سىلتەمە جاساي وتىرىپ, «رەيتەر» اگەنتتىگى حابارلادى. * ۇلىبريتانيانىڭ اسكەري-تەڭىز كۇشتەرىندەگى سۇڭگۋىر قايىقتاردا ايەلدەر قىزمەت ەتە باستاعان. مۇنداي قىزمەتكە العاش بولىپ رۇقسات العاندار – لەيتەنانتتار ماكسين ستايلز پەن الەكساندرا ولسسون جانە پەنني تەكرەي بولىپ تابىلادى. ولار سۇڭگۋىر قايىقتاعىلار ءۇشىن ارنايى كۋرستا دايىندىقتان ءوتىپتى.
ينتەرنەت ماتەريالدارى نەگىزىندە ازىرلەندى.
