«Super Bol» جاس فۋتبولشىلار جوباسىن پرەزيدەنت جانىنداعى «Dara» دارىندىلاردى قولداۋ قورى جانە Freedom Broker ينۆەستيتسيالىق كومپانياسى قولعا العان. فۋتبولعا بەيىم ورەندەردى ىرىكتەۋ جوباسى سەمەي قالاسىنان باستاۋ الىپ, پاۆلودار, اقتوبە, اقتاۋ, تاراز, شىمكەنت, نۇر-سۇلتان, الماتى قالالارىندا جالعاسىن تاپتى. بىرەگەي جوبا 16 مەن 25 جاس ارالىعىنداعى جاس فۋتبولشىلار ءۇشىن ءوز شەبەرلىگىن شىڭداۋدىڭ تاپتىرماس الاڭىنا اينالعانىن ايتا كەتۋ كەرەك. ەلىمىزدىڭ ءار وڭىرىنەن ىرىكتەلىپ, جۇزدەن جۇيرىك شىققان 50 ورەن بولاشاقتا كاسىبي كوماندالار ساپىندا ويناۋعا جولداما العان ەدى.
سوڭعى ءبىر اي بويى تالعارداعى ۇلتتىق قۇرامانىڭ بازاسىندا دايىندىق جاساعان جاستار ءار اپتا سايىن ازۋلى كوماندالارمەن جولداستىق كەزدەسۋلەر وتكىزىپ تۇردى. دەي تۇرعانمەن, ولار ءۇشىن ءبىر كەزدەرى وزدەرى ۇلگى تۇتقان قازاقستان قۇراماسىنىڭ وكىلدەرىمەن ءبىر الاڭدا دوپ تەبۋ ايتۋلى وقيعا بولدى.
قازاقستاننىڭ ارداگەرلەر قۇراماسىندا الاڭعا سامات سماقوۆ, داۆيد لوريا, نۇربول جۇماسقاليەۆ, اندرەي كارپوۆيچ, اعايىندى ازوۆسكيلەر, فارحادبەك يريسمەتوۆ, دميتري بياكوۆ, الەكساندر كۋچما, ماكسيم جالماعامبەتوۆ, قايرات اشىربەكوۆ, دانيار مۇقانوۆ, سەرگەي بويچەنكو, يۋري نوۆيكوۆ, يگور سولوشەنكو, رۋسلان بالتيەۆ, ەدۋارد سەرگيەنكو سەكىلدى ۋاقىتىندا جاسىل الاڭدا جاسىنداي جارقىلداعان كىل مىقتىلار شىقتى. سونداي-اق جولداستىق كەزدەسۋگە كەزىندە يسپانيانىڭ «رەال مادريد», يتاليانىڭ «ينتەر» كلۋبىندا دوپ تەپكەن ەستەبان كامبياسسو ارنايى شاقىرىلعان. فۋتبول ارداگەرلەرى كومانداسىنا بۇرىنعىداي ارنو پايپەرس جەتەكشىلىك ەتسە, «Super Bol» رەاليتي-شوۋىنىڭ قاتىسۋشىلارىنا ايتۋلى فۋتبول مامانى تالعات بايسۋفينوۆ باپكەرلىك جاسادى.
90 مينۋت بويى تارتىسپەن وتكەن ارداگەرلەر مەن جاستار باسەكەسى كورەرمەنگە ەرەكشە اسەر سىيلادى. جانكۇيەرلەر الدەقاشان جاسىل الاڭمەن قوش ايتىسقان سۇيىكتى ويىنشىلارىن قايتا كورگەندە قيقۋلاپ سالا بەردى. تريبۋنادان ولاردىڭ ەسىمدەرى اتالعان سايىن ىستىق ىقىلاسپەن دەمەپ وتىردى. «Super Bol» كومانداسى ء«ا» دەگەننەن-اق ويىندى جىگەرمەن باستادى. ارداگەرلەر كومانداسىنىڭ قاقپاسىن قايتا-قايتا نىساناعا العان جاس جىگىتتەر اعا بۋىندى ءبىراز ساستىردى. ويىننىڭ 10-مينۋتىندا جاستار وكىلى تيمۋر تولەگەنوۆ ەسەپ اشسا, اراعا بىرەر مينۋت سالىپ ەمين مۇساەۆ ەسەپتى ەسەلەي ءتۇستى. وسى قارقىندى جالعاستىرعان دۋنايبەك ايانحان مەن الىبەك جاردەموۆ العاشقى تايمنىڭ سوڭىنا دەيىن قارسىلاستارى قاقپاسىنا تاعى دا ەكى گول سالدى. وسىلايشا, ءبىرىنشى تايم «Super Bol» كومانداسىنىڭ پايداسىنا 4:0 ەسەبىمەن اياقتالدى.
ەكىنشى تايمدا ارداگەر سپورتشىلار شيرىعۋ كەرەك ەكەنىن ءتۇسىندى. ءسات سايىن ويىنشى الماستىرعان اعا بۋىن العا ۇمتىلىپ, جاستارعا قارسى جىگەر تانىتۋعا تىرىسىپ باقتى. ەكىنشى كەزەڭدە ۇلتتىق قۇراما شەبەرلەرى نۇربول جۇماسقاليەۆ, باۋىرجان يسلامحان, مۇرات تىلەشوۆ, قايرات اشىربەكوۆ ءتورت گولمەن جاۋاپ قايتارىپ, تارازى باسىن تەڭەستىردى. وسىلايشا, ويىن 4:4 ەسەبىمەن تەڭ اياقتالدى. ماتچتان كەيىن فۋتبول جانكۇيەرلەرى اياقدوپ شەبەرلەرىمەن ەستەلىك سۋرەتكە ءتۇسىپ, سۇيىكتى ويىنشىلارىنان اۆتوگراف الدى.
ايتا كەتۋ كەرەك, Qazsport ارناسى ارقىلى كورەرمەنگە تىكەلەي ەفيردە جول تارتقان دودا قايىرىمدىلىق ماقساتقا نەگىزدەلگەن. بيلەتتەر ساتىلىمىنان تۇسكەن قارجى قايىرىمدىلىق قورىنا اۋدارىلىپ, يگى ماقساتتا جۇمسالماق.
الماتى
