قوعام • 08 تامىز، 2022

بالالار باسەكەلەستىگىنە بايىپپەن قاراساق...

1322 رەت كورسەتىلدى

قازاقستاندىق بالالار تەك تەلەۆي­زيا­لىق ءان بايقاۋلارىنان عانا ەمەس، حالىق­ارالىق ونەر جوبالارى مەن شوۋ كونتسەرت­تەردەن دە بوي كورسەتىپ ءجۇر. تەلەفو­نى­مىز­عا «نەمەرەم بايقاۋعا قاتى­سىپ جاتىر ەدى، مىنا سىلتەمەگە ءوتىپ، داۋىس بەر­سەڭىز، باعى جانعالى تۇر» دەگەن سارىن­دا­عى سمس-ءوتىنىش حابارلامالار ءجيى ءتۇسىپ جاتادى.

بالانىڭ تاعدىرى تاپ سەنىڭ داۋىسىڭا تىرەلىپ تۇرعانداي، جىلدار بويى جۇزدەسپەگەن تانىسىڭنىڭ بەيتانىس بالاسىنا باس بار­ما­عىڭدى اياماي باسىپ، تىلەۋلەس بولاسىڭ. كەيىن ونىڭ جۇلدەگەر بولعانىن ەستىگەندە، ءبىر جۇلدىزدى ءوز قولىڭمەن جاققانداي، قا­زاق ونەرىنىڭ وركەندەۋىنە ولشەۋسىز ۇلەس قوسقانداي مارقاياتىنىڭدى قايتەرسىڭ.

ءارتىس بالالاردىڭ تۇتاس تولقىنى قالىپ­تاسۋىنا جان اياماي جۇمىس ىستەپ جاتقان وسى بايقاۋلاردىڭ مۇراتى نە؟ مۇنىڭ سىرتىندا اقشاسى قالتاسىنا سىيماعان نەمەسە بالاسىنىڭ ونەرى ارقىلى تابىس تابۋدى كوزدەگەن اتا-انا تۇر ما الدە ناعىز تالانتتىڭ ءوزى جاسىرۋلى ما؟ اتا-انالار بالاسىن جاستايىنان بارىنەن دە مىقتى بولۋعا ۇيرەتەدى. بۇل تۇسىنىكتى. ۇلى موتسارتتى دا اكەسى كۇيساندىققا ماجبۇرلەپ وتىرعىزعان. بىراق بۇل بالاقايلاردىڭ ول موتسارتتا ءباسى بولعانىمەن، باق-جۇلدىزى بىردەي بولا المايتىنىن بالا بىلمەسە دە، اناسى ەسكەرسە كەرەك-ءتى.

قازىر بالالار شوۋ-بيزنەسىندە باسەكەلەس­تىك وتە كۇشتى. ارمانشىل بوزبالا مەن بوي­جەت­كەن­نىڭ كوپشىلىگى 15-16 جاسقا كەلگەندە عانا سانالى تۇردە ءانشى بولۋدى قالاسا، بۇل جاستاعى كەيبىر «بالالاردىڭ» ساحنا ونەرىندە ون جىلدان ارتىق تاجىريبەسى بار بولىپ شىعاتىنى قالىپتى جاعدايعا اينالدى. بالاسىنىڭ بولاشاقتاعى «باقىتىن» قازىردەن بولجاپ، اسپان استىنان اقشاسى كوپ جۇمىس تاۋىپ، ەل الدىندا ابىروي-اتاعى اسقاق بولۋى ءۇشىن جاس­تايىنان بايقاۋدان بايقاۋعا قۋالاپ، ءبىر كونكۋرستان كەلەسى كونكۋرسقا ۇدەرە كوشىپ جۇرەتىن بالالاردىڭ اتا-انالارى بۇل باسەكەنىڭ قاۋىپتى سالدارىن تۇسپالداپ جاتپايدى. ورىن الۋدىڭ مۇمكىندىگى بولماسا، وپىنىپ، وكىنىپ، اۋىر قابىلدايتىن بالا ەمەس، ەڭ الدىمەن، اتا-اناسى. بالاسىن باقىتقا جەتكىزگىسى كەلەتىن اتا-انا مەن بويدا جاسىرىلعان قابىلەتتى اشۋدىڭ شەكاراسى سوندا قاي جەردەن بەلگىلەنۋگە ءتيىس؟

كەز كەلگەن قالا، اۋدان ورتالىقتارىندا نە كوپ، بالالار ونەرىن دامىتۋمەن اينالىساتىن ورتالىقتار كوپ. كوركەمسوزگە، ۆوكالعا، ساحناعا، جارىققا شىعارۋعا دايىندايتىن ورتالىقتار قازىر ءتىپتى ونلاين بايقاۋ ۇيىمداستىرۋدىڭ دا شەبەرى بولىپ الدى. ولارعا مادەنيەت جانە سپورت مينيسترلىگىنىڭ بۇيرىعىمەن عانا بەكىتىلەتىن مەملەكەتتىك بايقاۋلاردان گورى جەكە بايقاۋلاردى ۇيىمداستىرا سالۋ وڭايىراق. بۇل بايقاۋعا بالالار تەگىن قاتىسا المايدى، ۇيىمداستىرۋشىلارعا جارناسىن تولەگەننەن كەيىن عانا جارقىلداعان ساحنادا ونەر كورسەتۋگە جولداما الادى. سوڭىنان «بالالاردىڭ ساعىن سىندىرىپ المايىق» دەگەن جەلەۋمەن جۇلدەنى شۇلەن تاراتقانداي اسقان جومارتتىقپەن وڭدى-سولدى تاراتا بەرۋ بۇلارعا تۇك ەمەس. اقشاسى تولەنگەن سوڭ بارىنە بىردەي باس جۇلدە، قوس-قوستان ءبىرىنشى، ەكىنشى، ءۇشىنشى ورىن بەلگىلەنىپ جاتادى. راس، تالانتتى بالالار كوپ بولۋى مۇمكىن، بىراق گران-پري – بىرەۋ عانا. بايقاۋ ەرەجەسىن بەلدەن باسىپ، قازاقستانداعى بالالار شوۋ-بيزنەسىن مايشەلپەككە اينالدىرىپ، كۇرەپ تابىس تاۋىپ جۇرگەندەر بۇل جاعىنان ەندىگى شەتەلدىڭ ءوزىن شاڭ قاپتىرىپ كەتتى-اۋ، شاماسى. مۇنداي باسەكە-جارىسقا قاتىسار الدىندا دەڭگەي دەگەن دۇنيەنىڭ بولاتىنىن قاتىسۋشى تاراپ ءبىر ۋاق قاپەرىنە دە المايدى. دەڭگەيى تومەن بايگە ءۇشىن جانىن سالا دايىندالىپ، جۇلدەگە تالاسىپ، ديپلومدى قورابىمەن جيناعاننىڭ پايداسىز ەكەنىن تۇسىنبەيدى. جەڭىس يەلەنىپ، ورىن العان بالانىڭ اتا-اناسى ءماز، «بالام لاۋرەات بولدى» دەپ، ديپلومىن اكەلىپ، ءتىپتى اۋدان، وبلىس اكىمىنىڭ قابىلداۋىن قالايتىنداردىڭ دا كەزدەسەتىنىن قايتەرسىز. ونەردىڭ بيىگىن الاسارتىپ بارا جاتقان ورەسىزدىككە كۇيىنگەنىمەن، كوممەرتسيالىق باعىتتاعى تولىپ كەتكەن جەكە بايقاۋلاردى توقتاتۋ تۋرالى ەشكىم ءتىس جارمايدى. تىكەلەي اتا-اناسىنىڭ قاراجاتىمەن العان ءبىر بەت قاعاز بەن لاۋرەاتتىق اتاقتىڭ بالانىڭ ونەرىن دامىتۋعا قالاي ايتساق تا قاۋقارى جەتپەيدى. بالالار ءۇشىن جەكە كوممەرتسيالىق باعىتتاعى بايقاۋلاردى ۇيىمداستىرۋ توقتاتىلۋعا ءتيىس. ال ارنايى قاۋلىمەن مادەنيەت مەكەمەلەرى ۇيىمداستىراتىن مەملەكەتتىك بايقاۋلاردىڭ سوڭىندا سۇراۋى بار، ول تۋرالى ءسوز باسقا.

بالا باسەكەلەستىرۋدەگى قاۋىپتى سالداردىڭ زيانىن قوعامنان بۇرىن ۇرەي مەن ۋايىم جەتەگىندە ءالدى مەن ادىلەتسىزدىكتىڭ قايشى­لى­عىمەن ءسات سايىن كەزدەسكەن جاس وسكىن تارتادى. باسەكەلەستىك دەگەن ەڭ الدىمەن، ءوز قابىلەتىن جۇزەگە اسىرۋ، ماقساتقا جەتۋ جو­لىن­داعى جەكە باس كەمشىلىگىن جويۋ جەڭىسى ەكەنىن بالدىرعاندارىمىز تۇسىنسە يگى. بالا تار­بيەسىنە بايىپپەن قارايتىن ەلدەردە ۇر­پا­عىنىڭ رۋحاني ينتەللەكتىسى بيىك بولۋىنا ءمان بەرەدى. مۋزىكانى تۇسىنسە، سۋرەت، تەاتر ونەرىنەن حابارى بولسا، ەلگە ساپالى ازامات قوسىلدى دەپ قۋانادى. سول سەبەپتى اتا-انانىڭ اقشاسى سانسىز ديپلومدار مەن العىس حاتتارعا ەمەس، بالا ينتەللەكتىسىنىڭ دامۋىنا جۇمسالسا عانا اقتالاتىنى انىق.

سوڭعى جاڭالىقتار

مەسسي جەڭىسكە جەتەلەي المادى

فۋتبول • بۇگىن، 07:35

شيرەك فينالعا ءوتتى

تەننيس • بۇگىن، 07:33

ءتورتىنشى ورىنعا تۇراقتادى

تەننيس • بۇگىن، 07:32

جۇلدەنىڭ اۋىلى الىس ەمەس

سپورت • بۇگىن، 07:28

بارىمتاعا – «قارىمتا»

قوعام • بۇگىن، 07:25

اسىق اتۋدان الەم چەمپيونى

ۇلتتىق سپورت • بۇگىن، 07:24

ادام كاپيتالىن ارتتىرۋعا ارنالادى

ەكونوميكا • بۇگىن، 07:20

جاڭا رەفورماعا سەنىم زور

پىكىر • بۇگىن، 07:16

ءۇمىت ءسوزى

پىكىر • بۇگىن، 07:12

بۇل – بولاشاقتىڭ تاڭداۋى

پىكىر • بۇگىن، 07:08

اشىقتىقتى ارتتىراتىن يگى ىستەر

قازاقستان • بۇگىن، 07:05

قۇقىق ۇستەمدىگى – كەلىسىم كەپىلى

قازاقستان • بۇگىن، 07:03

ەرتەڭىمىز ءۇشىن ۇتىمدى شەشىم

ساياسات • بۇگىن، 07:00

كاسىپ كوزى – ءناسىپ كوزى

ەكونوميكا • كەشە

تۇڭعىش توراعانىڭ تويى

قازاقستان • كەشە

ۇقساس جاڭالىقتار