اقتوبە وبلىسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتىندا اسا ءىرى مولشەردە پسيحوتروپتىق زاتتاردى زاڭسىز ساقتاعانى جانە تاسىمالداعانى ءۇشىن كىنالى دەپ تانىلعان اقتوبە قالاسىنىڭ 33 جاستاعى تۇرعىنىنا قاتىستى قىلمىستىق ءىس قارالدى. ودان 144 گرامنان استام پسيحوتروپتىق زات تاركىلەندى.
كۇدىكتىنىڭ پسيحوتروپتىق زات ورالعان ورامانى بىرنەشە رەت زاڭسىز ساتىپ العانى جانە ءوزىنىڭ جەرتولەسىندە اسا ءىرى مولشەردە زاڭسىز ساقتاعانى بەلگىلى بولدى. سوت وتىرىسىندا سوتتالۋشى تاعىلعان ايىپتى مويىندامادى. سونداي-اق سوتقا دەيىنگى تەرگەۋ بارىسىندا بەرگەن ايعاقتارىنان باس تارتتى. الايدا پوليتسيا قىزمەتكەرلەرى بۇلتارتپايتىن دالەلدەمەلەر ۇسىنىپ, سوتتالۋشى كىناسى راستالدى.
ۇكىم زاڭدى كۇشىنە ەندى. وعان 11 جىلعا باس بوستاندىعىنان ايىرۋ جازاسى تاعايىندالدى.
«بىلتىر جانە بيىل پسيحوتروپتىق زاتتاردى كەپىلگە سالۋشىلارعا قاتىستى بارلىعى 17 قىلمىستىق ءىس سوتقا جولداندى. ون ءىس بويىنشا ۇكىم شىعارىلدى. وندا سوتتالعانداردىڭ ارقايسىسى 10 جىلدان استام ۋاقىتقا باس بوستاندىعىنان ايىرىلدى», دەدى اقتوبە وبلىسى پد ەسىرتكى قىلمىسىنا قارسى ءىس-قيمىل باسقارماسىنىڭ باستىعى نۇرلان تاۋشانباەۆ.
