الماتىداعى كارديولوگيا جانە ىشكى اۋرۋلار عىلىمي-زەرتتەۋ ينستيتۋتىندا ي.سەچەنوۆ اتىنداعى ماسكەۋ مەملەكەتتىك مەديتسينا ۋنيۆەرسيتەتىنىڭ №1 ۋنيۆەرسيتەتتىك كلينيكالىق اۋرۋحاناسىنىڭ جەتەكشى اريتمولوگى الەكسەي تسىگانوۆ جۇرەك ىرعاعىنىڭ كۇردەلى بۇزىلىستارىن كاتەتەرلىك ەمدەۋ سالاسىنداعى يننوۆاتسيالىق تەحنولوگيالاردى قولدانا وتىرىپ, وتاندىق دارىگەرلەرگە شەبەرلىك ءدارىسىن وتكىزدى.
ءبىر جاعىنان كىاعزي-دا ورناتىلعان CARTO 3 V7 Prime جۇرەكىشىلىك ناۆيگاتسياسىنىڭ بىرەگەي ءۇش ولشەمدى جۇيەسىنىڭ بولۋى ەڭ كۇردەلى, ونىڭ ىشىندە جۇرەك ىرعاعىنىڭ بۇزىلۋىنا جانە ىلەسپە پاتولوگيالارعا بايلانىستى كۇردەلى وپەراتسيالاردى جاساۋعا مۇمكىندىك بەرىپ وتىر. 3D-تەحنولوگيالار 1 ميلليمەترگە دەيىن اريتميانىڭ كوزىن تابۋعا جانە ونى جويۋعا مۇمكىندىك بەرەدى.
ء«بىزدىڭ كلينيكادا بار جابدىق ۇزدىك ستاندارتتارعا ساي بولعاندىقتان, جۇرەك ىرعاعى بۇزىلعان ناۋقاستارعا كەز كەلگەن كۇردەلى وتانى جاساي الامىز. 2010 جىلدان بەرى كلينيكادا جۇرەك ىرعاعى ءتۇرلى بۇزىلىستارىنىڭ راديوجيىلىكتى ابلاتسياسى, ونىڭ ىشىندە جۇرەكشە فيبريللياتسياسى, كريوابلاتسيا مەن باسقا دا جەدەل حيرۋرگيالىق وپەراتسيالار ءساتتى جاسالىپ كەلەدى», دەيدى عزي باسقارما توراعاسى, پروفەسسور روزا قۋانىشبەكوۆا.
«اريتمولوگيا – ءبىلىم مەن كلينيكالىق تاجىريبە سالاسى رەتىندە جىلدام جاڭارىپ قانا جاتقان جوق, سونىمەن قاتار كارديولوگيانىڭ ەڭ كۇردەلى بولىمدەرىنىڭ ءبىرى. جاقسى مامان بولۋ ءۇشىن ۇنەمى وقۋ قاجەت. سوندىقتان جەتەكشى مەديتسينالىق ورتالىقتارمەن ىنتىماقتاستىق شەڭبەرىندە ءبىز ۇنەمى شەبەرلىك كلاستار, سەمينارلار وتكىزىپ تۇرامىز. مۇنداعى ماقساتىمىز – ماماندارىمىزدىڭ ارىپتەستەرىمەن ارالاسۋعا, بىلىكتىلىگىن ارتتىرۋىنا, جاڭا ءبىلىم الۋىنا, جاڭا جابدىقتاردا جۇمىس ىستەۋىنە مۇمكىندىك جاساۋ», دەيدى كلينيكا باسشىسى.
مۇنداي شەبەرلىك دارىستەرى ينتەرۆەنتسيالىق اريتمولوگيانىڭ زاماناۋي تەحنولوگيالارىن قولدانۋدا مامانداردى ماشىقتاندىرا وتىرىپ, جۇرەك ىرعاعىنىڭ قاقپاقشالىق بۇزىلىستارى بار پاتسيەنتتەردە جۇرەكىشىلىك ەلەكتروفيزيولوگيالىق زەرتتەۋلەر مەن كاتەتەرلى ابلاتسيانى قولدانۋدى, جاساندى قاقپاقشاعا الماستىرۋدا بىلىكتىلىكتى ارتتىرۋدى كوزدەيدى.
جاس مامانداردىڭ قاتىسۋىمەن وتكەن شەبەرلىك ءدارىسى بارىسىندا جۇرەك ىرعاعىنىڭ كۇردەلى بۇزىلىستارى بار ءتۇرلى جاستاعى پاتسيەنتتەرگە وپەراتسيا جاسالدى. ولاردى جۇرەك جۇمىسىنداعى ۇزىلىستەر, ەنتىگۋ, السىزدىك, باس اينالۋ, تەز شارشاۋ سەكىلدى بەلگىلەر مازالاعان.
بۇل تەحنولوگيالاردىڭ ءمانىسى مىنادا. پاتسيەنتتەردىڭ جۇرەك قۇرىلىمى تۋرالى بارلىق دەرەكتى بەرەتىن 3D كارتالارىن جاساۋ. ول جۇرەك ىرعاعى بۇزىلۋلارى دياگنوستيكاسىنىڭ دالدىگىن ارتتىرۋ مەن كاتەتەردى وقشاۋلاۋ ەسەبىنەن ەمدەۋ تيىمدىلىگىن ارتتىرۋعا, قايتالاناتىن وپەراتسيالاردىڭ قاجەتتىلىگىن ازايتۋعا, ينفاركت, جۇرەك جەتكىلىكسىزدىگى, ينسۋلت سياقتى كەنەتتەن بولاتىن ءولىم مەن اسقىنۋلاردىڭ سانىن ازايتۋعا مۇمكىندىك بەرەدى.
شەبەرلىك ءدارىسى بارىسىنداعى وپەراتسيالار ءساتتى ءوتتى. كلينيكادا سوڭعى جىلدارى 3 مىڭنان استام وسىنداي وپەراتسيا جاسالعان.
الماتى
