ءبىر اپتاعا جالعاسقان ءتۋرنيردىڭ ەرلەر اراسىنداعى فينالدىق باسەكەدە الماتىلىق دەنيس ەۆسەەۆ پەن الەمنىڭ 151-ءشى, وسى جارىستىڭ 1-راكەتكاسى رەسەيلىك رومان سافيۋللين باس جۇلدەنى ساراپقا سالدى. بۇل – الەمدىك رەيتينگتە 341-ورىندا تۇرعان 29 جاستاعى قازاقستاندىق تەننيسشىنىڭ كارەراسىنداعى العاشقى چەللەندجەر ءتۋرنيرىنىڭ فينالى بولاتىن. بۇعان دەيىن ITF ساناتىنداعى ەڭ تومەنگى فيۋچەرس جارىستارىندا توپ جارىپ جۇرگەن وتانداسىمىز, وكىنىشكە قاراي, چەللەندجەر دوداسىندا توپ جاراتىن العاشقى مۇمكىندىگىن پايدالانا المادى.
فينالدىق سايىستىڭ ءبىرىنشى پارتياسىن دەنيس ەۆسەەۆ ءتاۋىر باستاپ, سەگىز سەتتە 6:2 ەسەبىمەن جەڭىسكە جەتكەنىمەن, ەكىنشى پارتيادا ر.سافيۋللين ەسە قايتارىپ, تارازى باسىن تەڭەستىردى – 6:4. ال ءۇشىنشى, شەشۋشى پارتيادا رەسەيلىك سپورتشىنىڭ تاي-برەيكتە باعى جانىپ, جەڭىستى ج ۇلىپ الدى – 7:6 (7:2). وسىلايشا, رومان ءوز سپورتتىق جولىندا ەكىنشى رەت چەللەندجەر تۋرنيرىندە جەڭىمپاز اتانىپ, رەيتينگتىك 80 ۇپاي مەن 7 200 اقش دوللارى كولەمىندە سىياقىعا يە بولدى. فينالدا جەڭىلىپ قالعانىنا قاراماستان, ەۆسەەۆ دۇيسەنبىدە جاڭارتىلاتىن الەمدىك رەيتينگتە 341-دەن 269-ورىنعا كوتەرىلدى.
ايەلدەر اراسىندا «پرەزيدەنت كۋبوگى» اياسىندا وتكەن ITF World Tennis Tour W60 دوداسىندا جاپونيالىق مويۋكا ۋچيدجيما ۇزدىك شىقتى. ول فينالدا سەربيالىق ناتاليا ستەفانوۆيچتى ۇتتى – 6:3, 7:6 (7:2). ايتا كەتەيىك, جىل سايىن ءداستۇردى تۇردە ۇيىمداستىرىلاتىن ەلىمىزدەگى ەڭ بەدەلدى جارىستاردىڭ ءبىرى سانالاتىن «پرەزيدەنت كۋبوگى» ءتۋرنيرى ارقاشان جوعارى مارتەبەگە يە. ءبىر جىلدارى بۇل جارىستا الەمنىڭ ەڭ ۇزدىك تەننيسشىلەرى, اتاپ ايتقاندا, دانيل مەدۆەدەۆ (ATP №1), اندرەي رۋبلەۆ (ATP №8), كارەن حاچانوۆ (ATP №22), ميومير كەتسمانوۆيچ (ATP № 30), سەباستيان كوردا (ATP № 46), ماكس پەرسەلل جانە باسقا دا كوپتەگەن تانىمال ويىنشى ونەر كورسەتكەن.
سونداي-اق ءار جىلدارى «پرەزيدەنت كۋبوگىندا» قازاقستاندىقتاردان ميحايل كۋكۋشكين مەن اندرەي گولۋبەۆ, ۋكراينالىق يليا مارچەنكو, اۋستريالىق سەباستيان وففنەر, گەرمانيا قۇراماسىنىڭ قازىرگى كاپيتانى راينەر شاتتلەر, اۋستراليا اشىق چەمپيوناتىنىڭ جانە «رولان گارروس» چەمپيونى حورۆات يۆان دوديگ, جۇپتىق سىندا «ۇلكەن دۋلىعا» ءتۋرنيرىنىڭ ەكى دۇركىن جەڭىمپازى قىتايلىق چجان شۋاي جانە تاعى باسقا تەننيسشىلەر جەڭىسكە جەتكەن.
