ءوزارا ءتيىمدى ىقپالداستىق ارناسىنداعى اڭگىمە

مەملەكەت باسشىسى نۇرسۇلتان نازارباەۆ دۇنيەجۇزىلىك بانكتىڭ وكىلدەرىن قابىلدادى, دەپ حابارلادى پرەزيدەنتتىڭ ءباسپاسوز قىزمەتى. دۇنيەجۇزىلىك بانك تاراپىنان كەزدەسۋگە ۆيتسە-پرەزيدەنت لورا تاك, ينۆەستيتسيالاردى كەپىلدەندىرۋ جونىندەگى كوپجاقتى اگەنتتىكتىڭ ۆيتسە-پرەزيدەنتى كەيكو حوندا جانە حالىقارالىق قارجى كورپوراتسياسىنىڭ ۆيتسە-پرەزيدەنتى كارين فينكەلستون قاتىستى. قازاقستان پرەزيدەنتى ەكونوميكانى دامىتۋعا جانە ۇزاقمەرزىمدى جوسپارلاردى جۇزەگە اسىرۋعا كورسەتىلگەن بەلسەندى قولداۋ ءۇشىن ريزاشىلىعىن ءبىلدىردى. – قازاقستان اسا ماڭىزدى سەرىكتەسىنە اينالعان دۇنيەجۇزىلىك بانكپەن تاۋەلسىزدىك جىلدارىنان بەرى ىنتىماقتاسىپ كەلەدى. سىزدەردىڭ جۇمىستارىڭىز ءبىزدىڭ ەلىمىزگە پايدالى ناتيجەلەر اكەلۋدە جانە ول قازاقستاندا جوعارى باعا الىپ وتىر. بانكتىڭ پورتفەلىندە مىندەتتەمەلەرىنىڭ جالپى سوماسى 3,6 ميلليارد دوللار شاماسىنداعى 10 ينۆەستيتسيالىق جوبا بار. سونىڭ 1,5 ميللياردى يگەرىلدى. بۇدان ارعى ىنتىماقتاستىققا شاقىرعان جاڭا ۇسىنىسىمىزدى قابىل العاندارىڭىز ءۇشىن ريزامىن, – دەدى مەملەكەت باسشىسى. نۇرسۇلتان نازارباەۆ مەملەكەتتىڭ بيىل ەكونوميكانى دامىتۋعا, ەڭ الدىمەن, شاعىن جانە ورتا بيزنەستى, سونداي-اق, يندۋستريالىق باعدارلامانى جۇزەگە اسىرۋعا 1 تريلليون تەڭگە بولەتىنىن ەسكە سالدى. – ءبىزدىڭ تالپىنىستارىمىزدى دۇنيەجۇزىلىك بانكتىڭ قولداۋى اسا ماڭىزدى. ءسىزدىڭ بانكتەرىڭىزدىڭ قىزمەتى ءبىزدىڭ ەلدە جۇمىس ىستەگىسى كەلەتىن وزگە دە قارجى ينستيتۋتتارىن قىزىقتىرادى دەپ ۇمىتتەنەمىن. دۇنيەجۇزىلىك بانكتىڭ تيىمدىلىكتى, بارلىق ۇدەرىستىڭ اشىقتىعىن ارتتىرۋ سالاسىنداعى ايتارلىقتاي تاجىريبەسى بارىن ەسكەرىپ, ءبىز سىزدەردى ءتيىستى كەلىسىمگە قول قويۋ ارقىلى وسى باس­تامانى جۇزەگە اسىرۋعا سەرىكتەس رەتىندە شاقىرۋعا شەشىم قابىلدادىق. سول ءۇشىن ءبىز زاڭنامامىزعا وزگەرىس ەنگىزىپ, ينۆەستيتسيالار ءۇشىن قاجەتتى بارلىق پرەفەرەنتسيا­لار مەن قولايلى شارتتاردى ۇسىنامىز. سىزدەردىڭ ساپارلارىڭىز ءبىزدىڭ ەلىمىزبەن قاتار بانكتىڭ ءوزى ءۇشىن دە جەمىستى بولادى دەپ ەسەپتەيمىن, – دەدى قازاقستان پرەزيدەنتى. دۇنيەجۇزىلىك بانك توبىنىڭ اتىنان ۆيتسە-پرەزيدەنت لورا تاك قازاقستانمەن ۇزاقمەرزىمدى ىنتىماقتاستىقتى دامىتۋدى جالعاستىرۋدىڭ ماڭىزدىلىعىن اتاپ ءوتتى. – ءبىزدىڭ ءوزارا ءىس-قيمىلدارىمىز ءتۇرلى ەكونوميكالىق جوبالاردىڭ كەڭ اۋقىمى اياسىندا جۇرگىزىلۋدە. ىنتىماقتاستىق قازاقستان دۇنيەجۇزىلىك بانككە قوسىلعان 1992 جىلى باستالدى, ءبىز 38 ميلليون دوللار كولەمىندەگى العاشقى كەلىسىمشارتىمىزعا قول قويىپ, بۇگىنگە دەيىن جالعاسىپ كەلە جاتقان باعىتتار بويىنشا جۇمىس جۇرگىزە باستادىق. سودان بەرى قازاقستان ماكروەكونوميكالىق جانە الەۋمەتتىك كورسەتكىشتەر جونىنەن زور ىلگەرىلەۋگە قول جەتكىزدى. سونداي-اق, قازاقستاننىڭ ەكونوميكالىق تابىستارى حالىقتىڭ بارلىق توپتارىنا تەڭ ءبولىنۋى ءۇشىن ۇلكەن جۇمىس اتقارىلدى. دۇنيەجۇزىلىك بانك سەرىكتەس رەتىندە وسى ۇدەرىستەردىڭ ءبارىن قاناعاتتانۋشىلىقپەن باقىلاپ, بارلىق جەتىستىكتەرگە اتسالىسىپ وتىردى, – دەدى دۇنيەجۇزىلىك بانكتىڭ ۆيتسە-پرەزيدەنتى. ل. تاك «قازاقستان-2050» ستراتەگياسى دۇنيەجۇزىلىك بانكتىڭ جۇمىس جوسپارىمەن سايكەس كەلەتىنىن اتاپ ءوتتى. – ءبىز قازاقستاننىڭ يندۋستريالىق ەكونوميكا قۇرۋ, جەكە سەكتوردى, وسى سالاداعى يننوۆاتسيالار مەن ينۆەستيتسيالاردى قولدايتىن ارناۋلى مەملەكەتتىك ساياساتىن ىلگەرىلەتۋ ءۇشىن جەدەلدەتىلگەن دامۋ باعدارلاماسىن تولىعىمەن قولدايمىز. قازاقستاننىڭ ساياسي رەفورمالار سىرتقى سىلكىنىستەرگە توتەپ بەرۋ قابىلەتىن ارتتىرىپ, ۇدايى ەكونوميكالىق ءوسىمدى جالعاستىرۋعا سەپتىگىن تيگىزۋى ءتيىس دەگەن ۇستانىمىن دا ماقۇلدايمىز. ءبىز قازاقستان تاراپىمەن جۇمىستى بىرلەسە جالعاستىرۋعا زور قۇلشىنىسىمىزبەن دايىنبىز, – دەدى بانكتىڭ وكىلى. كەزدەسۋ قورىتىندىسى بويىنشا قازاقستان رەسپۋبليكاسى ۇكىمەتى مەن حالىقارالىق قايتا قۇرۋ جانە دامۋ بانكى, حالىقارالىق قارجى كورپوراتسيا­سى مەن دۇنيەجۇزىلىك بانك توبىنىڭ ينۆەستيتسيالاردى كەپىلدەندىرۋ جونىندەگى كوپجاقتى اگەنتتىگى اراسىندا قازاقستان رەسپۋبليكاسىنىڭ ءوسىمى مەن ورنىقتى دامۋىنا اتسالىسۋ ماقساتىنداعى ىنتىماقتاستىقتى كۇشەيتۋ جونىندەگى سەرىكتەستىك تۋرالى نەگىزدەمەلىك كەلىسىمگە قول قويۋ ءراسىمى ءوتتى.