ۇرىمشىدەگى تەمىرجول بەكەتىندە جارىلىس بولدى

استانا. 1 مامىر. قىتايدىڭ سينتسزيان-ۇيعىر اۆتونوميالى اۋدانى ءۇرىمشى قالاسىنداعى وڭتۇستىك تەمىرجول بەكەتىندە جارىلىس ورىن الىپ, ءۇش ادام قازا بولدى. بۇل تۋرالى يتار-تاسس حابارلادى. جارىلىس سالدارىنان 79 ادام جاراقات العان, ولاردىڭ تورتەۋىنىڭ جاعدايى اۋىر كورىنەدى. وقيعا 30 ءساۋىر كۇنى ءۇرىمشى قالاسىنىڭ ەڭ ءىرى تەمىرجول بەكەتىندە ورىن العان. دەرەكتەرگە قاراعاندا, جارىلعىش زات بەكەت پەن اۆتوبۋس ايالداماسىنىڭ ورتاسىندا ىسكە قوسىلعان. قازىرگى ۋاقىتتا تەمىرجول بەكەتىن قارۋلى پوليتسەيلەر كۇزەتۋدە. جەرگىلىكتى ۇكىمەت وكىلى لو فۋيۋن بۇقارالىق اقپارات قۇرالدارىنا جاعدايدىڭ باقىلاۋعا الىنىپ, جارىلىس سەبەپتەرىن انىقتاۋ ماقساتىندا تەرگەۋ جۇمىستارى ءجۇرىپ جاتقانىن مالىمدەدى. سينتسزيان-ۇيعىر اۆتونوميالى اۋدانى قىتايداعى كەلەڭسىز وقيعالارعا تولى, تىنىشسىز وڭىرلەردىڭ ءبىرى سانالادى. بيلىك مۇندا ورىن الىپ جاتاتىن تەراكتىلەرگە جاۋاپكەرشىلىكتى «شىعىس تۇركىستاننىڭ يسلام قوزعالىسى» مۇشەلەرىنە ارتۋدا. «شىعىس تۇركىستاننىڭ يسلام قوزعالىسى» قىتاي حالىق رەسپۋبليكاسىندا تەرروريستىك ۇيىم سانالادى. ولار 2009 جىلى سينتسزيان-ۇيعىر اۆتونوميالى اۋدانىندا ورىن العان تارتىپسىزدىكتەردىڭ پايدا بولۋىنا ىقپال ەتكەن. ول كەزدە 197 ادام قازا بولىپ, 1700-دەن استامى جاراقات العان بولاتىن. ايدار ورىسباەۆ. دەرەككوز: Itar-tass.com. فوتو: Rusbg.com.