«نۇرسۇلتان نازارباەۆ. ءومىربايان» اتتى كىتاپ ۆەنگر تىلىندە جارىققا شىقتى

استانا. 1 مامىر. ۆەنگريا استاناسى بۋداپەشتتە «نۇرسۇلتان نازارباەۆ. ءومىربايان» اتتى كىتاپتىڭ ۆەنگر  تىلىندەگى نۇسقاسىنىڭ تۇساۋكەسەرى بولدى. بۇل تۋرالى «24kz» حابارلادى. پرەزيدەنت كەڭسەسىنىڭ جەتەكشىسى, ساياسي عىلىمدار دوكتورى, پروفەسسور ماحمۇت قاسىمبەكوۆتىڭ اۆتورلىعىمەن شىققان بۇل ەڭبەك وسىعان دەيىن ورىس, اعىلشىن جانە اراب تىلدەرىنە اۋدارىلعان. كىتاپتا مەملەكەت باسشىسىنىڭ بالالىق شاعىنان باستاپ بۇگىنگە دەيىنگى ءومىرى, باعىندىرعان اسۋلارى, ەل ءۇشىن اتقارعان قىزمەتى قامتىلعان. ماحمۇت قاسىمبەكوۆ بۇل كىتاپتى 2012 جىلى باسپادان شىعارعان بولاتىن. ەڭبەكتىڭ ۆەنگر تىلىندەگى نۇسقاسىنىڭ جارىق كورۋىنە قازاقستاننىڭ ۆەنگرياداعى ەلشىلىگى قولداۋ كورسەتكەن. بۋداپەشتەگى  عىلىم اكادەمياسىنىڭ عيماراتىندا وتكەن تۇساۋكەسەر راسىمىنە ۆەنگريانىڭ رەسمي تۇلعالارى, عالىمدارى, ساياساتتانۋشىلارى, سونداي-اق, قازاق دياسپوراسىنىڭ وكىلدەرى قاتىستى. تۇساۋكەسەردە ۆەنگريانىڭ وڭىرلىك دامۋ ءمينيسترى شاندور فازەكاش: «وتە كەرەمەت جازىلعان كىتاپ. قازاقستاننىڭ قارقىندى دامۋى, الەمگە تانىلۋى ەل پرەزيدەنتى نۇرسۇلتان نازارباەۆتىڭ ساليقالى ساياساتىنىڭ ارقاسى. ساناۋلى ۋاقىتتا ساۋلەتى ەرەكشە استانا تۇرعىزۋ – تەك داۋلەتتى مەملەكەت پەن مىقتى باسشىنىڭ عانا قولىنان كەلەتىن ءىس, – دەدى. ال ماحمۇت قاسىمبەكوۆ ۆەنگرياداعى اتالعان شارا بارىسىندا: «مەن ءوز باسىم, كىتاپتىڭ ۆەنگر تىلىندە شىعۋى – ۆەنگر حالقىنىڭ قر پرەزيدەنتىنە, ول باسقارىپ وتىرعان قازاقستاننىڭ ەلىنە ۇلكەن قۇرمەتى, سىي-سىياپاتى دەپ بىلەمىن, – دەدى. كىتاپتىڭ تۇساۋكەسىرىنەن كەيىن قازاقستان دەلەگاتسياسى يانوش كودولاني اتىنداعى قولدانبالى عىلىمدار ۋنيۆەرسيتەتىندە «قازاقستان جولى جانە نازارباەۆ» اتتى قۇرمەتتى كافەدرانىڭ اشىلۋ سالتاناتىنا قاتىستى. ۆەنگر جەرىندەگى جەتەكشى ءبىلىم ورداسىنداعى بۇل كافەدرا ستۋدەنتتەر مەن وقىتۋشىلارعا قازاقستاننىڭ بۇگىنى مەن بولاشاعىنان, قازاق حالقىنىڭ تىنىس-تىرشىلىگىنەن, مادەنيەتى مەن وركەنيەتىنەن اقپارات بەرەتىن بولادى. جولدىباي بازار. دەرەككوز: «24kz». فوتو: «24kz».