نۇرسۇلتان نازارباەۆ قۇتتىقتاۋ سوزىندە: «بۇگىن ۇلىق مەرەكە. جارقىراعان كوكتەمدە حالقىمىزدىڭ بىرلىگى مەرەكەسىن اتاپ وتەمىز. «بىرلىك» دەگەن ۇلى ءسوز. ەگەر دە وتباسىندا بىرلىك بولماسا, ەرلى-زايىپتىلار اجىراسىپ تىنادى, ەگەر دە زاۋىت, فابريكا, كومپانيادا بىرلىك بولماسا, كاسپورىن بانكروت بولىپ قۇريدى. ەگەر دە مەملەكەتتىڭ ىشىندە بىرلىك بولماسا, ءار ءوڭىر ءار جاققا تارتاتىن بولسا, وندا مەملەكەت كۇيرەيدى», – دەدى. بىرلىكسىز ەشقانداي بەرەكە بولمايتىنىن, ىنتىماعى جوق ەلدىڭ توبەسىنەن قارا بۇلت كەتپەيتىنىن ايتا كەلە: «ەڭ الدىمەن, اڭساپ جەتكەن تاۋەلسىزدىگىمىزدى ساقتاپ قالۋ حالىقتىڭ بىرلىگىنە بايلانىستى. كوپەتنوستى ەل بولعاننان كەيىن, بارلىق حالىقتاردى ۇيىمداستىرۋ ماڭىزدى. بىرلىك ارقىلى تاۋەلسىزدىگىمىزدى ساقتاپ قالامىز, بىرلىك ارقىلى مەملەكەتتى نىعايتامىز, بىرلىك ارقىلى حالىقتىڭ تۇرمىسى جاقساراتىن بولادى. حالىق بولاشاققا سەنىمدى بولادى, ەلىمىزدە تىنىشتىق پەن كەلىسىم بولادى», – دەگەن نۇرسۇلتان نازارباەۆ جۇرتشىلىقتى مەرەكەمەن قۇتتىقتاپ, ءاربىر وتباسىعا اماندىق, باق-بەرەكە تىلەدى.
جولدىباي بازار.
دەرەككوز: Bnews.kz. فوتو: Azglobus.net.
