ۆلاديمير پۋتين نۇرسۇلتان نازارباەۆقا العىسىن ءبىلدىردى

استانا. 1 مامىر. مينسكىدە وتكەن جوعارى ەۋرازيالىق ەكونوميكالىق كەڭەستىڭ وتىرىسىندا مەملەكەت باسشىسى نۇرسۇلتان نازارباەۆ ەۋرازيالىق ەكونوميكالىق وداق تۋرالى شارت جوباسىن قاراۋ بارىسىندا پىسىقتاي ءتۇسۋدى قاجەت ەتەتىن بىرقاتار ماسەلەلەرگە ءوز ارىپتەستەرىنىڭ نازارىن اۋداردى. بۇل تۋرالى «قازاقستان جاڭالىقتارى» حابارلادى. ەۋرازيالىق ەكونوميكالىق كەڭىستىك جانە كەدەن وداعى اياسىنداعى ءوزارا ىقپالداستىق ماسەلەلەرىن تالقىلاۋ ماقساتىندا قازاقستان, رەسەي, بەلارۋس ەلدەرىنىڭ پرەزيدەنتتەرى مينسكىدە باس قوسقان بولاتىن. وسى جيىندا مەملەكەت باسشىسى ەۋرازيالىق ەكونوميكالىق وداققا قاتىسۋشى تاراپتاردىڭ بارلىق مۇددەلەرى مەن قۇقىقتارى بارىنشا ساقتالۋى قاجەتتىگىن ايتا وتىرىپ, مامىر ايىندا قابىلدانۋى ءتيىس كەلىسىم-شارت جوباسىنا قاتىستى ءالى دە پىسىقتاۋدى قاجەت ەتەتىن بىرقاتار جاعداياتتارعا توقتالدى. كەزدەسۋدە نۇرسۇلتان نازارباەۆ: «مەيلىنشە كۇردەلى جايتتار ءۇشىن وتپەلى كەزەڭ قاجەت بولادى. بارلىق ماسەلەلەردى ءبىز كەدەن وداعىن قۇرۋ جانە بىرىڭعاي ەكونوميكالىق كەڭىستىكتى قالىپتاستىرۋ كەزىندە تالقىلاعانىمىزدى ەسكە سالعىم كەلەدى. بۇگىن ءبىز ءار تارماقتى سەنىممەن تالقىلاپ, نە ىستەگەنىمىز ءجون ەكەنىن شەشەتىن بولامىز دەپ ويلايمىن. ءبىز ءاردايىم باتۋالاستىققا قول جەتكىزىپ كەلدىك جانە الدا دا سولاي بولادى دەپ سەنەمىن, – دەدى. ءوز كەزەگىندە رەسەي پرەزيدەنتى ۆلاديمير پۋتين اتالعان وداقتى قۇرۋعا قازاقستان جاعىنىڭ جوعارى دەڭگەيدە بەلسەندىلىك تانىتقانىن اتاپ ءوتتى. ۆلاديمير پۋتين:  «نۇرسۇلتان ءابىش ۇلى نازارباەۆقا زور العىسىم مەن ريزاشىلىعىمدى بىلدىرەمىن, ويتكەنى ول وسى بىرلەستىكتىڭ رۋحتاندىرۋشىسى بولدى. اۋەلدەن بۇل ونىڭ يدەياسى ەدى, مۇنى مەن ەسىمدە جاقسى ساقتادىم», – دەدى. ال بەلارۋس پرەزيدەنتى الەكساندر لۋكاشەنكو: «ءبىزدىڭ وداقتىڭ باسقا ەلدەر ءۇشىن تارتىمدىلىعى ونىڭ قانشالىقتى ءتيىمدى بولاتىنىنا بايلانىستى. بىراق وداقتىڭ ءوزى دە ونىڭ اياسىنىڭ كەڭەيۋى ەسەبىنەن ۇلكەن قۇندىلىققا يە بولۋعا ءتيىس», – دەدى. سونداي-اق, مينسك كەزدەسۋىندە ەۋرازيالىق ەكونوميكالىق ينتەگراتسيانىڭ ءورىسىن كەڭەيتۋ كەرەكتىگى ءسوز ەتىلدى. جيىن سوڭىندا ەۋرازيالىق ەكونوميكالىق وداق تۋرالى شارت جوباسىن دايىنداۋ جۇمىسىنىڭ قورىتىندىسى شىعارىلدى. جولدىباي بازار. دەرەككوز: «قازاقستان جاڭالىقتارى». فوتو: Headlain.kz.