وڭىرلىك «اتامەكەن» كاسىپكەرلەر پالاتاسىندا ەتتى مال شارۋاشىلىعىن ۇستاپ وتىرعان سۋبەكتىلەردى قولداۋ ماسەلەلەرى بويىنشا جيىن ءوتتى. ءىس-شاراعا وبلىس اكىمىنىڭ ورىنباسارى مەيرام وتەشوۆ قاتىسىپ, مال باعاتىن اعايىننىڭ كوڭىلىندەگى الاڭداۋشىلىقتارعا نازار اۋداردى.
– وڭىرىمىزدە ەت باعىتىندا مال ءوسىرىپ وتىرعان شارۋاشىلىقتار بارشىلىق. شاعىن فەرمەرلىك شارۋاشىلىقتاردىڭ باسىم بولىگى سۋبسيديالاۋ كولەمىن وتكەن جىلدىڭ دەڭگەيىندە قالدىرۋدى سۇرايدى. شارۋالار وڭىردە اسىل تۇقىمدى ت ۇلىك كوبەيسە, ءىرى نەمەسە ۇساق مالدىڭ باسىنا بەرىلەتىن سۋبسيديا سوماسى ازايىپ قالا ما دەپ الاڭدايدى. سوندىقتان بۇل ماسەلەلەردى ەسكەرىپ, ولاردى قولداۋدىڭ تەتىكتەرىن قاراستىرۋ قاجەت, – دەدى مەيرام وتەشوۆ.
وڭىرلىك كاسىپكەرلەر پالاتاسىنىڭ ديرەكتورى سەرىك سادۋاقاسوۆ بىلتىر كاسىپتى ەندى قولعا العان شارۋاشىلىقتارعا جەمشوپ دايىنداۋ ءۇشىن سۋبسيديا بەرىلە باستاعانىن ەسكە سالدى. «سۋبسيديا بولىنە باستاعان سوڭ ايماعىمىزدا فەرمەرلىك شارۋاشىلىقتاردىڭ سانى كوبەيگەنىن قالايمىز. مال باسى جىلدان-جىلعا ءوسۋى زاڭدىلىق. وسىعان نازار اۋدارعان دۇرىس», دەگەن ويىمەن ءبولىستى ول.
«اگروفيرما اقجار ءوندىرىس» جشس باسشىسى گۇلزيرا قازىلوۆا ەت باعىتىنداعى مال وسىرۋشىلەر كوتەرىپ وتىرعان ماسەلەلەر وتە وزەكتى ەكەنىن جەتكىزدى.
ال جەرگىلىكتى «Agroexport Pavlodar» جشس-ءنىڭ يەسى قاناتبەك وزەمباەۆ سۋبسيديا بولۋدە بارلىعىنا بىردەي تەڭ قۇقىق بەرىلۋگە ءتيىس دەپ سانايدى.
– بۇل باعىتتى سۋبسيديالاۋعا بيۋدجەتتەن قاراجات از بولىنەتىنى بايقالادى. جاۋاپتى باسقارما الدىمەن ۇلكەن شارۋاشىلىقتاردى جارىلقايدى. اقىر سوڭىندا ۇساق شارۋالارعا قارجى جەتپەي قالىپ, ءۇمىتىمىز ۇزىلەدى. جىل سايىن قولداۋدان قاعىلامىز. بىلتىر ءشوپتىڭ ءبىر ورامى 12 مىڭ تەڭگەدەن ساتىلدى. مال ازىعىن دايىنداۋ ءۇشىن دە شىعىندارىمىز ءوسىپ كەتتى. ديزەل وتىنى, قاجەتتى تەحنيكا, تەحنيكانىڭ قوسالقى بولشەكتەرىنىڭ باعاسى بيىل مۇلدە شارىقتاپ تۇر. ەت باعىتىنداعى مال شارۋاشىلىعىمەن اينالىساتىن فەرمەرلەردىڭ ءوتىنىشى ەسكەرىلىپ, بىزگە سۋبسيديا بولىنسە دەگەن تىلەگىمىز بار, – دەگەن ءوتىنىشىن جەتكىزدى شارۋا.
شارۋاشىلىق باسشىسىنىڭ ايتۋىنشا, قۇنى جىل باسىندا 8 ملن تەڭگە بولعان متز تراكتورى قازىر 10 ملن تەڭگە تۇرادى. «قازاگروقارجى» اق-دا قۋاتتىلىعى ورتاشا تراكتور تەحنيكالارىنىڭ باعاسى 12 ملن تەڭگەگە دەيىن قىمباتتاپ كەتكەن.
مۇرات قاپان ۇلى,
جۋرناليست
پاۆلودار وبلىسى
