اتىراۋ وبلىستىق سانيتارلىق-ەپيدەميولوگيالىق باقىلاۋ دەپارتامەنتىنىڭ ءباسپاسوز قىزمەتىنەن ءمالىم ەتكەندەي, تەڭىز كەن ورنىندا تاماقتان ۋلانعان 30-دان استام جۇمىسشى مەديتسينالىق كومەككە جۇگىنگەن.
«جۇمىسشىلاردىڭ بارلىعى «كازپرومستروي ينجينيرينگ» جشس-عا تيەسىلى اسحانادا تۇسكى اس ىشكەن. العاشقى كومەك كورسەتىلگەننەن كەيىن جۇمىسشىلاردىڭ كوپشىلىگى امبۋلاتوريالىق ەمدەلۋگە جىبەرىلدى. جىلىوي اۋدانىنىڭ ورتالىعى – قۇلسارى قالاسىنداعى ورتالىق اۋرۋحاناعا ون ءبىر ادام جەتكىزىلدى. ناۋقاستاردا قۇسۋ, ديارەيا, بەزگەك, باس اۋرۋى, جالپى السىزدىك بايقالعان. الدىن الا دياگنوز – تاعامدىق توكسيكوينفەكتسياسى», دەپ حابارلادى دەپارتامەنتتىڭ ءباسپاسوز قىزمەتى.
تاماقتان ۋلانىپ, اۋرۋحاناعا تۇسكەن ناۋقاستاردىڭ جاعدايى ورتاشا اۋىر دەپ باعالانعان. اتىراۋ وبلىستىق سانيتارلىق-ەپيدەميولوگيالىق باقىلاۋ دەپارتامەنتىنىڭ ماماندارى جۇمىسشىلار تاماقتان ۋلانعان اسحانادان سىناما الىپ, ۇلتتىق ساراپتاما ورتالىعىنا جىبەردى.
زەرتحانالىق زەرتتەۋلەردىڭ ناتيجەلەرى ءۇش كۇن ىشىندە الىنادى. دەپارتامەنت ماماندارى جۇمىسشىلار تۇسكى اس ىشكەن اسحانانىڭ جۇمىسىنا جوسپاردان تىس تەكسەرۋ جۇرگىزۋدى جوسپارلاپ وتىر.
بۇعان دەيىن اتىراۋ وبلىسىنداعى تەڭىز كەن ورنىندا 30-دان استام جۇمىسشى تاماقتان ۋلانىپ قالعانى تۋرالى جازعان بولاتىنبىز.
