مۇگەدەكتەر مۇمكىندىگى شەكسىز

پارتيالىق «كەدەرگىسىز كەلەشەك» جوباسى اياسىندا «نۇر وتان» پارتياسىنىڭ زەرەندى اۋداندىق فيليالىندا مۇمكىندىگى شەكتەۋلى ازاماتتاردى قولداۋ جانە ەڭبەككە ورنالاستىرۋ ماسەلەسىن ارقاۋ ەتكەن كەزدەسۋ بولىپ ءوتتى. – ەڭبەك قاتىناستارى ايرىقشا ماڭىزدى ماسەلە, – دەدى باسقوسۋدىڭ بەت­اشارىندا پارتيانىڭ زەرەندى اۋدان­دىق فيليالىنىڭ توراعاسى, اۋدان اكىمى مالعاجدار تاتكەەۆ. – مۇندا ادام بويىنداعى اسىل قاسيەتتەر اشىلىپ, كەز كەلگەن كىسىنىڭ قوعامداعى ورنى مەن وعان قىزمەت ەتۋ سەزىمى ايقىندالادى. سوندىقتان, دەنساۋلىعىنا بايلانىستى مۇمكىندىگى شەكتەۋلى ازاماتتارعا قام­قورلىق كەشەندى سيپات الىپ, ەشكىمدى بەيتاراپ قالدىرماۋعا ءتيىستى. بۇل – تاۋەلسىز مەملەكەتىمىزدىڭ قاستەرلى پارىزى. اۋداندا مۇگەدەك جانداردىڭ قۇقىق­تارى مەن مۇددەلەرىن قورعاۋ ماقساتىندا وڭالتۋ باعىتىنداعى 79 نىساننىڭ تولقۇ­جاتى زاڭداستىرىلىپ وتىر. بىلتىر بەلگى­لەنگەن كۆوتا نەگىزىندە 19 ادام جۇمىسقا ورنالاستىرىلعان. سونداي-اق, «جۇمىسپەن قامتۋدىڭ جول كارتاسى-2020» باعدار­لاماسى اياسىندا ەكى كىسى الەۋمەتتىك جۇمىسقا جولداما الىپ, قازىر تۇراقتى ەڭبەكپەن اينالىسىپ ءجۇر. بىرنەشە جاس وبلىس ورتالىعىنداعى كوللەدجدەردە تەگىن وقىتىلۋدا. – ۇستىمىزدەگى جىلى مۇمكىندىگى شەك­تەۋلى ءۇش كىسىگە جاستار تاجىريبەسىنە, ەكە­ۋىنە الەۋمەتتىك جۇمىس ورنىنا جولداما بەرىلسە, ەكى جەرلەسىمىز جەڭىلدەتىلگەن نەسيە الاتىن بولادى, – دەدى اۋداندىق جۇمىسپەن قامتۋ جانە الەۋمەتتىك باعدارلامالار ءبولىمى­نىڭ باسشىسى زەينەگۇل قازياقپاروۆا. – مۇگەدەكتەردى جۇمىسقا ورنالاستىرۋ كۆوتاسى 15 پايىزعا ارتىپ, 54 ادامدى قۇراپ وتىر. جيىن بارىسىندا مۇگەدەكتەردىڭ مۇمكىندىگى شەكتەۋسىز ەكەندىگىنە كوپتەگەن مىسالدار كەلتىرىلدى. ايتالىق, بوگەنباي اۋىلىنداعى بەكباەۆتار وتباسى مال شارۋاشىلىعىن وركەندەتىپ, وزگەلەرگە ۇلگى بولا بىلۋدە. ال قىزىلتاڭ اۋى­­لىن­داعى 2-توپتاعى مۇگەدەك باعدات قادىروۆ مەملە­كەتتىڭ كومەگىمەن وتباسىلىق بيز­نەستى وركەندەتۋگە مۇمكىندىك الدى. ول كىسىگە بىلتىر شاعىن نەسيە بەرىلگەن ەكەن. قازىر ونىڭ جەكە قوجالىعىندا ءتورت ت ۇلىك ءوز ءتولى ەسەبىنەن كوبەيە تۇس­كەن. بۇگىنگى كۇنى ب.قادىروۆتىڭ شارۋا­شى­لىقتى كە­ڭەيتۋ جونىندەگى بيزنەس-جوس­پارىن قاراۋعا العان اۋداندىق كوميسسيا وڭ شەشىم قابىلدايدى دەگەن ءۇمىت بار. جاقسى مىسالدىڭ ءبىرى رەتىندە زەرەندى اۋىلىنداعى ي.سادىقوۆ جەتەكشىلىك ەتەتىن «كوكشە-امۋر» جك ءوندىرىستى كە­ڭەيتىپ, جەرلەستەرىنە دە جۇمىس تاۋىپ بە­رىپ وتىرعانى اتاپ ءوتىلدى. جينالىستا اۋداندىق فيليال توراعا­سىنىڭ ءبىرىنشى ورىنباسارى ءلاززات سانتاس, اۋداندىق ءماسليحاتتىڭ دەپۋتاتتارى نىعمەت حاسەنوۆ, كاميل راسقۇلوۆ, ءسوز الىپ, يگى باس­تامانى قولداۋ تۋرالى ويلارىن ورتاعا سالدى. كەزدەسۋ بارىسىندا جۇمىس بەرۋشىلەر ءوزارا ىنتىماقتى مەموراندۋمعا قول قويدى. سونداي-اق, فيليال توراعاسى, اۋدان اكىمى مال­عاجدار تاتكەەۆ مۇمكىندىگى شەكتەۋلى ازا­مات­تاردىڭ تىلەگى بويىنشا جەكە قابىلداۋ وتكىزدى. باقبەرگەن امالبەك, «ەگەمەن قازاقستان». اقمولا وبلىسى, زەرەندى اۋدانى.