فرانتسيادا ەلىمىزدىڭ KazEOSat-1 جەر سەرىگى ءساتتى ۇشىرىلدى

استانا. 30 ءساۋىر. بۇگىن استانا ۋاقىتى بويىنشا تاڭعى ساعات 7:35-تە ەلىمىزدىڭ جەردى قاشىقتىقتان زوندتاۋ (جەردى عارىشتىق قۇرىلعىمەن باقىلاۋ) ءبىرىنشى جەر سەرىگى فرانتسيانىڭ «كۋرۋ» عارىش ايلاعىنان ءساتتى ۇشىرىلدى. بۇل تۋرالى Kazakhstan Today حابارلادى. KazEOSat-1 (Kazakhstan Earth Observation Satellite – قازاقستاندىق جەردى قاداعالاۋ جەر سەرىگى) اپپاراتىن ۇلتتىق عارىش اگەنتتىگىنىڭ تاپسىرىسى بويىنشا فرانتسيانىڭ Airbus Defence and Space كومپانياسى جاساپ شىعارعان. بارلىق سالماعى 900 كيلو تارتاتىن اپپارات عارىش الەمىندە 7 جىل جۇمىس ىستەيدى. KazEOSat-1 ستيحيالىق اپاتتار مونيتورينگىن ءتۇزۋ, الدىن الۋ, جەر كاداسترىن جۇرگىزۋ, قورعانىس پەن ەلدىڭ قاۋىپسىزدىگىن قامتاماسىز ەتۋ ماقساتىندا جاسالدى. ول قازاقستان اۋماعىنىڭ, سونداي-اق, جەردىڭ باسقا تەلىمدەرىنىڭ كورىنىستەرىن تۇسىرۋگە ارنالعان. KazEOSat-1 قۇرىلعىسىن كۇن-سينحروندى وربيتاعا «ۆەگا» ەۋروپالىق زىمىران تاسىعىشى الىپ ۇشتى. KazEOSat-1-ءدى عارىشقا جەتكىزۋ ماقساتىندا 2009 جىلى جەردى قاشىقتىقتان زوندتاۋ جەر سەرىكتەرىنىڭ ەكسپورتى جونىندەگى الەمدىك كوشباسشى – Airbus Defence and Space پەن «قازاقستان عارىش ساپارى» ۇلتتىق كومپانياسى» اكتسيونەرلىك قوعامى اراسىندا حالىقارالىق تەندەرلىك ۇدەرىس قورىتىندىلارى بويىنشا كەلىسىم جاسالعان. جەردى عارىشتىق قۇرىلعىمەن باقىلايتىن بۇل اپپاراتتى قۇرۋعا ارنالعان قازاقستان-فرانتسيا كەلىسىم-شارتى شەڭبەرىندە ەلىمىزدىڭ 50 ينجەنەرى پراكتيكالىق تاعىلىمدامىنىڭ تولىق كۋرسىنان ءوتتى. ولار جەر سەرىكتى اۆتونومدى باسقارۋدى جانە عارىش تۇسىرىلىمدەرىن وڭدەۋدى مەڭگەردى. «كۋرۋ» عارىش ايلاعىنا قازاقستان دەلەگاتسياسىن باستاپ بارعان ۇلتتىق عارىش اگەنتتىگىنىڭ توراعاسى تالعات مۇساباەۆ KazEOSat-1-ءدىڭ ءساتتى ۇشىرىلعانىنا وراي فرانتسيانىڭ اتالعان سالا باسشىلارىنا, ەۋروپا عارىش اگەنتتىگىنىڭ جەتەكشىلەرىنە جانە وسى ىسكە اتسالىسقان بارلىق ماماندارعا ەلىمىزدىڭ اتىنان العىس ءبىلدىردى. جولدىباي بازار. دەرەككوز: Kazakhstan Today. فوتو: «قازاقپارات».